A CIG de Pontevedra homenaxeou onte os afiliados e afiliadas con 25 anos ou máis de compromiso co proxecto sindical nacionalista. Preto dun cento persoas recibiu un pequeno agasallo de mans dos secretarios comarcal e xeral da CIG durante o acto celebrado no salón de actos do Pazo da Cultura.

A Confederación Intersindical Galega volve ser por quinta vez consecutiva a primeira forza en número de representantes na comarca viguesa e no conxunto da provincia de Pontevedra. A central nacionalista obtivo nas eleccións sindicais celebradas recentemente na comarca un total de 1.481 delegados/as (o 32,58%), mentres que no conxunto da provincia sumou 2.096 representantes (31,47%).

A CIG denuncia que a falta de vontade política da Xunta de Galiza fai practicamente imposíbel o mantemento de 150 empregos nas plantas de Vilaxoán e Ribadumia da conserveira Alfageme. Dende a central nacionalista sosteñen que as traballadoras séntense enganadas polos responsábeis autonómicos despois de que apoiasen publicamente a venta da empresa a un grupo cántabro cando dous días antes o Igape comunicoulle ao xulgado que non se faría cargo do importe dos avais, requisito imprescindíbel para facer posíbel a operación.

Máis de 200 delegados e delegadas da CIG de Pontevedra percorreron este mediodía o centro da cidade en manifestación para rexeitar a nova reforma laboral do Partido Popular e chamar á veciñanza a loitar na defensa dos seus dereitos sumándose á folga xeral convocada pola central nacionalista a finais de marzo. Antes da mobilización, que rematou diante da Subdelegación do Goberno español, tivo lugar unha asemblea na que se analizaron as últimas medidas económicas impostas contra a clase traballadora e que ataca dereitos básicos da maioría social.

Un grupo de traballadoras de Alfageme pechouse esta mañá nas dependencias da Xunta de Galiza en Pontevedra para reclamarlle ao Igape que negocie a liberación dos avais da conserveira para posibilitar a cancelación das débedas coas entidades acredoras. Arredor das 15.00 horas decidían abandonar a protesta despois de que o director do Igape se comprometese a retomar as negociacións cos bancos.

A Confederación Intersindical Galega volveu acadar moi bos resultados nas eleccións sindicais celebradas na compañía pontevedresa Vertifil Industrial, dedicada ao sector téxtil e con sede en Moraña. A CIG obtivo catro representantes no comité de empresa, mentres que a UGT só sumou un delegado/a.

A CIG convoca concentracións solidarias coincidindo cos xuízos contra dous compañeiros da federación de Servizos. Os actos de apoio terán lugar o vindeiro mércores 18 de xaneiro diante dos xulgados da Coruña e Pontevedra unha hora antes do inicio das sesións, fixadas para as 11.00 e 12.00 horas respectivamente. A central nacionalista vén de poñer en marcha unha campaña baixo o lema “Defendérmonos como clase é un dereito, non un delito” coa que se pretende denunciar a represión policial e xudicial que sofren moitos e moitas militantes pola súa actividade sindical.