Confederal

Un total de 26 organizacións políticas, sociais e culturais de Galiza asistirán como convidadas ao VI Congreso da CIG

paula.castro — Thu, 23 May 2013 12:50:51 +0200

As organizacións galegas que xa confirmaron a súa asistencia son:

- Consello Galego de Relacións Laborais

- Bloque Nacionalista galego

- ANOVA-Irmandade Nacionalista

- Movemento pola Base

- Compromiso por Galicia

- Nós-UP

- Galiza Nova

- Comités

- Liga Estudantil Galega

- FRUGA. Federación Rural Galega

- Sindicato Labrego Galego

- Fundación Galiza Sempre

- Fundación Castelao

- Fundación FORGA

- Fundación Moncho Reboiras

- Fundación SOLGA

- Mesa pola Normalización Lingüística

- Plataforma Cidadá Queremos Galego

- AS-PG. Asociación Socio-Pedagóxica Galega

- Asociación de Escritores en Lingua Galega

- Asociación galega de Editores

- IGADI. Instituto Galego de Análise e Documentación

- Organización Galega de Comunidades de Montes Veciñais en Man Común

- ADEGA-Asociación para a Defensa Ecolóxica de Galiza

- Esculca

- Xustiza e Sociedade

Preséntase unha única candidatura á Executiva Confederal acordada polas distintas sensibilidades actuantes na CIG

paula.castro — Thu, 23 May 2013 11:53:08 +0200

Candidatura á Executiva Confederal

1.- Xesús Seixo Fernández.

2.- Elvira Patiño Ogea.

3.- Francisco Xabier Cartelle Pérez.

4.- Manuel Currás Meira.

5.- Miguel Anxo Malvido Cabirto.

6.- Margarida Corral Sánchez.

7.- Anxo Pérez Carballo.

8.- Ramiro Oubiña Parracho.

9.- Xosé Francisco Miranda Vigo.

10.- Antolín Alcántara Álvarez.

11.- Anxo García Torres.

12.- Paulo Carril Vázquez.

13.- Obdulia Diniz Carlos.

14.- Laura Bugallo Sánchez

15. María do Tránsito Fernández Fernández

16. Asunción Castiñeira Fernández

17. Alberte Gonçalves Herrero

18. Francisco Xabier González Sío

19. María Placer Vila Rodríguez

20. Fernando R. Acuña Rúa

21. Susana Riveira Fernández

22. Marta Dacosta Alonso

23. Xesús Anxo López Pintos

24. Dolores Martínez Castelo

25. Xosefa Romero Alvarez

26. Adolfo Martín Naya Fernández

27. María Dolores Rodríguez Vázquez

28. Antonio López Rivera

29. Serafín Otero Fernández

30. Cristina Martínez Padín

31.Cristina López Lobariñas

32. María Esther Vila Vázquez

33. Manuel Domínguez Pereira

34. Concepción Freire Montes

35. Xosé Fernández Piñeiro

36. Rafael Iglesias García.

Organizacións sindicais de Europa, África e América confirmaron xa a súa asistencia ao VI Congreso da CIG

paula.castro — Wed, 22 May 2013 12:14:06 +0200

Xa confirmaron asistencia as seguintes organizacións sindicais:

ELA- Eusko Lagileen Alkartasuna. Euskal Herria

LAB- Langile Abertzalen Batzordeak. Euskal Herria

CSC- Confederació Sindical de Treballadors de Catalunya

IC- Intersindical Canaria

EUROPA

CGTP/IN- Confederaçao Geral de Trabalhadores Portugueses. Portugal

UGT- União Geral de Trabalhadores

CSC- Confederation Syndicale Chretien. Bélxica.

