O Comité de Empresa de LEVANTINA, de O Porriño, denuncia a redución de persoal que se vén producindo na empresa nos últimos tempos: no ano 2005, cando aínda se chamaba Graniter, contaba con 200 traballadores/as e na actualidade con só 150; nos últimos 18 meses desfixéronse de 25 traballadoras/es baixo diferentes fórmulas, despedimentos, baixas incentivadas... e agora pretenden trasladar a sete traballadores/as máis, dos que 3 están no Comité de Empresa, dous gozan de redución de xornada por fillos menores, unha foi na candidatura da CIG e outra é eventual. Por iso anuncian o comezo de mobilizacións, con concentracións ás 14:00 horas coincidindo coa saída de persoal de produción e de administración.

O persoal da fábrica de construción de mobles de cociña, Xoane, con sede en Atios, comezou na mañá do martes 3 de novembro unha marcha ás dez da mañá cara ao concello do Porriño para se reunir co alcalde deste concello, Raúl Francés, e trasladar deste xeito as súas demandas, diante dun ERE da empresa que pretende 25 despedimentos, despois de 7 despedimentos máis que xa se fixeron neste ano 2009, cando a empresa conta cunhas contas saneadas e unha boa situación económica. "O que queren é aproveitarse da crise para realizar despedimentos baratos", subliña Tano Guerra, responsábel da Unión Local da CIG do Porriño. O 4 e o 5 de novembro continuarán coa convocatoria de folga e con máis mobilizacións.

A empresa “Xoane” de Porriño, vén de anunciar a rescisión de 25 contratos, tras un ERE dun ano, alegando falta de pedidos. A Federación de Construcióne  Madeira da CIG e os propios traballadores consideran inxustificábel esta decisión e xa iniciaron unha folga que se desenvolverá de luns a xoves nas vindeiras semanas.

O Comité de Empresa do Grupo Antolín-PGA do Porriño denuncian que despois dun ERE do 20 de febreiro ao 5 de marzo que afectou ao 90% do persoal, a empresa contratou a 25 persoas por ETT, realizáronse horas extras na fin de semana e contratáronse transportes especiais porque non había stock para servir ao cliente. Mentres, os traballadores tiveron problemas co cobro da prima de produción e calidade. Se a empresa non resolve esta situación, desde o Comité de Empresa convocarán folgas parciais a partir do 20 de abril e irán intensificando as medidas de presión até convocar folga indefinida.

Pouco despois das seis da tarde daba comezo na Praza do Concello do Porriño unha concentración convocada polos traballadores e traballadores de Astrazeneca da CIG, para denunciar a deslocalización desta factoría farmacéutica, que pechará o 31 de xaneiro de non encontrar comprador. Alberto Gonzálvez, membro do Comité de Empresa, adiantaba xa que está "só é a primeira das mobilizacións e que queda un longo camiño de loita polo emprego e polo mantemento dos postos de traballo na nosa fábrica".

O persoal de Valeo volvía mobilizarse o venres 9 de xaneiro, desta volta cunha nova acción de denuncia, cortando o tránsito durante unha hora nas rotondas de acceso da autovía ao Polígono das Gándaras, desde a unha e media até as dúas e media da tarde, provocando importantes retencións nesta zona industrial da comarca de Vigo. Asi, volvian denunciar que desde finais do mes de decembro estas 90 persoas da antiga Valeo non teñen carga de traballo efectiva nin proxecto industrial co que continuar nos seus actuais empregos en Cablerias Auto.