O Xulgado Social número 1 de Ourense vén de facer pública unha sentenza pola que se condena ao Concello de Viana do Bolo por violación do dereito á negociación colectiva ao tentar impor unhas condicións laborais ao seu persoal sen negociar e á marxe das pactadas no convenio colectivo.

A Inspección de Traballo vén de recoñecer, despois das denuncias da CIG, un caso de acoso laboral a unha traballadora do Consorcio Internacional de Cine, organismo dependente do Concello de Ourense. Dende o sindicato nacionalista advirten que farán un seguimento do caso até que os responsábeis municipais restitúan á afectada en todas as súas funcións e realicen unha avaliación de riscos psicosociais cun protocolo para estes casos.

O número de ourensáns/ás inscritos nas oficinas do INEM a 31 de decembro de 2011 foi de 28.217, o que supón un incremento de 1.737 persoas con respecto ao ano anterior. Dende a CIG denuncian o impacto que o desemprego está a ter especialmente entre a xente nova e critican a ausencia de medidas do anunciado plan Impulsa da Xunta para a provincia.

Dende a CIG-Administración critican a desidia da xefatura territorial da Consellería de Traballo e Benestar de Ourense no que respecta á atención dos centros de maiores. A central nacionalista denunciara o pasado día 7 de novembro que na Residencia do Maior Nosa Señora dos Milagres había varios casos de sarna entre os residentes e os/as empregados/as. “A día de hoxe, e por culpa da deixadez tanto da dirección do centro coma do xefe territorial do departamento autonómico, José Selas, os casos elévanse a máis de 40, dos que máis de 20 son traballadores/as do centro”, censuran. Diante disto, reclaman o cese inmediato do director do centro e do responsábel autonómico.

A Executiva Comarcal da CIG de Ourense amosou o seu rexeitamento ao anuncio da Xunta de Galiza de que vai iniciar a construción dunha incineradora no Irixo ao entender que se repetirá “o fracasado modelo que Sogama implantou en Cerceda”. Denuncian que o custe da instalación será de 230 millóns de euros e que foi adxudicada a dedo a unha empresa que foi beneficiada recentemente no concurso eólico.

A Inspección de Traballo vén de sancionar cunha falta moi grave á empresa Suministros y Áreas de Servicio Ploc (Suarsesa) por vulnerar o dereito á liberdade sindical dun empregado. O Tribunal Superior de Xustiza de Galiza (TSXG) condenara recentemente á compañía que xestiona estacións de servizo de Cepsa en Ribadavia e Ponteareas polo mesmo motivo, decisión contra a que xa non cabe recurso. A sentenza obriga á compañía a devolverlle ao afectado a súa condición de delegado de persoal, cargo que lle foi revogado nunha asemblea que o TSXG considera nula.

A Unión Comarcal da CIG de Ourense reclama a creación dun Xulgado de Violencia de Xénero na cidade ante o aumento das denuncias por maltrato a causa da crise económica e o colapso do Xulgado de Instrución número 3. A central nacionalista alerta que o incremento do paro entre os homes está a traducirse nunha maior conflitividade no fogar e demanda das Administracións un maior compromiso na defensa dos dereitos das mulleres.