PEO- Pancyprian Federation of Labour. Chipre

SUD- Union Syndicale Solidaria. Francia

FZZ- Forum Zwiazek Zawodowich. Polonia

AMÉRICA

CTA- Central de Trabajadores Argentino. Arxentina

CGT- Confederación General del Trabajo. Colombia

CTC- Confederación de Trabajadores de Colombia. Colombia

CTC- Central de Trabajadores de Cuba

CSN- Confédération des Syndicats Nationaux. Quebec

PIT/CNT- Plenario Intersincal de Trabajadores. Uruguai

UNETE- Unión Nacional de Trabajadores. Venezuela

FS- Força Sindical. Brazil

CTB- Central dos Trabalhadores e Trabalhadoras do Brazil

CUT- Central Única dos Trabalhadores

ÁFRICA

UNTA- União Nacional dos Trabalhadores de Angola

UNTC-CS- União Nacional dos Trabalhadores de Cabo Verde

UGT-SARIO- Unión Xeral de Traballadores de Saguís el-Hamra e R. Sahara Occidental

INTERNACIONAIS

FSM- Federación Sindical Mundial

CSPLP- Confederação Sindical dos Países de Lingua Portuguesa

CIG e BNG coinciden na necesidade de “mobilizar o país” para reclamar políticas alternativas que permitan saír da crise

paula.castro — Tue, 21 May 2013 15:05:50 +0200

En representación da CIG asistiron á xuntanza, xunto co secretario xeral, Suso Seixo, a secretaria confederal de Muller e Mocidade, Margarida Corral, o secretario confederal de Emprego, Antonio López e o secretario confederal de Finanzas, Ramiro Oubiña. Por parte do BNG acompañaban ao portavoz nacional, Xavier Vence, o secretario de Organización, Bieito Lobeira, a secretaría de Implantación Municipal, Goretti Sanmartín, a secretaria de Imaxe e Propaganda, Montse Prado e o secretario de Acción Social, Rafael Vilar.

O BNG presentou á CIG a campaña que está a desenvolver en defensa dun sector financeiro galego que realmente responda aos intereses e a problemática de Galiza, o que Seixo considerou “fundamental no momento no que estamos”, por mor da grave situación de desemprego que hai no país e a progresiva destrución do noso tecido produtivo. “É básico para o noso desenvolvemento no presente e no futuro e para poder saír da crise dunha perspectiva favorábel á maioría social”, sinalou.

A este respecto, o secretario xeral da CIG matizou que é precisamente a destrución do tecido produtivo a que está a provocar a marcha do país de mozos e mozas” moi formados e cunha cualificación e coñecementos fundamentais para axudar a saír da crise económica”. Por iso considerou prioritario facer políticas de emprego distintas e manifestou que a central sindical é “profundamente crítica” coas políticas que se están a facer por parte do goberno central, en gran parte promovidas pola propia UE, porque “non só non están axudando a saír da crise senón que están provocando máis recesión económica e polo tanto máis destrución de emprego”.

A isto engadiu que a CIG tamén é “profundamente crítica” coa actitude da propia Xunta de Galiza que considerou que “non é propia dun goberno galego que nestes momentos tiña que estar exixindo políticas económicas e laborais diferentes”. De feito, acusou ao goberno do PP en Galiza de estar “mirando para outro lado e buscando a quen botarlle a culpa dunha situación na que eles demostran unha total incompetencia para buscarlle saídas”.

Folga comarcal en Ferrolterra

Para o vindeiro día 12 está convocada polas organizacións sindicais na comarca de Ferrol unha folga comarcal á que o BNG anunciou o seu apoio. Unha folga que responde á crítica situación de desemprego –Ferrol ten o maior índice de Galiza- e á parálise do sector naval que, alertou Seixo, “está a piques de desaparecer”.

En todo caso, o secretario xeral da CIG fixo extensiva a súa preocupación á comarca de Vigo, pola crítica situación que atravesa e a alarmante destrución de emprego, nomeadamente industrial, pero tamén ao resto do país porque, dixo, “se imos repasando comarca a comarca a situación é moi similar en todas elas, máis agudizado precisamente nas zonas industrializadas como é o caso de Ferrol e Vigo pero gravísima en toda Galiza”.

Ante isto lembrou que a central sindical ten avaliado que sería necesario facer extensiva a xornada de folga en todo o país “porque a necesidade así o requiría” e adiantou que, nesa perspectiva traballa a CIG, que, de feito “está a procurar que se faga unha convocatoria de semellantes características en Vigo”.

Situación catastrófica

Pola súa banda, o portavoz do BNG, Xavier Vence, cualificou a situación cara a que camiña Galiza como “catastrófica”, tanto por mor da dinámica do sistema produtivo, co peche continuo de empresas, como pola falta dun sistema financeiro “propio e comprometido” co tecido empresarial e económico. Ambas circunstancias que entende que “nos están a levar a unha debacle en termos de emprego e ao país por unha pendente que non pode soportar”.

