denuncia

CIG e CCOO denuncian na Subdelegación o garda civil que botou man á pistola diante dun piquete na folga xeral do 14-N en Ourense

ivan — Mon, 03 Dec 2012 14:36:57 +0100

Os secretarios comarcais da CIG e CCOO de Ourense presentaron esta mañá unha denuncia ante Subdelegación do Goberno español solicitando a apertura dun expediente disciplinario ao axente da Garda Civil que na folga xeral do pasado 14 de novembro fixo ademán de desenfundar a súa pistola diante dun piquete. Os feitos sucederon ás 8.00 da mañá no polígono industrial de San Cibrao das Viñas, á entrada do parque tecnolóxico.

O máximo responsábel da CIG na comarca, Etelvino Blanco, explicou que ese día o axente, que se atopa xunto a outros 20 compañeiros/as custodiando a acción dos piquetes informativos, “botou man á cartucheira e agarrou a empuñadura da pistola, sen chegar a desenfundala, pero facendo clara ostentación da mesma nunha actitude intimidatoria e ameazante creando momentos de tensión”.

Blanco sostén que o incidente se produciu nun momento no que non se rexistraba apenas afluencia de traballadores/as. “Foi cando chegou un coche e os piquetes comezaron a informar da folga cando uns 20 axentes arremeteron contra eles/as “. O secretario comarcal da CIG indicou que na denuncia tamén fixeron constar que os gardas civís non tiñan o número de identificación nun lugar visíbel.

Finalmente, comentou que a presentación da denuncia ante a Subdelegación responde ao trámite administrativo que é necesario facer en primeiro lugar neste tipo de casos, “pero unha vez saibamos cales son as medidas disciplinarias que se toman non descartamos acudir á vía xudicial”.

SOS Sanidade Pública denuncia á Dirección de Recursos Económicos do SERGAS polo contrato con Price Waterhouse Coopers S.L

paula.castro — Wed, 17 Oct 2012 10:42:53 +0200

A Plataforma SOS-Sanidade Pública de Galicia presentara xa un recurso contencioso-administrativo contra a resolución do SERGAS de 19 de Xaneiro de 2011 (DOG de 15 de Febreiro de 2011), de concesión a unha Sociedade Mercantil do contrato de obras públicas do novo hospital de Vigo.

O SERGAS, tras requirimento xudicial, enviou ao Tribunal case 2.000 folios, cada un deles debidamente conformes e cotexados pola Subdirección Xeral de Investimentos do SERGAS. Esa documentación foi trasladada á Plataforma, que tivo por iso a oportunidade de revisalos. Porén, non se atopou ningún informe da Sociedade Limitada denominada Pricewaterhousecoopers Corporate Finance, adxudicataria do contarto administrativo de 220.660 euros, que xustificara a realización dese asesoramento.

Ese informe debería avaliar as ofertas presentadas no proceso de adxudicación do contrato para financiar e construír o Novo Hospital de Vigo, e o seu custo ás Arcas Públicas Galegas ascendeu a 220.660 euros.

SOS Sanidade Pública lembra que dúas Unións Temporais de Empresas presentaron ofertas: unha liderada por Acciona e outra liderada por Grupo San José. O anuncio para licitar este informe de asesoramento de ofertas saíu publicado no Diario Oficial de Galicia durante o mes de Agosto de 2010 e tramitouse de forma urxente.

A Plataforma pregúntase se se adoitan realizar tramitacións de contratos deste tipo no mes de agosto e por que se recorreu ao trámite de urxencia. Máis cando a Dirección de Recursos Económicos do SERGAS sabía desde Maio de 2010 (saiu publicado no DOG do 10 de Maio de 2010) que o prazo, para presentar ofertas na licitación para o financiamento, construción e explotación do Novo Hospital de Vigo concluía o 2 de Agosto. Xunto a isto, pregúntase tamén, se isto foi así, por que motivo licitou o contrato que despois lle foi adxudicado a Pricewaterhousecoopers con carácter urxente. “Consideramos que se debería anunciar a licitación do contrato”, afirma.

“Non entendemos os motivos polos que o SERGAS tivo que contratar externamente este proceso e por un importe tan elevado (en tempos de crise recadatoria), para asesorar a avaliación das ofertas presentadas. Consideramos que a administración pública ten á súa disposición un corpo funcionarial interno altamente capacitado, nas diferentes Consellerías da Xunta, para levar a cabo tal tarefa”, afirman.

Por todo iso, considera que os feitos anteriores puidesen constituír un ilícito penal tipificado no noso Código Penal (artigos 404 e 465.1.)

O interese da Plataforma en Defensa da Sanidade Pública da área de Vigo - SOS Sanidade Pública, desde a súa creación fai 20 anos, e composta por organizacións profesionais, sociais políticas e sindicais fundamentalmente, é a defensa da sanidade pública, da legalidade actual e do interese xeral.

