Os traballadores do naval da Ría de Vigo resístense a deixar morrer o sector ante a inoperancia dos Gobernos español e galego e hoxe volveron cortar o tráfico na avenida de Beiramar para esixir medidas contra a grave crise que atravesa a industria. Nos vindeiros días levarán a cabo novas mobilizacións para forzar os responsábeis políticos a buscar unha solución definitiva antes de que a actual “etapa crítica” remate coa morte dun sector do que dependen milleiros de familias galegas.

O persoal de Valeo volvía mobilizarse o venres 9 de xaneiro, desta volta cunha nova acción de denuncia, cortando o tránsito durante unha hora nas rotondas de acceso da autovía ao Polígono das Gándaras, desde a unha e media até as dúas e media da tarde, provocando importantes retencións nesta zona industrial da comarca de Vigo. Asi, volvian denunciar que desde finais do mes de decembro estas 90 persoas da antiga Valeo non teñen carga de traballo efectiva nin proxecto industrial co que continuar nos seus actuais empregos en Cablerias Auto.