Ante isto manifestou que o BNG considera necesario “que o país reaccione” e adiantou que ambas as organizacións “estamos plenamente de acordo en mover á cidadanía en toda unha campaña de mobilizacións para reclamar outro tipo de políticas económicas, industriais e financeiras”.

Respecto da folga convocada na comarca de Ferrolterra para reclamar unha solución ao sector naval, manifestou o acordo do BNG de apoiala. Reclamou que se muden “radicalmente” as políticas tanto no que se refire a Europa, ao goberno central e a Xunta de Galiza, para conseguir que Ferrol teña carga de traballo e liberdade para construír barcos.

Do mesmo xeito concordou en facer unha chamada á mobilización tamén noutras comarcas do país “para dar unha resposta desde todos os sectores sociais” e manifestou que desde o BNG “cremos que despois de 5 anos de crise e do fracaso das políticas neoliberais impostas pola troika é necesario erguer alternativas”.

Para iso, explicou, presentaranse alternativas concretas “desde a base dos nosos recursos, do noso aforro, construíndo un sistema financeiro propio que consideramos que debería ser a banca pública galega que sirva para frear o deterioro da economía produtiva e comezar a erguer o país para saír realmente da crise, cousa que as políticas que están en marcha non van conseguir”.

CIG e BNG concretaron ademais unha axenda de temas para seguir afondando nestes aspectos de cara a ofrecer esas políticas alternativas.

A CIG celebrará o seu VI Congreso en Compostela os días 25 e 26 de maio

paula.castro — Mon, 20 May 2013 17:34:14 +0200

O secretario xeral, Suso Seixo, xunto co secretario confederal de Comunicación, Francisco Miranda Vigo, presentaban esta mañá, en rolda de prensa, o VI Congreso da CIG. Dúas xornadas que se desenvolverán no Pazo de Congresos de Compostela e que son, segundo explicou Miranda Vigo, a culminación do proceso de debate iniciado hai meses nas distintas federación e comarcas.

Suso Seixo adiantou que se analizará polo miúdo a actual situación política, económica e social. Neste sentido sinalou que no relatorio de Acción Sindical se analiza en profundidade o momento político e as consecuencias da crise sobre o tecido produtivo e para a clase traballadora, cunha avaliación “moi crítica” das medidas postas en marcha, que “teñen provocado un cada vez maior empobrecemento da poboación en xeral e da clase traballadora en particular”, denunciou.

A CIG fai tamén unha análise detallada dos obxectivos que se pretenden acadar coas reformas das pensións, laboral e da negociación colectiva: por unha banda dificultar e atrasar o acceso ás pensións, ademais de reducir a contía das futuras e, pola outra, provocar unha importante rebaixa dos salarios, explicou.

Xunto a isto, a central sindical analiza o problema dos desafiuzamentos, das preferentes, o problema do desemprego e a necesidade das persoas desempregadas organizarse para facerlle fronte a todas as regresivas medidas que se están impoñendo.

O secretario xeral da CIG subliñou que tamén se recollen, nos documentos congresuais, as alternativas da central sindical, moitas xa presentadas e defendidas con anterioridade, respecto de servizos públicos, contratación ou tecido produtivo, con especial atención ás políticas dirixidas á mocidade e ás mulleres.

“É necesario, é posíbel. Organización, loita, soberanía”.

O lema do Congreso pretende sintetizar, segundo explicou Seixo, as ideas centrais e obxectivos da CIG para estes catros anos. Así sinalou que na súa primeira parte, co “é necesario” preténdese incidir na urxencia de reivindicar outras políticas fronte as actuais e co “é posíbel” aclarar que malia repetirse, de forma sistemática, que só se poden aplicar as políticas decididas pola UE e impostas polo goberno do PP, si hai outras alternativas.

