Administración

A Sección Sindical da CIG en Betanzos denuncia que o Concello paralizou a negociación do convenio colectivo

begonha.carballo — Tue, 21 May 2013 18:14:27 +0200

Dende a Sección Sindical da CIG entenden que a finalidade de dilatar esta negociación non é outra que provocar que o persoal laboral do Concello de Betanzos quede sen o seu marco normativo de referencia, o que provocaría en moitos casos unha perda de dereitos, maior precariedade e un maior abismo entre as condicións do persoal laboral e funcionario pola aplicación de diferentes normativas en función do tipo de contrato. “Esta paralización da negociación moito nos tememos que pode supor un dos maiores retrocesos para o persoal laboral por culpa dun goberno empeñado en agravar as diferenzas co funcionariado e que non é quen de dialogar cos seus propios traballadores/as”, denuncian.

Dende a sección sindical da CIG do Concello de Betanzos témese que, no caso de que non se retome a negociación do convenio de xeito inmediato, “quedaremos sen convenio por culpa do goberno municipal e instámolo a que reaccione dunha vez e tome unha actitude responsábel neste tema”. Así, lembran que o propio concelleiro de Persoal, chegou falando de diálogo cos/as representantes dos/as traballadores/as “e logo de case dous anos non foi quen de negociar unha Relación de Postos de Traballo, uns orzamentos nin un convenio cos empregados e empregadas, por non falar das trabas para o acceso á información que lles pon aos delegados sindicais, especialmente aos da CIG, que dificultan o seu traballo dun xeito considerábel”.

Cómpre recordar que recentemente a CIG se viu na obriga de recorrer os orzamentos do ano 2012 pola falta de negociación e que a día de hoxe este recurso está en trámites no Tribunal Superior de Xustiza de Galiza.

A maiores, logo de anos de problemas coa convocatoria e resolución de axudas sociais, en decembro de 2012 o Concello comprometeuse a negociar un novo regulamento de axudas sociais que propiciase unha distribución máis xusta, en función de criterios realmente sociais. Porén, critican dende a Sección Sindical, aínda non foi convocada a Mesa Xeral de Negociación, a pesar de que hai case seis meses o Concello se comprometeu co Comité de Empresa a negociar este tema e mesmo amosou boa predisposición ante as propostas dos traballadores/as. “Meses despois descubrimos de novo que non era máis que unha artimaña e unha mentira para non negociar de novo”.

“Finalmente consideramos esta actitude autoritaria fronte aos representantes dos traballadores e das traballadoras do goberno municipal como unha falta de respecto a todo o persoal laboral e unha clara intención de rebaixalo, unha vez máis, fronte ao funcionariado, e queremos denunciar a preocupante situación da xestión do persoal laboral do Concello de Betanzos alentada pola ineficacia do concelleiro de Persoal, e, por defecto de todo o equipo de goberno”, conclúen dende a Sección Sindical.

Desaloxan da explanada de San Caetano o persoal da Xunta concentrado para denunciar o despedimento de 59 compañeiros/as

paula.castro — Fri, 17 May 2013 11:13:33 +0200

Galería de imaxes

En Compostela a concentración celebrábase no edificio administrativo de San Caetano, onde nese intre se celebraba o Consello. A convocatoria estaba confirmada para as 11:30 horas, con cazolada e asubíos incluídos. Aos poucos minutos de comezar efectivos policiais desaloxaban da explanada interior do recinto onde se adoitan realizar todas as concentracións ás persoas concentradas. A xustificación, que molestaban aos membros do goberno galego que se reunían xusto do lado.

A concentración continuou, con máis ruído se cabe, no exterior, no acceso contiguo ao lugar de onde acababan de ser expulsados para denunciar os despedimentos, a destrución de emprego e o deterioro dos servizos públicos. Unha denuncia que non querían escoitar as/os reunidos en Consello de Goberno.

De feito, alén dos 59 despedimentos, a consellaría de Traballo destruirá 129 postos de traballo que afectarán a servizos sociais tan sensíbeis como Dependencia, centros de atención para discapacitados psíquicos, centros de atención a a maiores dependentes e oficinas de emprego, entre outros.

Xunto a isto alertan das consecuencias que terá a Lei de Emprego Público que pretende aprobar o Partido Popular, que consideran que é a máis agresiva dos últimos tempos ao introduciren elementos de discrecionalidade e arbitrariedade no comportamento da administracións para outorgar destinos, postos e demais.

A Lei contempla tamén a avaliación continua do persoal da administración, introducindo criterios subxectivos de valoración que favorecen esa discrecionalidade na toma de decisións. Un sistema de valoración que xunto cos elementos obxectivos fai depender dos xefes/as a avaliación do esforzo, interese e iniciativa do persoal que verá así condicionada a súa carreira profesional e promoción dentro do sistema de niveis e, en consecuencia, o aumento das súas retribucións, coller un posto ou que as/os removan del.

Para a CIG-Administración isto vai provocar a ‘mansedumbre’ do persoal ao manter a lei o nomeamento a dedo das xefas/es.

