Traballadoras e traballadores dos centros públicos de Benestar percorreron o pasado venres Compostela, desde a Cidade da Cultura até o edificio administrativo da Xunta de Galiza, en San Caetano, nun longo traxecto polo centro da cidade, en defensa destes servizos. Con esta marcha, convocada polo  Comité Intercentros e os  catro comités provinciais de Traballo e Benestar, exixiron responsabilidades pola política de desmantelamento dos servizos públicos e a amortización de postos de traballo.

O Real Decreto Lei de medidas urxentes para garantir a sostibilidade do Sistema Nacional de Saúde desmantela, segundo denuncia CIG-Saúde, o sistema sanitario público, elimina a universalidade da prestación sanitaria e principios básicos como a promoción da saúde, a prevención o tratamento e a rehabilitación, agravando os problemas de saúde pública. A isto engade que o Partido Popular, respondendo a principios ideolóxicos reaccionarios estabelece criterios discriminatorios dificultando o acceso a prestacións e medicamentos ás persoas, en función da súa renda ou da súa condición de asegurado/a, concibindo a sanidade como beneficencia e non como un dereito, co obxectivo de obrigar aos usuarios/as a recorrer a seguros privados para cubrir aqueles servizos que queden excluídos do catálogo de prestacións na sanidade pública.

A Consellaría de Traballo e Benestar vén de presentar a súa proposta de eliminar 70 postos de traballo ante a Mesa Xeral de Negociación de Empregados/as Públicos/as. Segue así a política da Xunta de desmantelar progresiva e sistematicamente os servizos públicos da Área de Benestar, algo que semella ter un especial atractivo de negocio para algunhas empresas que se fan cargo dos servizos a cargo do erario público con inxección de subvencións millonarias.

A sección sindical da CIG da Fundación para o Fomento da Calidade Industrial de Galiza vén de denunciar a comunicación de despedimento de cinco investigadores que desenvolvían proxectos de I+D no ámbito forestal, industrial e tecnolóxico en Ourense, que se suman á longa lista de parados nun sector estratéxico para Galiza. Xunto a isto denuncian que a xerente da Fundación asume agora o papel de “axente comercial” e recomenda aos traballadores/as que subscriban un seguro médico privado despois de eliminar o Fondo de Acción Social.

Os traballadores e traballadoras de Lavandería La Espuma, situada no Polígono da Grela, queren chamar a atención sobre a situación de total indefensión na que se atopan nestes momentos. O persoal, que ten denunciado ao empresario por un posíbel delito de estafa no Xulgado do Penal, acode aos seus postos a diario mais permanece sen carga de traballo efectiva, xa que o propietario está desviando os clientes a outras lavanderías e comunicándolles o presunto peche do negocio.

A Federación de Construción e Madeira (FCM) da CIG acusou en rolda de prensa ao Grupo Cimpor de estar levando a cabo un proceso de desmantelamento da fábrica de cementos Materiales del Atlántico, S.A., situada no Concello de Narón, que acaba de anunciar o peche das instalacións para o vindeiro mes de maio. Dende a FCM da CIG negaron unha suposta situación de crise económica na empresa, xa que, segundo testemuñan, Matsa obtivo un resultados económicos positivos durante os últimos anos e o volume de vendas medrou de xeito continuado. O peche da fábrica deixaría na rúa a un cen traballadores e traballadoras.

Os/as delegados/as da Confederación Intersindical Galega na Axencia Tributaria alertaron das consecuencias que terá o progresivo desmantelamento do Servizo de Vixilancia Aduaneira en Galiza, e que podería provocar un repunte do narcotráfico nas nosas costas.