A FGAMT-CIG de Lugo e o Comité de Puleva Food na planta de Nadela reclamaron á empresa que achegue información a respecto da venda das catro fábricas da compañía á francesa Lactalis e como vai afectar esta operación aos 112 traballadores/as de Galiza. Dende a CIG de Lugo subliñan que esta venda deixa patente, unha vez máis, a situación de dependencia de empresas foráneas á que está sometida o sector primario galego (que en Lugo ten un especial peso).

Unhas 50.000 persoas participaron nas mobilizacións conxuntas convocadas polo Sindicato Labrego Galego, UU.AA, XX.AA.e a Asociación Galega de Cooperativas Agrarias (Agaca) en 14 cabeceiras de comarca para exixir unha solución á grave crise que atravesa o sector, garantías do mantemento dos posto de traballo e do futuro do sector leiteiro. A central nacionalista participou solidariamente nalgunha das manifestacións desenvoltas entre as 12:00 e as 14:00 horas do 8 de maio, mentres que o secretario xeral da CIG, Suso Seixo, estivo presente na protesta de Arzúa.

A CIG de Lugo vén de amosar o seu total rexeitamento ao anuncio de Leche Pascual de pechar a factoría de Outeiro de Rei. Dende a central consideraron “intolerábel” que unha empresa que “estivo a ter beneficios multimillonarios nos últimos anos peche deste xeito o seu centro de traballo, deixando na rúa a 155 traballadores”, mentres noutras plantas do Estado estase incrementando o cadro de persoal. Así mesmo, a CIG de Lugo esixiu ás administracións locais e galega que tome as medidas oportunas “para evitar esta desfeita”.

A central sindical nacionalista apoia as mobilizacións convocadas polos sindicatos agrarios (SLG, UU.AA, XX.AA.) e a Asociación Galega de Cooperativas Agrarias (Agaca), para o vindeiro 8 de maio nas principais comarcas gandeiras galegas, en defensa do emprego e do futuro do sector lácteo. A CIG chama á participación nas mobilizacións que terán lugar entre as 12 e as 14h do vindeiro venres en Melide, Arzúa, Betanzos, Vimianzo, Ordes, Santa Comba, Chantada, Ribadeo, Sarria, Meira, Palas de Rei, Vilalba, A Estrada e Pontevedra.