A CIG denuncia na Fiscalía o traslado en ambulancia dunha bebé que ía nunha incubadora atada con cinchas a unha padiola

begonha.carballo — Thu, 11 Oct 2012 14:42:37 +0200

Os feitos, explicaron o responsábel de Saúde Laboral da FGAMT-CIG, Ernesto López, e o condutor da ambulancia, Néstor Torea, aconteceron o pasado 25 de setembro, cando aos traballadores de Ambulancias Xuvias (que ten a concesión do servizo altas e traslados inter e intrahospitalarios do CHUAC) lles foi asignado un servizo de transporte dunha bebé prematura en incubadora.

Foi entón cando o persoal se deu conta de que terían que facer o traslado coa incubadora atada cunha cincha enriba dunha padiola e co sistema de monitorización suxeitado con esparadrapo. Antes estas manifestas irregularidades e faltas de seguridade para a crianza, o propio Torea manifestou ao persoal médico que se negaba a facer o traslado ante as serias posibilidades de que a incubadora case no chan, pondo en risco a saúde do cativo.

A este respecto, o condutor da ambulancia lembra que, segundo a normativa de transporte sanitario, para realizar o traslado duna xeito seguro a incubadora ten que estar ancorada á padiola con instrumentos de suxeición e ancoraxe homologados, condicións que si cumpría a ambulancia na que a meniña fixo a viaxe entre o hospital de Vigo e o da Coruña.

Ante a negativa dos traballadores/as a realizar o servizo en tales condicións de inseguridade, o persoal médico do Materno aseguroulles que ían dar parte á empresa, ameazándoos con que poderían ser despedidos. Nese momento, os dous traballadores/as chamaron a Garda Civil para dar conta desta situación e ao 061, e aínda que se recoñeceu que esas condicións non eran as adecuadas, deixaron a responsabilidade do que puidese pasar en mans do persoal médico que ordenou o traslado.

Tanto López Rei como Torea matizaron que este tipo de traslados non son illados, senón que se realizan con frecuencia e criticaron que tanto dende a Xerencia do CHUAC como dende a empresa concesionaria do servizo –ambos coñecedores desta situación- non se teñan tomado medidas para resolver estas carencias e acondicionar adecuadamente e con suxeición á lexislación vixente os dispositivos para o transporte sanitario destas características.

Neste senso, o responsábel de Transportes da CIG na Coruña lembrou as palabras do Fiscal de Seguridade Viaria cando hai uns meses asegurou que o ministerio fiscal imputaría por homicidio imprudente a todos os pais e nais que se visen implicados nun accidente e os/as fillos/as non fosen correctamente suxeitos. “Este non é un traslado nun vehículo particular, pero é o mesmo esquema, a crianza ten que ir na ambulancia ben suxeita e en condicións de seguridade e non con este amaño artesanal que o único que fai é por en perigo ao/á cativo e máis ao condutor e ao padioleiro”.

Antes as portas da Audiencia Provincial, López Rei explicou a que a nai da cativa afectada tamén presentou reclamación diante do Sergas para que faga as investigacións oportunas e corrixa estas deficiencias.

A CIG reclámalle á Xunta que esixa o cumprimento do protocolo de actuación das aeronaves contraincendios

ivan — Fri, 14 Sep 2012 20:13:00 +0200

Dende a CIG lembran que hai agora dous anos un traballador do SPDCIF recibiu unha descarga de auga dunha aeronave a poucos metros do chan nun incendio forestal na comarca de Trives e dende a Consellería do Medio Rural non se tomaron medidas preventivas para que isto non volvese suceder.

“Agora atopámonos outra vez con un accidente similar, onde non se tomaron as medidas establecidas, a pesares de que existe un protocolo de actuación ante a intervención dunha aeronave nun incendio forestal”. Este protocolo establece que se deberá avisar o persoal de terra da presenza da aeronave.

Dende a central nacionalista pregúntanse que ten que pasar para que a propia Xunta de Galiza tome cartas no asunto. “Debe de producirse unha nova desgraza en forma de accidente mortal dun traballador/a para que Medio Rural e do Mar teña a ben esixir o cumprimento das medidas establecidas no protocolo de actuación das aeronaves?”

Neste senso, lembran que o Goberno galego é o máximo responsábel da implantación das medidas de seguridade para os seus traballadores e traballadoras, de acordo coas leis existentes, “polo que dende a CIG esixímoslle que deixe de mirar cara a outro lado e dunha vez por todas cumpra coa normativa en materia de seguridade no traballo para salvagardar as vidas dos seus empregados/as”.

Finalmente, reclaman a apertura dunha investigación para clarexar o acontecido no accidente do xoves 13 de setembro, “cando tres traballadores do SPDCIF sufriron a descarga de auga dunha aeronave nunha das zonas perimetrais do incendio forestal onde non existía risco ningún para as vivendas nin tampouco para o monte dado a ausencia de lapas”.

Absolven 16 persoas acusadas de ocupar unha ETT en Vigo tras a proposta de acordo da acusación

ivan — Mon, 03 Sep 2012 14:47:58 +0200

Pouco antes do inicio do proceso no Xulgado do Penal número 3 de Vigo a propia acusación particular propuxo un acordo mediante o que se eximiría de calquera responsabilidade nos feitos a 16 das 18 persoas identificadas pola Policía española. A proposta da acusación particular contrasta coa petición inicial, que era de tres anos de cadea por un suposto delito de coaccións. A propia Fiscalía renunciara ao escrito de acusación.

