campaña

Organizacións sindicais, políticas e estudantís lanzan unha campaña de mobilizacións en defensa dos dereitos sociais e nacionais

paula.castro — Thu, 21 Feb 2013 13:35:29 +0100

Laura Arjonilla, que presentou a campaña, lembrou o contexto político, social e económico actual e sinalou que as organizacións que botan a andar esta campaña consideraron que este era o momento para mobilizarse de forma conxunta “en defensa do dereito ao traballo, á igualdade e os servizos sociais públicos, contra a destrución social e cultural que estamos a vivir e, fundamentalmente, contra a lacra da corrupción”.

Arjonilla chamou a unir forzas para darlle continuidade no tempo a esta campaña que agora se inicia porque “é necesaria unha ruptura co actual sistema e para iso hai que saír á rúa para denunciar a corrupción, en defensa dos dereitos da cidadanía, dos dereitos das mulleres, que tamén están a ser recortados, e pola soberanía nacional. Unha reclamación que debe ser central”.

Xunto a iso, lembrou que o proceso iníciase agora pero “está aberto a todas as organizacións e movementos que poidan compartir estes obxectivos” e insistiu na importancia de que se unan “para que toda a cidadanía galega faga parte para poder mudar o actual estado de cousas”.

Xulio Vicente, da Plataforma de Afectados polas Preferentes, explicou que se demanda un cambio de modelo social porque o actual está “caduco, defende os intereses do capitalismo e está corrupto”. Así lembrou a situación que se está a xerar por mor dos desafiuzamentos, “vulnerando de forma brutal a Constitución” ou das preferentes, para o que só obteñen como resposta que “nos teñen que roubar os cartos porque senón Bruxelas non lles dá os miles e miles de millóns de euros necesarios para sanear a banca”. Do mesmo xeito, denunciou os recortes que están a padecer servizos públicos esenciais como o ensino público e a sanidade e que “aquí a cidadanía se está empobrecendo día a día e cando os movementos sociais saen á rúa cando se deixa ás familias sen casa o propio sistema utiliza as forzas da orde para reprimilos”. Fronte a isto, asegurou que “o poder pode roubar, sexa o sr. Bárcenas, sexa a Casa real, pero os que realmente rouban e empobrecen o noso país teñen o sistema que os defende e aí as forzas da orde non actúan”.

Pola súa banda Mirian Rodríguez, tamén da plataforma de afectados polas Preferentes, fixo un chamamento á sociedade para que se sume a estas mobilizacións comarcais e á nacional, “a prol dos dereitos nos que todos e todas estamos implicadas, porque todas estamos afectadas”. E fixo un chamamento á unidade “para mudar este sistema caciquil”.

Soberanía nacional

As organizacións políticas convocantes articularon esta alianza para producir un novo proceso que permita “recuperar os nosos dereitos políticos, económicos, sociais, lingüísticos e culturais como pobo”.

Subliñan que esta é a base para que “non teñamos que emigrar para gañar a vida, que non sexa posíbel sufrir un desafiuzamento, que as mulleres e homes que viven e traballan en Galiza, con independencia da súa situación administrativa, teñan acceso libre aos servizos públicos da nosa sociedade” e manifestan que non haberá dereitos, liberdades e soberanía nacional “se non sobardamos os estreitos e antidemocráticos muros deste réxime e damos carta de natureza ás prácticas da democracia participativa e directa”.

Lugares e horas das concentracións de mañá venres:

A Coruña: Ás 20:00 horas, na subdelegación do Goberno

Compostela: Ás 20:00 horas diante da sede do PP en Alfredo Brañas

Ferrol: Ás 20:00 horas, diante da sede do PP

Lugo: Ás 20:00 horas, diante da sede do PP. Rúa poeta Ramón Cabanillas esquina rúa

Doutor Gasalla.

Ourense: Ás 20:00 horas, diante da sede do PP.

Pontevedra: O martes 26, ás 20:30 horas na Praza da Peregrina.

Vigo: Ás 19:00 horas, na Farola de Urzáiz.

Ocupan a sede central de Novagalicia Banco en Compostela para denunciar o espolio da banca á clase traballadora

paula.castro — Fri, 21 Oct 2011 16:50:54 +0200

Ao comezo do acto, o secretario comarcal da CIG de Compostela, Anxo Noceda, afirmou que o problema non é que non haxa recursos económicos, senón a quen se destinan os que hai. Así cuestionou as axudas millonarias á banca, mentres se recortan os salarios e as condicións laborais dos traballadores e traballadoras. “Pola vía pola que se está apostando é por unha concentración da riqueza en cada vez menos mans mentres se lle quita a aqueles que menos capacidade económica temos”.