Na segunda parte do lema saliéntase a importancia da Organización, partindo da idea de que “non se pode dar a resposta necesaria a estes ataques con loitas de carácter espontáneo, precísase estar organizados”, e da Loita, porque “os grandes avances da humanidade téñense acadado grazas á loita. En ningún caso desde unha posición desmobilizadora e de pacto social, que sempre viñeron acompañados de cesión de dereitos da clase traballadora”. Respecto da Soberanía, o secretario xeral da CIG explicou que “é preciso termos competencias en políticas fiscais, financeiras e laborais”, para o que cómpre “reclamar o dereito a decidir se queremos saír da crise dunha perspectiva galega e favorábel á maioría social”.

Para o secretario xeral da CIG é preciso construír outro modelo “máis democrático e participativo” para que as políticas se definan desde institucións controladas polo pobo e non desde organismos e institucións como o FMI, o BCE ou a Comisión Europea, afastadas da cidadanía e sen control democrático algún.

En todo caso, para acadar estes obxectivos, a central sindical aposta por mellorar os métodos de traballo, facendo especial fincapé na necesidade de colectivizar e socializar os debates e as alternativas para que haxa unha resposta común. “Hai que mellorar o sindicato para que sexa unha ferramenta o máis eficaz posíbel para dar resposta a esta situación”.

Candidaturas

En resposta ás preguntas das/os xornalistas a respecto das posíbeis candidaturas, Suso Seixo explicou que até o xoves non se pecha o prazo de presentación de candidaturas á Executiva Confederal, Secretaría Xeral e Comisión de Garantías. En todo caso, confirmou que presentaría a súa candidatura á secretaría xeral e matizou que a estas alturas aínda non se sabe se haberá 1 ou 5 candidaturas á Executiva.

Xunto a isto salientou que non sería unha novidade, xa que en Congresos anteriores tamén houbo varias candidaturas e subliñou que, aínda así, o importante é que a central sindical está “moi cohesionada”, como se tira do elevado nivel de consenso acadado nos debates, que deron nuns relatorios de Organización e Acción Sindical que foron respaldados polo 95-96% de representantes nos organismos. Un consenso que se traduce en tan só 2 emendas ao Relatorio de Organización; 12 emendas aos Estatutos e ás modificacións estatutarias e 45 emendas ao Relatorio de Acción Sindical.

HORARIOS

Sábado 25 de maio

9-10 h: Recepción de congresistas e persoas convidadas. Entrega de documentación

10-11 h: Inicio do V Congreso. Benvida a cargo do Secretario da CIG –Santiago. Proxeción audiovisual. Actuación musical Conservatorio Histórico Artístico Santiago.

11-11:10 h: Debate e votación Regulamento Congresual

11:10 -11:50 h: Presentación do Informe de xestión da Executiva Confederal a cargo do Secretario Xeral

11:50-14 h: Debate e votación Informe

14:00 h: Proposta e elección da Mesa Presidencial do Congreso

14:15 h: Xantar

16:30-17:30 h: Presentación, debate e votación do Relatorio de Organización e Estatutos

17:30 -19:30h: Presentación, debate e votación do Relatorio Base.

19:30-20:00 h: Presentación de candidaturas.

20:15:Resolucións

Domingo 26 de maio

10-11:00 h: Votación de cargos e membros de Organismos: Executiva Confederal, Secretaría Xeral, Comisión de Garantías.

11-11:30: Reconto

11:30 - 13:30 h: Clausura

A CIG denuncia que xerar expectativas sobre un posíbel pacto social co PP é “unha fraude” e pide a dimisión do goberno

paula.castro — Thu, 16 May 2013 18:20:27 +0200

Galería de imaxes

Na concentración celebrada en Compostela diante do edificio administrativo da Xunta de Galiza, o secretario xeral, Suso Seixo, cuestionou non só o momento no que se está a promover este novo pacto, senón tamén os resultados obtidos de pactos anteriores. “Sempre provocaron unha importante perda de dereitos para a clase traballadora pola vía de introducir máis flexibilización laboral, empeorar as condicións salariais, promover incentivos para as empresas ou favorecer a contratación temporal”.

Lembrou que, como agora, sempre se recorreu á escusa de que estes acordos permitirían crear emprego cando o certo é que “só favoreceron que as empresas incrementaran os seus beneficios a custo das traballadoras e traballadores renunciar ás súas condicións laborais”. En concreto subliñou o último pacto acadado, que supuxo reformar as pensión e atrasar a idade de xubilación aos 67 anos.