A CIG-Administración desmente a Feijoo, que afirmou no Parlamento que só hai obriga de arquivar documentos durante 10 anos

paula.castro — Fri, 17 May 2013 10:25:48 +0200

A CIG-Administración, sector da Autonómica, asegura que a Lei 8 /1995 de Patrimonio Cultural de Galicia di literalmente no seu artigo 77, sobre contido do patrimonio documental, punto 1, que “ Integran o patrimonio documental de Galicia: a) Os documentos de calquera época xerados, conservados ou reunidos no exercicio da súa función por calquera organismo de carácter público existente en Galicia, así como por persoas privadas, físicas ou xurídicas, xestoras de servizos públicos.”

E que o artigo 80.3 afirma que “Baixo ningún concepto se poderán destruír os documentos mentres subsista o seu valor probatorio de dereitos e obrigas das persoas e dos entes públicos.”

O sector da Autonómica especifica ademais que a nivel técnico, se manifesta que os expedientes de contratación (de obras, servizos, asistencia técnica ou de calquera outra índole) están valorados nos arquivos galegos como de conservación permanente e que, polo tanto, “nunca deberán ser destruídos e pasarán a formar parte dos depósitos documentais dos arquivos propios da Comunidade. Nomeadamente o Arquivo Xeral da Xunta de Galicia no Tambre na súa fase administrativa e do Arquivo de Galicia na Cidade da Cultura na súa fase histórica”.

Sinalan que en caso de que se acordase a eliminación de series de documentación xestada pola Administración Autonómica, estas deberían ser avaliadas, identificadas e valoradas por unha Comisión de Avaliación que “desgraciadamente aínda non existe en Galicia”.

Subliñan que se trata de documentación da Consellería de Sanidade dos anos 90 e que o máximo responsábel da documentación en cada departamento, é o Secretario Xeral do mesmo, daquela o propio Feijoo. Por tanto, afirman, “eses documentos teñen que aparecer a menos que el non fixera ben o seu traballo naquel momento”.

A nivel organizativo, observan que este caso debe servir para “mandar unha mensaxe de alarma”, do que pasa coa documentación na Administración Autonómica. “Contamos cun grupo de arquiveiros, minimizado, cunhas condicións de traballo paupérrimas que non poden chegar a todas as consellerías e que non dan abasto”. A non-nata Lei de Arquivos –Galiza é a única comunidade que non a ten-, contemplaba que houbera persoal técnico suficiente en cada Consellería, pero non se aprobou, porque consideran que non interesaba que o control da documentación saíse da esfera política cara a esfera funcionarial. “Era mellor contentarse con empresas de mudanzas varias, persoal funcionario sen coñecementos pero adscrito ao arquivo, almacenamento masivo, ou simplemente deixar que se perderan e apodrecesen os papeis “non fora que houbese algo malo neles”.

A Xunta celebra o ‘Día da Familia’ mandando á rúa a 59 traballadores/as da administración

paula.castro — Thu, 16 May 2013 09:24:07 +0200

“A Xunta prefire gastar os cartos que detrae dos servizos públicos nun vídeo casposo e retrógrado, con ese arquetipo de familia “Cuéntame”, pobre pero feliz, inculcando as mesmas mensaxes coas que o telexornal nos ilumina cada día”, denuncian.

O sector da Autonómica fai un percorrido polas mensaxes que deixa o video da Xunta para explicar as políticas da Xunta:

NON GASTAR MÁIS DO QUE SE TEN. “E para iso nada mellor que che leve de vacacións, pola cara, o teu amigo narcotraficante, a sitios onde había neve pero dos que nin te lembras”.

DAR MÁIS A QUEN MÁIS O NECESITA. “Privatizando e amortizando prazas nos Centros de discapacitados e nos centros de maiores, pechando centros de saúde, subindo as matrículas universitarias...”

CENTRARSE NO VERDADEIRAMENTE IMPORTANTE. “O déficit, evidentemente, que nos aplaudan os señores da troika, aínda que aquí medre a miseria e o paro”.

TEMOS O MELLOR MODELO DO QUE APRENDER... AS FAMILIAS GALEGAS. “Pero de que familias nos falan? das mesmas que están machacando? E onde quedan as familias monoparentais, por exemplo?”

NON FACEMOS NADA QUE TI NON FARÍAS. “Isto xa é o “non vai máis”, pero que rostro ten esta xente!!! Quitarnos as extras é algo que ti mesmo te farías a ti mesmo, propoñemos que o seguinte recorte se faga de xeito voluntario, incentivando ao conxunto de empregadas e empregadas públicas a baixarse o soldo de xeito optativo, incluso na cantidade que valoremos, todos e todas, canto nos sobra e canto podemos aportar para saír desta crise que nos merecemos, por non ser, todos e todas, unha familia perfecta. PD: E non vale levar os cartos para Suíza ou cobrar en sobre.

Por certo, todo este spot do que a Xunta do PP entende como unha familia galega ideal vai aderezado cunha pastelosa canción no idioma propio das familias galegas: o inglés”.

