As traballadoras e traballadores de Campiñas de Laíño, Refojo y González e Hipescar acordaron en asemblea reanudar a folga indefinida que, no mes de xuño, se suspendera polo compromiso das empresas de chegar a unha solución pactada. Denuncian que o grupo de empresas incumpriu ese compromiso e que, ademais, a partir dese momento aumentaron as represalias en forma de atrasos nos pagamentos das nóminas daqueles que secundaran a folga, eliminación das dietas por desprazamento aos traballadores de reparto, traslados de postos de traballo e despedimentos.

A sección sindical da CIG en Telefónica aproveitou a presenza en Galiza do presidente da compañía, Luís Miguel Gilpérez, para lembrar que as últimas “medidas de reorganización” adoptadas pola empresa repercutirán moi negativamente no noso país. Os empregados/as fixeron coincidir novas mobilizacións en defensa do emprego coa visita do máximo responsábel de Telefónica ás instalacións da firma de telecomunicacións no noso país.

Representantes da CIG xunto co persoal despedido comezaron  a mobilizarse para reclamar a súa readmisión na empresa compostelá Moure Pan S.L. A panadería despediu a dúas traballadoras e un traballador amparándose na nova reforma laboral, por negárense a traballar gratis os domingos e as horas extra. Na concentración celebrada este xoves, diante do despacho de Basquiños¸ os propietarios requiriron a presenza policial por mor do ruído do megáfono.

Sen vacacións, sen descansos semanais, con atrasos nos cobros da nóminas e con horarios que superan en moito as 80 horas extras anuais a xornada laboral legal vixente no sector, segundo a propia Inspección de Traballo, as traballadoras e traballadores de Moure Pan S.L. decidiron reclamar da empresa o respecto aos seus dereitos. Ante esa situación, a empresa botou man da reforma laboral e, amparándose en supostas perdas, despediu a tres traballadores que curiosamente foron xa substituídos por outros tres.

A CIG de TRALUSA (empresa adxudicataria do transporte urbano de Compostela) denuncia que a reestruturación das liñas do transporte urbano vai favorecer a amortización de 5 cinco postos de traballo. Os representantes da central sindical denuncian tamén que esta reestruturación supón a ampliación dos traxectos, en varias das liñas, sen que se modifiquen as frecuencias, o que imposibilita, na práctica, o cumprimento das mesmas. Para a CIG é inadmisíbel que, para cumprir os horarios, se lle estea requirindo aos traballadores que fagan o que sexa necesario.

Un xuíz de Palencia ordenou o precintado da fábrica onde a familia Ruiz Mateos viña elaborando os chocolates La Perfección e Viso,despois de que o Tribunal Supremo rexeitase o recurso de casación interposto pola empresa contra a decisión da Audiencia Provincial de Madrid que sinala aos antigos traballadores/es da compañía viguesa que creou as marcas como lexítimos propietarios das mesmas. A sentenza, que tamén fixa unha indemnización, chega cando os ex empregados da compañía comezan os contactos para vender as marcas.

Os secretarios comarcais das federacións de Banca, Administración, Metal, FGAMT e Servizos compareceron hoxe para anunciar a presentación de demandas de conflito colectivo -que se intentará, cando sexa posíbel, facelo coas outras organizacións sindicais- contra as empresas públicas nas que se está a aplicar de forma ilegal o Real Decreto Lei 8/2010 de medidas para reducir o déficit público.