Ante isto afirmou que “é un engano á poboación” e alertou de que o que provocan é a desmobilización, cando nestes momentos, é imprescindíbel facer todo o contrario. “Hai que mobilizarse para exixir outro tipo de políticas, porque é imposíbel pactar medidas favorábeis á maioría social cando é evidente que non hai vontade algunha por parte do goberno, nin da patronal”.

O secretario xeral da CIG asegurou que o goberno non vai retirar as reformas laborais, nin a reforma das pensións, nin reformar o sistema fiscal para que pague máis quen máis ten, nin aplicar medidas que permitan perseguir a fraude fiscal, nin aprobar partidas orzamentarias para facer investimentos públicos na economía produtiva. Por iso considerou que o que se está a vender é “fume” e demandou a dimisión do goberno e a inmediata convocatoria de eleccións para que se mude a correlación de forzas e se poñan en marcha políticas favorábeis, de verdade, á maioría social: á clase traballadora.

A secretaría da Muller da CIG denuncia o ataque “retrógrado” do PP aos dereitos sexuais e reprodutivos da muller

paula.castro — Wed, 15 May 2013 20:14:19 +0200

A Secretaría da Muller da CIG denuncia o “ataque retrógrado” por parte do Partido Popular, contra o dereito de autodeterminación das mulleres, e a propia argumentación exhibida polas súas parlamentarias, incidindo na defensa do que elas chaman sen ningún rigor científico “a vida en formación”, no canto de velar pola vida das mulleres.

Margarida Corral, secretaria confederal de Muller alerta de que “estamos a piques de volver ás interrupcións do embarazo clandestinas, a piques de ser privadas de dispositivos que garantan o noso acceso informado aos métodos anticonceptivos seguros”. Unha situación que considera “inaceptábel”, ao igual que o feito de que non se cubran as prazas nos Centros de Planeamento Familiar e que, pola contra, “utilicen argumentos ideolóxicos para evitar que as mulleres teñamos decisións sobre os nosos corpos”.

Asegura que é ousado “acusar ás mulleres de cometermos asasinatos selectivos, cando nos constatan unha malformación fetal e pretendemos acollernos a este suposto” e pregúntase “onde están os dereitos desas ‘futuras persoas con diversidade funcional’ unha vez que nacen”, logo de acometer un recorte sen precedentes nos servizos sociais públicos e nas prestacións e axudas relacionadas coa lei de dependencia. “Negar a capacidade das mulleres de decidir por si mesmas é un ataque sen precedentes ao noso dereito máis elemental”, afirma.

A secretaría da Muller da CIG denuncia tamén que pretenden volver poñer á muller no papel de tutelada, como suxeitos pasivos que non teñen capacidade de decidir sobre a súa vida, que dependen da autorización dos proxenitores, das parellas, dos consellos hospitalarios ou da obxección de conciencia dos médicos. “Que mesmo teñen menos dereitos ca o do cigoto, embrión ou feto que albergan no seu corpo”, subliña Corral, que proclama que “o aborto non é un delito, é un dereito, que como tal debe abordarse dentro da rede sanitaria pública, e desde logo, fóra do Código Penal”.

Campaña antiabortista

A Secretaria da Muller referiuse ademais á campaña de presión financiada por varias entidades antiabortistas, que baixo o epígrafe #Borraelaborto, veñen de instalar valados publicitarios en varias cidades de Galiza -preto de 150 en 17 cidades do estado español-, á que se sumarán anuncios en televisión e cuñas de radio en varios medios de comunicación, para exixir ao ministro de Xustiza, Alberto Ruiz-Gallardón, que impulse a derrogación da lei do aborto de 2010 e elabore unha nova lei de Aborto Cero.

A este respecto, Corral lembra que a reforma proposta contradí o Tratado Internacional dos Dereitos Humanos, cuestión que foi advertida xa hai preto dun ano polo Comité sobre os Dereitos Económicos, Sociais e Culturais da ONU, instando ao Goberno a garantir o aborto libre e de balde. E exixiu revisar o convenio da Xunta de Galiza con Red Madre para asegurarse de que esta entidade non estea detrás do financiamento desta campaña ultraconservadora.