O consello da sociedade Pequeños y Medianos Astilleros en Reconversión (Pymar) decidiu por ampla maioría adherirse ao convenio de Vulcano, o que abre unha porta á supervivencia do estaleiro vigués, que evita deste xeito ter que ir á liquidación da empresa. O acordo contempla a quita do 80% da débeda do estaleiro con sede no barrio de Teis.

O Xerente do Consorcio Galego de Servizos de Igualdade e Benestar, nunha reunión coas delegadas e delegados, anunciou a integración do organismo na Axencia Galega de Servizos Sociais. O proceso de integración faríase en dúas fases: primeiro os Servizos Centrais e as Escolas Infantís (Galiñas Azuis) e, despois a Área de Benestar. A CIG denuncia que todo isto está previsto que se faga sen garantir, en ningún momento, os postos de traballo do persoal do ente, unha vez finalizado o proceso de integración.

As traballadoras/es da sanidade privada da provincia de Pontevedra acordaron desconvocar unha das tres xornadas de folga que anunciaron recentemente para protestar polo bloqueo nas negociacións do convenio de Hospitalización e Internamento. A decisión adoptouse despois de que se retomasen as conversas a a patronal retirase a proposta de suprimir a paga de vinculación, o que supoñía a perda duns 1.000 euros anuais para cada traballador/a. Con todo, manteñen os paros previstos para os vindeiros días 18 e 25 de xaneiro.

Arredor de 400 traballadoras/es da sanidade privada percorreron esta tarde as rúas de Vigo para denunciar o bloqueo nas negociación do convenio colectivo das clínicas privadas de hospitalización e internamento da provincia de Pontevedra. Ao remate da manifestación anunciaron a convocatoria de tres xornadas de folga para denunciar a actitude da patronal.

Delegados/as da CIG pecháronse esta mañá na sede central do Consorcio Galego de Igualdade e Benestar (Galiña Azul, I+B, Centros de Día, Servizos centrais...) en demanda, entre outros, da aplicación do convenio colectivo único para o persoal laboral da Xunta de Galiza. O peche, que comezou contra as 12:00 horas, mantívose até que foron recibidos polo xerente do organismo. Tras da xuntanza, na que participaron as/os representantes das/os traballadoras/es xunto a representantes da CIG-Ensino e CIG-Administración, deron por finalizada a concentración. O xerente comprometeuse a iniciar unha negociación, como moi tarde en xaneiro.

A CIG-Construción suspendeu este mediodía a protesta que mantiña paralizadas dende onte as obras do novo hospital de Vigo despois de que se acordase a creación dunha comisión de seguimento que velará polo cumprimento das condicións de traballo. A decisión adoptouse no transcurso da xuntanza mantida a petición da central nacionalista coa Inspección de Traballo e as empresas que executan os traballos e foille trasladada aos traballadores/as nunha asemblea celebrada a pé de obra.

Diante das noticias a respecto da convocatoria trasladada por Emalcsa aos responsábeis de Valoriza Auga para tratar o conflito laboral, os traballadores da empresa de limpeza de sumidoiros solicitan da xestora municipal de augas que tamén dea resposta á súa solicitude e manteña unha xuntanza coa parte social. O persoal volve reclamar á convocatoria da reunión solicitada hai máis de quince días co Director Xerente de Emalcsa e co Alcalde da Coruña, e que polo de agora aínda non recibiron contestación.