Do mesmo xeito, denunciou que si existen cartos para financiar o despedimento a través do FOGASA, que paga unha parte das indemnizacións, con cartos dos traballadores e traballadoras.

Noceda sinalou que malia iso, a patronal quere máis, e a CEOE xa está demandando que se reduza a 20 días a indemnización por despedimento aos contratos indefinidos e que o FOGASA sigan pagando unha parte, para que despedir lles saia máis barato.

Xunto a isto, salientou que non hai ningún problema por parte da Xunta de Galiza ou do goberno central para destinar cartos a subvencionar a contratación indefinida, ou sexa, a destinar cartos á patronal, mentres se recortan os salarios dos traballadores/as e dos empregados/as públicos.

O secretario comarcal da CIG de Compostela preguntouse por que no canto de crear unha banca pública que realmente dinamice a economía e apoie os sectores produtivos para que se poida crear emprego, se están dando cartos á banca privada para que siga especulando e mercando débeda pública a xuros elevadísimos cando obtiveron eses cartos a apenas o 1%. “É un roubo”, concluíu.

A concentración que comezou coa ocupación da antiga sede central de Caixa Galicia en Compostela e continuou na entrada principal, contou co apoio dos viandantes que manifestaban o seu respaldo ás demandas dos delegados e delegadas con xestos, parándose a falar ou mesmo sumándose ao acto.

Galería de Imaxes

Suso Seixo proclama, en Lugo, que hai alternativas para parar a ofensiva neoliberal, os recortes e a perda de dereitos laborais

paula.castro — Fri, 07 Oct 2011 20:04:49 +0200

Esta non é a primeira campaña que pon en marcha a CIG para denunciar as políticas neoliberais e provocar a apertura dun debate social que permita pór en cuestión a idea, reiterada até a saciedade polos poderes políticos e económicos, de que a única saída á crise pasa por recortes sociais e laborais.

Na asemblea, Suso Seixo lembrou que a central sindical alertou, desde o inicio da crise, que as medidas que se estaban a adoptar, lonxe de axudar a saír da recesión económica e facilitar a creación de emprego, provocarían que a situación empeorara.

Para Seixo, foron as inxentes cantidades de recursos públicos transferidos á banca, primeiro con achegas directas para a súa recapitalización, e despois permitindo a especulación coa débeda pública, os que abocaron practicamente á quebra a moitos estados.

Por iso asegurou que os problemas económicos no Estado español son consecuencia, fundamentalmente, da débeda privada -que representa o 217% do PIB- e non da pública -que só supón o 65%- e apostou por destinar os recursos públicos a crear unha Banca Pública, para que poidan acceder ao crédito as pequenas e medianas empresas e as familias, no canto de destinalos a recapitalizar á banca privada.

Do mesmo xeito cuestionou que en lugar de mudar as políticas fiscais, incrementando os impostos á banca, ás rendas máis altas, recuperando o imposto de patrimonio e sucesións e rematando coa fraude fiscal e os paraísos, se recorte o gasto público para reducir o déficit. “Segundo os datos dos inspectores de Facenda, a fraude fiscal no Estado español sitúase nos 66.000 millóns de euros, fraude que nun 71% está cometida pola banca e as grandes empresas”, puntualizou.

Por iso, chamou a participar masivamente na mobilización convocada para o vindeiro día 23 de outubro, que sairá ás 12:30 horas da Alameda compostelá.

O persoal do 112 entra en campaña para reclamar da Xunta de Galiza a súa intervención no conflito laboral

paula.castro — Fri, 13 May 2011 13:24:34 +0200

O obxectivo, segundo o Comité de Empresa, é enfrontar aos responsábeis cun conflito que negan continuamente e, ao mesmo tempo, facer ver aos simpatizantes do Partido Popular a irresponsabilidade con que a Xunta xestiona os servizos públicos esenciais do país.

Os traballadores e traballadoras do 112 viñan concentrándose, todos os martes, diante de edificios administrativos da Xunta de Galiza reclamando a intervención de Alfonso Rueda, dado que” tanto Juan José Muñoz, xerente da Axega, como Santiago Villanueva, director xeral de emerxencias, se teñen revelado como absolutamente incompetentes á hora de xestionar a problemática do 112” explican.

