O venres 4 de marzo realizouse diante da Galería de Sargadelos en Lugo unha concentración convocada polos oito despedidos/as na fábrica de Cerámica de Cervo. Coa concentración, que contou co apoio das delegadas da CIG no Comité de empresa, así como de membros das Executivas Local e Comarcal, quérese chamar a atención sobre a situación destes traballadores e traballadoras e reclamar da empresa “unha solución, que pasaría pola negociación e a readmisión”.

Traballadoras e traballadores da Fábrica de Cerámica de Sargadelos de Cervo, acompañados dunha representación da CIG de Lugo-A Mariña, desprazáronse este mércores a Lugo para rexistrar no edificio administrativo da Xunta de Galiza as máis de 5.000 sinaturas recollidas en demanda da readmisión dos oito compañeiros/as despedidos, tras a aprobación dun ERE no mes de setembro.

A CIG presentou o xoves 28 de outubro, no portelo único do Concello de Cervo, o recurso de alzada contra a resolución da Delegación de Lugo da Consellería de Traballo pola que se aprobou o ERE de extinción de 26 empregos na fábrica de Sargadelos. Coincidindo co rexistro do recurso, desenvolveuse unha concentración diante das portas do Concello en demanda da readmisión das e dos traballadores despedidos e a prol do comezo dunha nova negociación coa dirección de cara a procurar solucións de futuro para a histórica cerámica.

A CIG realizou o xoves 21 de outubro, ás 18:00 horas, unha concentración diante da Fábrica de Cerámica de Sargadelos para, aproveitando que se estaba a celebrar unha xunta de accionistas da empresa, facerlles entrega dun escrito no que se demanda a readmisión das compañeiros e compañeiros despedidos e á volta á negociación, a fin de buscar unha solución de futuro para a empresa.

Arredor dunhas 500 persoas participaron na tarde deste luns na manifestación convocada polo Comité de empresa en contra dos despedimentos na fábrica de Sargadelos en Cervo. A marcha, saíu dende a fábrica de cerámica sobre as 18:00 horas e logo de percorrer as rúas de Cervo, pasando polo Concello, rematou novamente diante das instalacións da empresa.

Os membros do Comité de Sargadelos da CIG veñen de rexeitar a actuación da dirección empresa, quen está a incumprir os acordos saídos da negociación do expediente de regulación temporal polos que a cerámica se comprometía a non realizar ningún despedimento e a retomar o servizo de comedor nas mesmas condicións tras o remate de vixencia do ERE. Non obstante, a dirección de Sargadelos vén de despedir a un traballador, afectado polo expediente, así como de externalizar os servizos de comedor.

As traballadoras e os traballadores da fábrica de Sargadelos en Cervo volveron concentrarse á hora do xantar diante do comedor das instalacións para protestar pola decisión unilateral da empresa de pechar este servizo. Arredor dunhas 40 persoas participaron na “sentada” para denunciar a medida adoptada pola empresa que incumpre deste xeito o acordado no expediente de regulación de emprego.