O martes 29 de novembro celebrábase en Vigo a primeira das asembleas convocadas pola CIG-Banca co persoal de Novagalicia Banco. Unha xuntanza na que se acordou pór en marcha unha campaña que inclúe mobilizacións para facer fronte ás ameazas de despedimentos e aos traslados opacos que entenden que perseguen que o persoal acabe por marchar con baixas incentivadas.

Axentes forestais de toda Galiza reuníanse, o pasado venres, nunha multitudinaria asemblea para debater sobre o acontecido durante a última vaga de lumes, valorar as súas condicións laborais e presentar un escrito asinado por todas as organizacións sindicais, recollendo as súas principais demandas. Mentres se celebraba esta xuntanza, a consellaría de Medio Rural publicaba na súa web unha nota informativa respecto dos avances do diálogo aberto. Diálogo que a CIG denuncia que é inexistente.

Proseguindo co calendario de actos enmarcados na campaña “Si, existen alternativas. En defensa do emprego e dos servizos sociais”, a CIG de Ferrol celebrou unha asemblea aberta na tarde do mércores na que participou tamén o Secretario Xeral da central nacionalista. Seixo demandou un cambio nas políticas fiscais, que debe pasar por máis impostos para as rendas máis altas e a persecución da fraude e dos paraísos fiscais, ao tempo  que criticou o recorte do gasto social e do investimento público nun momento no que este é a única vía para xerar emprego e reactivar a economía

A CIG apostará por continuar coas mobilizacións en defensa do sector naval da Ría de Vigo a partir do mes de setembro. Delegados/as da central nacionalista nas empresas do sector tamén debatiron en asemblea a posibilidade de convocar unha folga xeral na comarca para esixirlle aos Gobernos español e galego unha solución á grave crise que atravesa unha industria fundamental para a economía do país.

Delegados e delegadas do naval da CIG analizarán este xoves en asemblea a situación do sector na Ría de Vigo. A xuntanza servirá tamén para compartir información sobre o estado no que se atopan moitas das empresas e decidir as próximas mobilizacións para reclamar unha solución á grave crise que atravesa unha industria fundamental para a economía do país. A cita é nos locais do sindicato na cidade olívica a partir das 17.30 horas.

Centos de delegados e delegadas da CIG saíron hoxe á rúa en Vigo, A Coruña e Ferrol no marco da campaña que a central está a desenvolver en todas as comarcas do país en defensa do emprego e contra a reforma do sistema público de pensións. As mobilizacións tiveron lugar despois das asembleas organizadas para valorar a folga xeral do pasado 27 de xaneiro, analizar o pacto social entre Goberno e sindicatos españois e abordar a convocatoria de novas mobilizacións, entre as que non se descarta unha manifestación en Madrid en abril, coincidindo coa tramitación parlamentaria da reforma das pensións.

O xoves 9 de setembro, enmarcado na campaña de accións previas á convocatoria de folga xeral do vindeiro 29 de setembro, a CIG-Mocidade iniciará en A Coruña a rolda de asembleas por todo o País de cara a configurar unha resposta da xente máis nova do sindicato fronte ás medidas regresivas adoptadas polos gobernos. Os encontros rematarán o próximo mércores e servirán de antesala para a xornada de mobilización nacional que a CIG-Mocidade desenvolverá o 17 de setembro en todas as comarcas.