A Xunta de Galiza publicou o pasado venres o Plan de ordenación de Recursos Humanos, que recolle nun texto ambiguo o que o Goberno de Núñez Feijoo “non se atreveu a publicar como decreto de xestión integrada (área única)”. A secretaria da CIG-Saúde de Lugo, Carmen Aira, a responsábel da Federación na Mariña, Pilar Méndez, e o responsábel na Unión Local de Monforte, Vicente Vázquez, denunciaron nun comunicado que isto suporá a descapitalización dos hospitais comarcas, a perda de servizos e de profesionais sanitarios.

A CIG visibilizou publicamente esta mañá en rolda de prensa as consecuencias que as políticas de recorte e privatización da sanidade pública iniciadas polo Goberno da Xunta do PP están a ter. A Unión Comarcal da CIG da Coruña fíxose eco do caso dunha muller, desempregada de longa de duración, á que lle denegaron, sen previa comunicación, o acceso á consulta e á asistencia farmacéutica gratuíta logo de que o SERGAS lle desactivase a súa tarxeta sanitaria por ser unha persoa sen recursos económicos.

As Plataformas pola Defensa da Sanidade Pública de Ferrol e A Coruña veñen de reiterar as denuncias contra os recortes orzamentarios que a Consellaría está a aplicar ao sistema sanitario público e que se teñen traducido, entre outras consecuencias, nunha preocupante falta de persoal e no incremento das listas de agarda.

Diante do anuncio do plan de viabilidade económico financeira do novo hospital de Vigo, a CIG-Saúde manifestou o seu máis rotundo desacordo co modelo empregado para o financiamento da construción, que condicionará a xestión do mesmo, xa que a xestión dos servizos non sanitarios pasará as mans dos intereses da empresa privada.

O persoal do Hospital da Costa de Burela iniciou as mobilizacións en defensa da área sanitaria de A Mariña, logo do anuncio da Consellaría de integrar este centro nunha área de xestión con carácter provincial. Promovida pola CIG-Saúde, ducias de traballadores/as do hospital participaron nunha mobilización na mañá do 23 de setembro en contra dunha “sanidade de segunda” para a comarca.

O persoal do Hospital Comarcal de Valdeorras retomou as mobilizacións diante do centro na defensa do mantemento da área sanitaria de O Barco. Así mesmo, a semana que vén a Xunta de Persoal percorrerá os centros de saúde da zona para ofrecer información aos usuarios/as das consecuencias da supresión desta área.

A CIG-Saúde reclama á Consellaría de Sanidade que paralice inmediatamente a medida que obriga a traballadores/as dos hospitais públicos a desenvolver a súa actividade en centros privados. Esta decisión tense adoptado primeiramente en Vigo, onde enfermeiras estatutarias do Meixoeiro deberán realizar a súa xornada ordinaria no hospital Nosa Señora de Fátima dous días á semana. Ante esta situación a CIG-Saúde non descarta convocar mobilizacións.