Comparecencia parlamentar

Nese sentido acusan a Santiago Villanueva de mentir e de proporcionar “datos falsos” na súa comparecencia no Parlamento de Galiza, o día 19 de abril, para respostar a unha pregunta presentada polo deputado do BNG Alfredo Suárez Canal.

Explican que Villanueva defendeu que todas as peticións dos traballadores tiñan sido resoltas coa adxudicación da contrata a Telemark-Spain e lembran que nesa comparecencia mesmo dixo que ‘se agora hai outras peticións, non foron manifestadas’.

“Do que parece que non quere darse por enterado o Director Xeral de Emerxencias é de que non son "outras peticións", senón as mesmas que nos levaron a manifestarnos na rúa”, explican, engadindo que “ningunha das peticións foi cumprida. Ao contrario: a situación empeorou substancialmente e a hostilidade do persoal da Xunta ao persoal que dá o servizo de atención de emerxencias chega a niveis insoportábeis”.

Mobilizacións en campaña

Os traballadores e traballadoras do 112 son conscientes de que ao PP lle interesa paralizar as mobilizacións durante as eleccións municipais. Por iso aseguran que paralizalas é ben sinxelo: “só é necesario cumprir as promesas que eles mesmos fixeron no seu día, sen que ninguén os obrigase, através de Ruiz Rivas - entón voceiro parlamentar e hoxe candidato á alcaldía de Ribeira - e de Beatriz Mato, actual Conselleira de Traballo. Porén, o PP opta por outra vía, que consiste en seguir incumprindo as súas promesas e dedicarse a tentar laminar e desprestixiar o noso protesto”.

Intensifícase a campaña de promoción para que a folga xeral do xoves sexa un éxito

begonha.carballo — Mon, 24 Jan 2011 14:27:31 +0100

Así, o pasado venres, a CIG de Lugo organizou unha caravana de vehículos polas rúas da cidade da Muralla para dar a coñecer a convocatoria e os motivos que levaron a central sindical a convocar folga xeral. A caravana, que partiu ás 12 do mediodía do local do sindicato, animou a todos os/as lucenses a participar nas manifestacións convocadas pola CIG o mesmo día da folga xeral.

Pola súa banda, a CIG-Mocidade de Ferrol continúa coa campaña de axitación entre os mozos e as mozas da comarca, polo que, alén da asemblea celebrada o día 21, estanse a realizar unha serie de murais por todo Ferrolterra para socializar e mobilización á clase traballadora, especialmente á xente nova. A tal fin, desenvolvéronse asembleas en diferentes centros do ensino, FP e contactouse con diversas organizacións de ámbito xuvenil, que amosaron o seu apoio á folga xeral. Ditos contactos continuarán nos próximos días.

Así mesmo, en todas as comarcas estanse realizando reparto de folletos informativos, asembleas tanto nos centros de traballo como con numerosas organizacións e colectivos sociais, colada de carteis e faixas nos puntos máis visíbeis das vilas e cidades e campaña informativa a través de vehículos con megafonía, facendo un chamamento á participación tanto na xornada de folga como nas distintas mobilizacións convocadas pola CIG o 27 de xaneiro en todo o País en defensa do emprego e contra a regresiva reforma das pensións proposta polo goberno español.

CIG-Ensino inicia unha campaña para pedir a retirada do anteproxecto de Lei de Convivencia e Participación da Comunidade Escolar

begonha.carballo — Tue, 18 Jan 2011 16:55:25 +0100

Para a CIG-Ensino, segundo explicou o seu Secretario Nacional, Anxo Louzao, o feito de terse presentado un proxecto de participación da Comunidade Educativa en período de vacacións, sen consulta previa, con escasa marxe para presentar emendas e sen convocar a Mesa Sectorial “é unha mostra de que non hai interese real ningún en que sirva realmente para o que se enuncia no nome”.

Anxo Louzao incidiu na exixencia da retirada do dito anteproxecto, entre outras razóns, por ter fundamentalmente como intención prioritaria impedir a impartición de aulas en galego, pois as outras cuestións podían regularse sen necesidade de ter rango de lei. Cuestións que, por outra parte, sinalou Louzao, responden realmente a criterios correctivos e represivos e non formativos e educativos, pretendendo xudicializar a vida escolar, en lugar de asentarse no principio de formación integral da persoa.

