Pais e nais, estudantes e docentes iniciaron hoxe luns día 21 un peche no Instituto de Educación Secundaria San Tomé de Freixeiro de Vigo para esixir da Consellaría de Educación que non aplique no noso país ningún dos recortes que recolle o RD Lei 14/2012 ou que o recorra por invadir as competencias que en materia educativa ten a Xunta. O peche, promovido pola Plataforma Galega en Defensa do Ensino Público, iniciouse ás 16.00 horas e está previsto que remate ás 9.00 horas do martes 22.

Máis de 10.000 persoas manifestáronse hoxe polas rúas de Vigo convocadas polos tres sindicatos maioritarios da comarca -CIG, CCOO e UGT- para reclamarlle a Xunta e Goberno español “medidas urxentes” que permitan salvar o sector naval. En concreto, apostan polo desbloqueo do tax lease, pola recuperación do sistema de crédito e avais ás empresas e polo apoio a equipos humanos e financeiros con capacidade real de xestión.

Vigo foi escenario hoxe dunha nova edición do Correlingua, actividade lúdico-educativa de reinvindicación da lingua galega organizada pola Asociación Socio-Pedagóxica Galega, a CIG–Ensino e a Mesa pola Normalización Lingüística xunto cos Concellos de Lugo, Ourense, Pontevedra e Vigo. Arredor de 1.500 rapaces e rapazas percorreron as rúas da cidade antes de rematar no parque de Castrelos, onde tiveron lugar as actuacións musicais e as actividades lúdicas para os máis pequenos.

A CIG de Vigo e a de Ourense aproveitaron esta fin de semana para homenaxear os seus afiliados e afiliadas con 25 anos ou máis de compromiso co proxecto sindical nacionalista. Na cidade olívica máis de 300 persoas recibiron un pequeno agasallo de mans do secretario xeral da CIG, mentres que no caso de Ourense foron homenaxeadas arredor dun cento.

Un grupo de traballadores e representantes sindicais do naval de CIG, CCOO e UGT pechouse hoxe nas dependencias da Xunta en Vigo para esixir información sobre a reunión entre o comisario europeo da Competencia e o ministro de Industria español. O encerro, co que pretendían forzar á delegada do Goberno galego na provincia a recibilos, rematou co desaloxo e a identificación dos participantes na protesta por parte da Policía española.

Arredor de medio cento de traballadores/as participaron hoxe na concentración convocada polo comité do Grupo AMS diante da sede da empresa en Vigo para rexeitar o despedimento de 10 compañeiros. A protesta, que terá continuidade nos vindeiros días desenvolveuse entre as 18.00 e as 20.00 horas no polígono do Freixo, en Sárdoma.

A titular do Xulgado do Penal número 2 de Vigo decidiu atender a petición da Fiscalía e da defensa e adiou o xuízo contra o secretario confederal de Negociación Colectiva da CIG, Antolín Alcántara, que está acusado de desordes públicos e danos durante a ocupación da estación marítima da cidade na folga do metal en 2009. Centos de persoas concentráronse ás portas do edificio xudicial para amosar a súa solidariedade co representante sindical e rexeitar a petición de catro anos de cadea.