Lexislacion

O TSXG condena novamente á Xunta por vulnerar o dereito á folga

paula.castro — Wed, 26 Dec 2012 18:45:00 +0100

En concreto a estimación afecta os mínimos decretados para o Complexo Deportivo de Monterrei; CRTVG, TVG e RAG, servizos de rexistros e mantemento da consellaría de Presidencia, Administracións Públicas e Xustiza; determinados servizos do ámbito de Xustiza; infraestruturas viarias; servizos regulares e servizo especial para transporte de escolares e traballadores; transporte de mercadorías para e desde estabelecementos sanitarios e servizos da consellaría de Traballo.

A sentenza salienta “a deixadez e temeridade da Xunta en canto está en xogo un dereito fundamental e de forma reiterada a xurisprudencia e criterio desta sala insistiu na carga de motivar”, é dicir, xustificar as razóns polas que se decretan determinados mínimos cando se vai negar o dereito a exercer un dereito fundamental como o de folga. Isto xustifica, para a Sala, a condena en custas da Xunta de Galiza.

A CIG denuncia que a lei 10/2012 pon prezo ao exercicio do dereito fundamental á tutela xudicial efectiva

paula.castro — Thu, 22 Nov 2012 14:20:46 +0100

Fronte á xustificación de Gallardón de que esta lei pretende ser disuasoria, a CIG denuncia que do que se trata é dunha lei excluínte que provocará a renuncia dos cidadáns a entaboar accións xudiciais en reclamación de dereitos individuais e colectivos, polo simple feito de non ter os cartos necesarios para pagar, por adiantado, as taxas xudiciais.

A central sindical considera que con esta medida ponse en cuestión o propio sistema democrático, ao pór prezo ao acceso a un dereito fundamental, como é o dereito á tutela xudicial efectiva, do que só quedarán excluídas as persoas con moi escasos recursos, que son as únicas que terán dereito á asistencia xurídica gratuíta.

Xunto a isto, en concreto o sector de Xustiza da CIG-Administración denuncia ademais que alén de impor esta inxusta medida, o PP aproveita a lei para “crucificar” máis ao persoal público ao exixírenlles a representación e defensa en todas as accións xudiciais en reclamación dos seus dereitos laborais e a imposición do dobre pagamento, en decembro das contías por dereitos pasivos e mutualidades, malia deixaren de percibir a paga extraordinaria.

A CIG rexeita, xa que logo, este e outros recortes de dereitos prantexados polo PP e defende o mantemento dos servizos públicos e dun sistema social e de dereitos cada vez máis en entredito por mor das medidas que se veñen adoptando só pretexto da crise económica.

O Tribunal Superior de Xustiza de Galiza suspende os mínimos en universidades e transportes de escolares e traballadores

paula.castro — Tue, 13 Nov 2012 21:25:20 +0100

Entre os sectores de actividade que eran obxecto da petición de suspensión cautelar dos servizos mínimos, o TSXG dá a razón á CIG no relativo ás universidades públicas, entendendo que non parece razoábel estabelecer que poida someterse ao alumnado a exames durante a xornada de folga e, mesmo de ser así, deberíanse limitar os servizos mínimos aos centros onde tales exames existan, e non estendelo ao conxunto de escolas e facultades.

Do mesmo xeito, o TSXG suspende os servizos mínimos en materia de transportes especiais de escolares e traballadores, declarando que resulta «desmedido e desproporcionado» e supón «unha clara conculcación do constitucional dereito de folga» que tales transportes funcionen a pleno rendemento nas horas de entrada e saída dos centros escolares ou de traballo.

A Sala concede á Xunta un prazo até as 22:00 do día de hoxe para que realice alegacións, en orde a establecer novos servizos mínimos nos sectores de actividade en que foron suspendidos. En caso de non facelo, universidades e transportes de escolares e traballadores operarán sen servizos mínimos durante a folga xeral de mañá.

O xulgado do social de Pontevedra desestima as demandas de Cándido Sartier contra a CIG

paula.castro — Tue, 21 Jun 2011 14:13:33 +0200

A sentenza avala a decisión da Comisión de Garantías da CIG de excluír a candidatura presentada por Sartier, ao considerar probado que non respectou a cota de participación feminina que os Estatutos da CIG estabelecen para favorecer a participación de mulleres nos órganos de dirección da organización sindical.

Alén diso, asumindo que esta resolución da Comisión de Garantías é correcta o xulgado rexeita tamén o argumento de que tal decisión teña un propósito discriminatorio ou contrario aos dereitos fundamentais derivado da posición que Cándido Sartier mantivo publicamente, apoiando a construción dun novo hospital con financiamento público-privado en Pontevedra fronte á ampliación do hospital existente en Montecelo, mantendo a súa xestión pública, que é a posición que defende a central sindical.

A propia sentenza declara que o demandante mantivo a súa posición con total liberdade de opinión, o que non é contraditorio coa apertura dun expediente disciplinario, “decisión que en ningún momento pode cualificarse de vulneradora de dereitos fundamentais a liberdade de opinión, nin a acción sindical pois a afiliación e estancia nun sindicato é voluntaria, pero supón a obriga de respectar os seus estatutos e decisións”.

A CIG reclámalle ao Estado español que transfira a Galiza todas as competencias en materia de augas

ivan — Wed, 15 Jun 2011 14:23:48 +0200

Nas súas alegacións ao documento a CIG considera imprescindíbel que Galiza conte con todas as competencias no que respecta á xestión da auga e lembra o solapamento territorial e competencia que existe na actualidade. Como exemplo disto cita o feito de que “a pesca fluvial, agricultura, xestión forestal ou conservación da natureza son competencia exclusiva da comunidade autónoma, mentres que as augas o son do Estado”, o que se traduce nun maior gasto público e incrementa os trámites administrativos. A súa proposta pasa por reservarlle á Confederación Hidrográfica a labor de coordinación entre as distintas administracións.

En materia de incendios forestais, dende a CIG critican que o Plan Hidrolóxico os cualifique como “accidentes”, cando o seu elevado número (uns 9.000 ao ano) recomenda que sexa tratados como “unha presión máis que debe de ser avaliada e corrixida”. Neste senso, denuncian as limitacións que a Confederación Hidrogáfica ten para xestionar a política forestal e a educación ambiental no territorio galego e propoñen unha serie de medidas:

-Control da vexetación de ribeira de xeito que se conformen uns cintos de seguridade que amortezan os impactos causados polas enxurradas.

-Prohibición do repoboamento nas marxes dos ríos e regatos con especies pirófitas como o eucalipto ou o piñeiro.

-Protocolo de restauración hidrolóxico forestal despois do incendio.

Canon sobre o uso da auga

No que respecta ao canon sobre o uso da auga -baseado no concepto de que a auga que usamos ensúciase e polo tanto debe de ser tratada- a posición da central fai fincapé na necesidade de redobrar esforzos “no camiño de esixir a non contaminación das augas, para o que se incrementará a vixilancia e o control das administracións”. Ao mesmo tempo, aposta por ligar o canon coa produtividade xerada polo uso da auga, así como cos beneficios que dela se obteñen.

Outras esixencias pasan por que todas as persoas que desenvolvan as funcións relacionadas co Plan Hidrolóxico sexan “persoal propio da administración hidráulica transferida a Galiza, en espacial o referente a inspección e vixilancia”. Finalmente, rexeitan a externalización de tarefas como a toma de mostras nos puntos de control ou estudo de bacías e solicitan “o axeitado dimensionamento do cadro de persoal da Xunta de cara a cumprir os obxectivos do plan”. Tamén esixen que a súa redacción conte cunha versión no noso idioma.