O persoal do CAMF-Imserso de Ferrol suspende o peche semanal para facelo coincidir co aniversario do centro

begonha.carballo — Wed, 15 May 2013 11:26:24 +0200

A diferenza das xornadas anteriores, na asemblea que celebraron ás 14:00 horas, decidiron suspender o peche que estaba iniciado para trasladalo á xornada de celebración do aniversario que se vai realizar este xoves, 16 de abril.

“Durante a xornada de celebración, as traballadoras e traballadores do centro, acompañados por algúns residentes manifestarán abertamente a súa desconformidade coas políticas de recortes que en materia de persoal se están a realizar, causando graves prexuízos tanto para o persoal que traballa no centro como para o persoal que reside ou recibe atención nel”, denuncian dende o Comité.

Concentración contra as amortizacións, despedimentos, deterioro dos servizos públicos e as condicións laborais na administración

paula.castro — Tue, 14 May 2013 15:19:18 +0200

No DOG deste mércores 17 de maio agárdase a publicación da RPT pola que 59 traballadores e traballadoras do sector público engrosarán as listas de desemprego. A isto hai que engadir os 129 postos de traballo que destruirá a consellaría de Traballo e Benestar e que afectarán a servizos sociais tan sensíbeis como Dependencia, centros de atención para discapacitados psíquicos, centros de atención a a maiores dependentes e oficinas de emprego, entre outros.

Para denunciar os despedimentos de compañeiros e compañeiras, a destrucción de emprego e dos Servizos Públicos Galegos se concentraba este martes empregados e empregadas da Xunta de Galiza. Por iso e para manifestar tamén a súa oposición á Lei de Emprego Público que pretende aprobar o Partido Popular.

Fernando García, responsábel do sector da Autonómica da CIG-Administración explica que é “unha conxunción de elementos” e que a Lei de Orzamentos xunto coa Lei de Emprego Público supoñen “un paso para devastar a administración pública”. De feito atribúe á efectivización destas leis os despedimentos que se producirán en breve.

García alerta de que a Lei que vén é aínda máis agresiva que a de orzamentos ou a de Medidas porque “alén de recoller todos os recortes introduce elementos de discrecionalidade e arbitrariedade no comportamento da administracións para outorgar destinos, postos...”. Elementos regresivos que, asegura, “van levar a que esta administración sexa como nos anos 50”.

Entre outros salienta a pretensión de introducir a avaliación continua do persoal da administración que alén de conter elementos obxectivos, recolle outro que considera “alarmante”. Explica que en diante as empregadas e empregados públicos, tanto para poder ter carreira profesional e promoverse dentro do sistema de niveis, como para o aumento das retribucións ou para coller un posto e que as/os removan del, estarán sometidas/os a un elemento completamente subxectivo “que é que o teu xefe valore o interese, esforzo e iniciativa”.

Denuncia que isto, “ante un panorama no que todos os xefes son nomeados a dedo segundo esta lei”, vai ser un elemento que introducirá a “mansedumbre” na administración e que “todo o mundo vai ter que sorrir ao xefe e levarlle o café porque vai ter medo a como poderá repercutirlle na súa carreira”. Unha situación que define como “cuartelaria” e que se recolle nunha lei que pretenden presentar como semimoderna.

Concentración este martes en San Caetano contra a amortización de 129 postos de traballo e o despedimento de 59 traballadores/as

paula.castro — Mon, 13 May 2013 17:16:34 +0200

As centrais sindicais denuncian que, nos vindeiros días, 59 traballadores e traballadoras do sector público van engrosar as listas de desemprego, “porque así o quere a Xunta de Galiza”. Xunto a iso alertan de que a consellaría de Traballo e Benestar destruirá 129 postos de traballo nos Servizos Públicos do noso país en temas tan sensibles para a sociedade galega como é a Dependencia, os centros de atención para discapacitados psíquicos, centros de atención a a maiores dependentes, oficinas de emprego, etc.

Denuncian ademais que o presidente da Xunta e o seu gabinete, están preocupados “unicamente en cumprir coas directrices da troika en canto a cumprimento do déficit, pago da débeda e, sobre todo, desaparición ou privatización de Servizos Públicos esenciais para a cidadanía” e alertan de que se vai proceder a un recorte brutal nos servizos sociais “sen importarlle nin o máis mínimo a repercusión que pode ter esta machada”.

Aseguran que a única pretensión da Xunta é cadrar un orzamento “impecábel”, suprimindo emprego público para aforrar cartos. Porén consideran que, “dun punto de vista social, e mesmo de sensibilidade coa parte máis débil da cidadanía (dependentes, discapacitados, maiores, etc.) é totalmente rexeitábel e mesmo desprezábel facer este tipo de políticas. Sobre todo cando se lles enche a boca ao mesmo tempo falando de políticas de emprego e botándolle a culpa aos elementos, como se o alto índice de paro non fora con eles”.

Ante esta situación fan un chamamento á sociedade galega para que rexeite este tipo de políticas, estes recortes brutais, e tamén ao colectivo de empregadas e empregados públicos para que se sumen á concentración convocada para este martes, manifestando así o seu rexeitamento “aos despedimentos dos nosos compañeiros e compañeiras e contra a destrución de emprego público e dos Servizos Públicos Galegos”.