O secretario nacional da CIG-Ensino, Anxo Louzao, presentou hoxe no Rexistro da Consellaría de Educación un escrito instando ao Conselleiro de Educación a que se absteña de acatar a recomendación do Valedor do Pobo contra o libro de texto que reproduce o artigo 5.1 do Estatuto: “A lingua propia de Galicia é o galego”. O secretario Nacional manifestou que a presentación deste escrito non só é para exixirlle ao conselleiro o cese dos ataques ao noso idioma senón tamén para que manifeste publicamente que a recomendación do Valedor do Pobo non vai ser asumida por ser ilegal e prexuizosa para a nosa lingua.

A plataforma cidadá Queremos Galego, da que forma parte a CIG celebrou esta mañá, diante da institución do Valedor do Pobo, unha concentración para exixir o cesamento inmediato do Valedor do Pobo, Benigno López, e do conselleiro de Educación, Jesús Vázquez, pola censura do libro de texto escolar da materia de Coñecemento do Medio que sinala que o galego é a lingua propia de Galiza, reproducindo literalmente o artigo 5.1 do Estatuto de autonomía. O vindeiro sábado está convocada outra concentración, na Praza do Toural, en Compostela, ás cinco da tarde.

A plataforma cidadá Queremos Galego, integrada por máis de 700 entidades sociais de diferente tipoloxía, entre elas a CIG, convoca para esta quinta feira (xoves) 15 de decembro ás 11.30 da mañá unha concentración diante da sede do Valedor do Pobo, en Santiago de Compostela.

Segundo se recolle nos medios de comunicación, o Valedor do Pobo dirixiuse á Consellaría de Educación para que non se utilice un libro de texto de coñecemento do medio por recoller o mesmo que di o Estatuto de Autonomía de Galiza: “A lingua propia de Galicia é o galego”. A CIG-ENSINO considera absolutamente inadmisíbel este feito, un ataque máis á nosa lingua, unha lingua que debe ser obxecto de protección e promoción tal e como regula a lexislación vixente e como esixen os datos sobre o seu uso, algo que non fai o actual Valedor do Pobo, Benigno López, empeñado en agredila.

As declaracións que vén de facer públicas o Conselleiro de Educación, avalando a recomendación do Valedor do pobo contra o libro de texto de Coñecemento do Medio de 5º de Primaria, da Editorial Vicens-Vives, por recoller que a lingua propia de Galiza é o galego, vén a evidenciar, en palabras do Secretario Nacional da CIG-Ensino, Anxo Louzao, que “o  Conselleiro de Educación continúa instalado na obsesión permanente de exterminar o idioma como lingua vehicular no ensino. É inaceptábel, ademais de provocador, que o señor Conselleiro de Educación deteste e promova a eliminación dun texto escolar no cal o único que se fai é reproducir o artigo 5.1. do Estatuto de Autonomía de Galicia”.

A CIG-Ensino vai reclamar por escrito á Consellaría de Educación que actúe contra as persoas que están acosando sistematicamente os equipos de normalización lingüística e os seus coordinadores e coordinadoras. A CIG-Ensino esíxelle á Consellaría de Educación que inste a Gloria Lago a retirar da web de Galicia Bilingüe o informe en que se persegue aos equipos de normalización e aos seus coordinadores, nomeadamente á CGENDL e tres dos seus representantes.

Dentro da campaña iniciada pola CIG contra o incumprimento dos acordos asinados entre a administración e as organizacións sindicais, a CIG-Autonómica vén de presentar 213 peticións perante o Valedor do Pobo, recollidas entre o persoal laboral da Xunta, para que inste á administración a cumprir os acordos acadados.