Media hora antes do inicio so xuízo, fixado para as 10.30 horas, un nutrido número de delgados/as da CIG concentrouse ás portas do edificio xudicial da rúa Lalín para amosar a súa solidariedade cos acusados/as. O secretario xeral da central nacionalista, Suso Seixo, tamén estivo presente no acto.

Ao remate, tomou a palabra o secretario comarcal de Vigo, Serafín Otero, quen agradeceu a resposta solidaria de todos/as os/as presentes e lembrou que se escolleu para a protesta a empresa de traballo temporal Ader, da rúa Romil, “porque tiñamos coñecemento do trato denigrante que teñen cos traballadores/as, en especial cos/as do sector do telemarketing”.

Concentración solidaria nos Xulgados de Vigo este luns coincidindo co xuízo a 18 persoas

bernal.rua — Fri, 31 Aug 2012 20:48:47 +0200

O proceso contra as 18 persoas baséase na denuncia presentada pola propietaria dunha ETT da rúa Romil, aínda que a propia Fiscalía rexeitou presentar escrito de acusación.

Con todo, e a pesar de que os procesados/as foron identificados pola Policía española cando se atopaban nas inmediacións do Concello de Vigo, a acusación solicita tres anos de cadea para cada un deles por presentamente teren ocupado a sede da empresa o pasado 17 de setembro e causado desperfectos no seu interior.

A concetración solidaria dará comezo ás 10.00 horas, media hora antes do inicio do xuízo, que terá lugar no Xulgado do Penal número 7 de Vigo, na rúa Lalín.

Presentada denuncia perante a Fiscalía contra Rosa Quintana e altos cargos de Medio Rural por prevaricación

paula.castro — Tue, 14 Aug 2012 14:56:11 +0200

Hai pouco máis de dous meses, en concreto o día 4 de xuño, o sector da Autonómica da CIG-Administración alertaba da intención da consellaría de Medio Rural de privatizar as brigadas helitransportadas do Servizo de Prevención e Defensa contra Incendios Forestais (SPDCIF). Aseguraba ademais que, pola información á que tiveran acceso, a consellaría estaba a preparar un contrato para que unha UTE, formada por NATUTECNIA e INAER, se encargara das brigadas helitransportadas e as cuadrillas.

Finalmente o contrato foi outorgado por nin máis nin menos que 6,6 millóns de euros, fora de todo procedemento legal previsto. Por iso presentábase esta mañá a denuncia perante a fiscalía.

Tras do seu rexistro, Fernando García, responsábel do sector da Autonómica, valorou que existe, neste caso, unha evidente conduta delictiva, do momento no que hai dous meses xa se coñecían os adxudicatarios, violando así o principio de igualdade, cando aínda non se fixera pública a convocatoria. “Cremos que son feitos gravísimos”, afirmou, “constitutivos de delito por fraude e prevaricación”.

Xunto a isto denunciou que vai supor un sobreprezo para as arcas galegas. “Se interviñeran outras empresas podería ser de entre 3 ou 4 millóns de euros, co cal se están a detraer ou defraudar 2 millóns de euros pola mala xestión que está a facer o PP”. De feito, e comparando cos custos que supuxo a contratación de helicópteros e das brigadas helitransportadas en anos anteriores, asegura que a hora unitaria de voo nos helicópteros está saíndo a 2.400 €, cando o prezo de mercado está en arredor de 1.000. “Polo tanto hai algún interese en darllo a estas empresas”, afirmou.

Precisamente por iso tamén se solicita da fiscalía que se investigue se hai algún incremento patrimonial das persoas implicadas nestes contratos ou das persoas do seu entorno familiar. “No caso de que houbera indicios, e iso puidera ser derivado destes contratos, o fiscal tería que actuar aplicando tamén o código penal”, matizou.

A CIG ten constancia de que 13 helicópteros da empresa INAER e 10 cuadrillas da empresa Natutecnia están traballando nas tarefas de extinción de incendios, sen ter constancia formal algunha.

Antes o persoal era seleccionado directamente polo servizo de prevención de incendios da Xunta, por Seaga ou por Tragsa. “É a primeira vez, e isto é insólito, que se contrata unha empresa privada para as cuadrillas de incendios. Que nós fosemos quen de avanzar ese dato dous meses antes quere dicir que estaba máis que amañado”, engadiu.

O procedemento negociado sen publicidade é para contratos de menos de 100.000 €. Neste caso, e segundo declarou Rosa Quintana, ascende a 6,6 millóns, o que segundo García obriga ademais a darlle publicidade no DOG, no Boletín das Comunidades Europeas e máis na Plataforma de contratación da propia Xunta de Galiza. Por iso o responsábel da Autonómica concluíu que a actuación da consellaría responde a que o PP “ten un sentido patrimonial da administración, que consideran súa”.