Foron necesarios 47 días de folga (os últimos 36 de folga indefinida), manifestacións, concentracións, peches e onte máis de 7 horas de xuntanza para que as traballadoras e traballadores de instalacións deportivas puideran acadar o seu principal obxectivo: asinar un convenio que os permita chegar a ser mileuristas no ano 2012. A CIG-Servizos manifesta a súa satisfacción tras asinarse este acordo que pon fin a un dos conflitos máis duros dos vividos no sector.

Na xuntanza celebrada na tarde deste luns 22 de febreiro, no Consello Galego de Relacións Laborais, a patronal de instalacións deportivas non se dignou sequera a presentarse, ignorando mesmo a chamada da administración se sentar nunha mesa para intentar reconducir o conflito. Os representantes dos traballadores/as consideran que con este plantón a patronal constata o seu desprezo por calquera caste de negociación e o tipo de empresarios que  a compoñen. Os representantes dos traballadores anuncian que continuarán as mobilizacións.

CIG, CCOO e UGT exixen da conselleira de Traballo, Beatriz Mato, que cumpra co compromiso adquirido cos traballadores e traballadoras de instalacións deportivas o pasado venres, día 12 de febreiro de mediar –recollido polos medios de comunicación- para que a patronal retome as negociacións e se dea unha saída ao conflito. Mentres, os traballadores e as traballadoras continúan coa folga, que no décimo sétimo día de paros volveu rexistrar un amplísimo seguimento, e levaron a cabo novas mobilizacións e concentracións en diversos puntos do País para reclamar ao empresariado un convenio galego digno.

A federación de Banca da CIG pediu, o pasado venres día 12 de febreiro, na xuntanza da Mesa Negociadora do II convenio de Contact Center (antes telemarketing), unha suba lineal de 540 euros e que se cumpra a pactada no anterior convenio, do 2,25%, incluíndo unha cláusula que non obrigue aos traballadores/as do sector a devolver diñeiro se a sentenza do Tribunal Supremo fose favorábel ás empresas. Alén diso, denunciou a outros sindicatos que “protestaron” polo impago e agora piden subas do 1% para este ano, mentres que nas súas plataformas volven ligar o salario ao IPC.

Os traballadores e traballadoras de instalacións deportivas, en folga desde hai case dúas semanas, acordaron na asemblea celebrada este venres en Compostela, non aceptar a condición de suspensión da folga, tal e como pide a patronal para retomar as negociacións- mentres non teñan garantías claras de que as súas demandas serán recollidas no convenio. Pola súa banda a conselleira de Traballo, Beatriz Mato, comprometeuse publicamente a mediar coa patronal para darlle unha saída ao conflito.

A negativa de Urbaser, concesionaria da limpeza viaria e da recollida do lixo no Concello de Ourense, a asinar o convenio de 2009 motivou que o 99% do persoal acordase en asemblea secundar unha folga de 24 horas, que se estenderá desde as 06:00 horas do 4 de xaneiro até a mesma hora do día posterior.