Na véspera da folga convocada por CIG-Saúde e SAE na Sanidade Pública galega, os traballadores e as traballadoras desenvolveron unha nova concentración nos hospitais de todo o País na defensa dos acordos asinados e publicados. A mobilización enmárcase dentro do calendario de protestas que está a levar adiante a plataforma sindical unitaria, que este mércores manterá unha xuntanza para estudar a posibilidade de realizar novas concentracións.

A pasada fin de semana quedaba constituída formalmente a Plataforma en Defensa da Sanidade Pública de Monforte de Lemos, conformada por veciños/as e organizacións de distintos ámbitos, entre as que se atopa a CIG-Saúde. Dende a Plataforma, que vén sumar as súas reivindicacións ás plataformas de O Barco e Burela, reclámase o mantemento da Área de Saúde de Monforte como único medio para asegurar “unha calidade digna da asistencia sanitaria” da poboación de referencia.

Logo do éxito da manifestación do pasado 28 de outubro en Compostela e diante da negativa do Sergas a mudar a súa posición, os traballadores e as traballadoras da sanidade acordaron iniciar peches de 24 horas nos distintos hospitais do País para exixir a convocatoria dunha Mesa Sectorial con capacidade negociadora, para tratar sobre a suspensión dos acordos en materia retributiva e a suspensións dos plans de Mellora de Atención Primaria e de Saúde Mental. Os martes 3 e 10 de novembro tócalle a quenda aos centros das provincias de A Coruña e Lugo, mentres que os xoves 5 e 12 será o persoal dos hospitais de Pontevedra e Ourense quen leve a cabo a protesta.

Ás 20:15h do xoves 29 de outubro, partiu dende o cruce de Gran Vía con Urzaiz a manifestación convocada pola Plataforma en Defensa da Sanidade Pública para esixir que o novo hospital de Vigo sexa executado e financiado de forma totalmente pública. Mais de 15.000 de persoas que percorreron o traxecto berraron consignas en contra de que a sanidade pública se converta nun negocio. A cidadanía viguesa deixou claro que non quere hipotecar a sanidade pública e que se deteriore a calidade sanitaria dun área que sempre foi esquecida en recursos sanitarios. "A privatización da xestión do novo hospital significa menos recursos humanos, menos contratacións, máis precariedade de servizos e un empeoramento da asistencia sanitaria porque os beneficios empresariais van primar sobre o interese público. Estes días xogámonos o futuro da sanidade pública. Se non conseguimos pararlle os pes ao PP, privatizará a sanidade pública; logo será demasiado tarde", lembraban os convocantes desta mobilización.

O martes 30 de setembro tivo lugar unha rolda de prensa no local da Federación de Asociacións de Veciños/as Eduardo Chao para presentar a mobilización que o vindeiro 29 de outubro percorrerá as rúas de Vigo baixo o lema: “A privatización prexudica a túa saúde. Hospital público xa”. Ademais nesta comparecencia diante dos medios de comunicación analizouse a visita da Conselleira de Sanidade na xornada anterior, “que o que pretendía é confundir e desmobilizar”.

A Executiva Confederal da CIG vén de comunicar o seu apoio ao acordo achegado pola Plataforma para a Defensa da Sanidade Pública Galega a prol da defensa do carácter público do sistema sanitario. A plataforma, da que forma parte a central, reclama ao novo goberno que negocie un cambio no modelo de financiamento sanitario de Galiza que garanta “a suficiencia financeira”, así como o inicio das obras dos novos hospitais das grandes áreas e a mellora dos centros xa existentes.