“É un proxecto de Lei importado do PP de Madrid, de costas á realidade social e ao sistema educativo galego, pois non dá resposta ás necesidades deste. Segue sen recoñecer a importancia e valoración da función docente do profesorado”, aseverou o Secretario da CIG-Ensino.

Ausencia de participación e debate

Dende a Federación insístese en que este anteproxecto está precedido dunha total ausencia de participación e debate, mentres que, pola contra, está “cargada de demagoxia e afán propagandístico”. “O colmo da demagoxia é que se fale de reforzar a autoridade do profesorado nun momento no que se están a suprimir prazas, baixar o salario, impoñerlle tarefas como as gardas antes do horario lectivo ou prohibirlle facer uso do comedor escolar, aínda que sexa pagando”, subliñan.

A este respecto, Louzao remarcou que nunca tan desprezada estivo a profesión docente e sobre todo no que se refire precisamente á participación, pois mesmo se exclúe a súa opinión sobre o currículo, mentres se lle dá esa potestade aos pais e ás nais que, obviamente, carecen da formación axeitada para ese cometido, e que en calquera caso xa teñen hoxe canles de participación como son as ANPAS e os Consellos Escolares.

Para Anxo Louzao é, ademais, tendencioso que só se lles pregunte aos pais e ás nais sobre a cuestión do idioma, cando existen multitude de prexuízos pola falla de normalización e, en cambio, non se consulte aos/ás proxenitores sobre outros aspectos do sistema educativo como é o caso da súa privatización, a pesar de que se teñen desviado 250 millóns de euros para o ensino privado concertado cada ano.

Por iso, para a CIG-Ensino con esta medida só se pretende crear alarma sobre a conflitividade nos centros para reducir a educación a un problema de orde público; problema para o cal se precisan medidas exclusivamente represivas e non se fala de medidas educativas que si servirían para favorecer a convivencia e a mellora do sistema educativo, como é a redución das ratios, incremento de profesorado, dotación de máis profesionais específicos de apoio (orientadores) e outros recursos que nestes momentos están precisamente a sufrir recortes importantes.

Emenda á totalidade

A CIG-Ensino ten presentado unha emenda á totalidade do proxecto, solicitando a retirada do mesmo, que defenderá na reunión do Consello Escolar do vindeiro día 28 de xaneiro. “Consideramos que xa sería o colmo que o máximo órgano de participación da Comunidade Educativa ditaminase en contra desta lei de Participación e Convivencia e que a Consellaría seguise para adiante con total desprezo da opinión deste organismo”, asevera Louzao.

Así, agárdase que a Consellaría retire este anteproxecto, reabra un amplo debate no ámbito do ensino, convoque a Mesa Sectorial e, a partir de aí, se elabore unha verdadeira Lei do Sistema Educativo Galego que dea resposta satisfactoria ás necesidades da educación pública galega que pasan por, entre outras, dotar de profesorado suficiente os centros públicos, reducir o alumnado por aula, incrementar o investimento no ensino público para facer real a igualdade de oportunidades, incrementar os recursos para a atención á diversidade e a educación personalizada e restituír os salarios. “Sería a única maneira de que o alumnado galego teña o ensino que lle corresponde e o profesorado poida desempeñar o seu traballo en condicións satisfactorias. Esta é, e non outra, a autoridade que precisa e demanda o profesorado galego”, subliña o Secretario Nacional.

A CIG-Ensino levará a cabo unha campaña con máis de 1200 asembleas nos centros, recollida de sinaturas, pronunciamentos dos Claustros e non descarta mobilizacións para impedir que, máis unha vez, a Consellaría lexisle contra a Comunidade Educativa en función de intereses partidistas reaccionarios.

A CIG de Ferrol intensifica a campaña de chamamento á participación na folga xeral

begonha.carballo — Mon, 27 Sep 2010 18:47:44 +0200

Seguindo os acordos da última asemblea, a CIG-Mocidade de Ferrol intensificou estes últimos días a campaña de información e mobilización de cara a folga xeral entre a xente máis nova. Así, realizáronse varios murais pola cidade e procedeuse a colar os cartaces da campaña para pórlle cara a crise, que se desenvolve baixo o lema “Que os ricos paguen a crise”. Con estas accións, a CIG busca mobilizar aos mozos e ás mozas na xornada de loita do mércores 29 de setembro.

Ademais, tamén se intensificou a campaña confederal de propaganda estes últimos días coa colación de valos publicitarios por toda a comarca, nas que se fai un chamamento tanto á participación na folga como nas manifestacións convocadas pola central.