Máis de 400 empregados/as da delegación da Xunta de Galiza en Vigo realizaron este mediodía unha concentración de protesta diante do edificio autonómico para amosar o seu rexeitamento aos recortes laborais propostos polo Goberno galego. O vindeiro xoves levarán a cabo concentracións fronte aos centros de traballo e máis adiante convocarán outro fronte ao Marco.

A Sección Sindical da CIG na Axencia Tributaria rexeitou a distribución do complemento de produtividade na AEAT, xa que se basea en criterios arbitrarios e inxustos que favorecen aos altos cargos. Por iso, demandan un cambio no criterio de reparto que permita que as cantidades deste complemento variábel se inclúan nas retribucións fixas. Ademais, sinalan os delegados/as da CIG, coas cantidades destes pluses poderíanse contratar máis traballadores/as para reforzar un servizo tan escaso de persoal como o da Vixilancia Aduaneira.

A CIG-Administración cualifica de “indignantes” as recentes declaracións televisivas do voceiro do Partido Popular, Antonio Rodríguez Miranda, nas que intentaba transmitir a idea de que os empregados/as públicos son uns privilexiados que se están a mobilizar por dereitos dos que non gozan o resto dos cidadáns, “sumándose a campaña do PP que pretende xustificar os recortes aos empregados/as públicos/as e o abandono dos servizos públicos polo gasto que se xera na Administración”.

Representantes de CIG, CCOO, UGT e CSI-F nas diferentes administracións públicas galegas compareceron este martes en rolda de prensa conxunta para anunciar a convocatoria de mobilizacións en contra do Anteproxecto de Lei de Medidas no Emprego Público que prepara a Xunta. As organizacións sindicais realizarán concentracións todos os xoves de febreiro para amosar o seu rexeitamento a estes novos recortes nas condicións laborais e salariais e non descartan convocar folga en todas as administracións se o Goberno galego non retira este decreto.

O Xulgado Social número 1 de Ourense vén de facer pública unha sentenza pola que se condena ao Concello de Viana do Bolo por violación do dereito á negociación colectiva ao tentar impor unhas condicións laborais ao seu persoal sen negociar e á marxe das pactadas no convenio colectivo.

A federación de Administración da CIG reclama publicamente a supresión “inmediata e definitiva” do coñecido como plus de altos cargos despois de que o presidente da Xunta de Galiza anunciase a súa suspensión temporal. Dende a central nacionalista cualifican esta medida de demagóxica e critican que se poña á mesma altura un complemento salarial que un por enfermidade ou accidente non laboral.

A Sección 1 da Sala do Contencioso-Administrativo do Tribunal Superior de Xustiza de Galiza (TSXG) vén de anular parcialmente a RPT (Relación de Postos de Traballo) do Concello de Celanova que leva acumuladas xa varias sentenzas na súa contra. O tribunal considera que a atribución dun tramo fixo no complemento específico “non parte dun exame dos postos de traballo senón dunha suposición infundada” e continúa dicindo que contradí “a obxectividade, como unha das características fundamentais do complemento específico”.