Delegados e delegadas da CIG-Banca realizaron na mañá deste luns unha manifestación polas rúas da Coruña en rexeitamento ao proceso de reconversión do sector financeiro, impulsado polo Goberno estatal co apoio do PP, e a prol dun convenio xusto para os traballadores e traballadoras de bancos e caixas. Este proceso de reestruturación, advertía o Secretario Nacional da Federación de Banca durante a mobilización, está a supor a desaparición das entidades financeiras galegas e, polo tanto, implica a perda de capacidade de decisión, mais tamén pon en perigo a continuidade de miles de empregos en Galiza.

Por segundo martes consecutivo delegados e delegadas da CIG-Banca concentráronse diante da oficina principal do Banesto en Ourense para protestar polo traslado do Presidente do Comité de Empresa e delegado da CIG para unha oficina nas aforas de Ourense, establecéndolle ademais un control diario sobre a súa actividade. Posteriormente a protesta trasladouse ao interior da entidade para informar ao persoal da oficina.

Delegados e delegadas da CIG-Banca realizaron o 11 de febreiro unha concentración na sucursal do Citibank, na Porta do Sol de Vigo, esixindo da empresa o mantemento dos postos de traballo e o respecto aos traballadores e traballadoras de Citifin. Durante os últimos meses, a empresa abriu un proceso de negociación coa representación sindical no que pretendía obter o visto bo para o desmantelamento da financeira. A CIG rexeitou a intención da empresa e o preacordo ao que chegaron os sindicatos estatais CCOO e UGT coa entidade, para desfacerse practicamente de todo o persoal a través de prexubilacións e baixas incentivadas. Preacordo que foi rexeitado polos traballadores/as.

O día 11 de febreiro a CIG volveu saír á rúa, en Vigo e Lugo, para denunciar os acordos de “flexibilidade horaria” que están impoñendo os grandes bancos coa complicidade de CCOO e UGT. Acordos que rematan coa xornada regulada, dando paso ao traballo por obxectivos. Estes acordos consagran a impunidade para realizar milleiros de horas extras, que impiden a conciliación da vida laboral e persoal dos traballadores e traballadoras.

Con ilusión e esperanza recibían as traballadores e os traballadores de Montoto na mañá deste mércores 30 de decembro a noticia de que todas as entidades financeiras ían dar finalmente o seu apoio ao plano de viabilidade desta empresa do Deza. Non obstante, dende a CIG xa se advertiu que se vixiará atentamente todo o desenvolvemento do proxecto, especialmente no que atinxe ao mantemento do persoal e a progresiva incorporación de traballadores/as.

A nivel internacional e estatal hai aberto un debate para limitar os excesivos salarios dos banqueiros, un debate máis que necesario a nivel galego, como demostran os desmedidos salarios dos altos directivos de entidades bancarias que están recibindo subvencións públicas. A CIG-Banca indica que ese é o caso de Caixa Galicia, entidade que por outra parte "está pechando centros de traballo, reducindo persoal e que implantou un réxime laboral baseado no terror".

Medio cento de delegados e delegadas convocados polo Comité de Empresa de Caixa Galicia na provincia de Ourense concentráronse ante a Oficina Principal da Entidade en contra do peche de oficinas e pola defensa dos postos de traballo. Dende o Comité denuncian que no vai que de ano Caixa Galicia anunciou o peche total, parcial ou temporal de 9 centros de traballo, así como novos posíbeis peches para o segundo semestre de 2009.