Xa van 21 dias de folga, e nesta xornada despois da histórica e multitudinaria marcha a Compostela aínda quedaron forzas para retomar o traballo dos piquetes en moitas zonas e para volver facer marchas desde as distintas zonas industriais até encontrarse de novo nunha asemblea na Praza do Concello, en Vigo. Despois tivo lugar unha nova manifestación até á Praza da Estrela, fronte á delegación da Xunta nesta cidade. Nesta tarde toca reflexionar nas distintas asembleas sobre que novos camiños se quere andar para gañar este conflito e acadar un convenio xusto.

A folga parcial, con paros de 9 a 13, e con diferenzas en función do subsector continuou o mércores 17 de xuño, con maior efectividade e organización, e de novo cumprindo o obxectivo de volver paralizar a venda dos concesionarios. Tamén nesta xornada, e xa van once, volviase visibilizar polo centro da cidade aos traballadores e traballadoras do Metal en folga, que protagonizaban unha marcha polo centro da cidade, desde a zona dos estaleiros de Bouzas e Barreras. Tamén houbo unha alta presenza policial, como en xornadas anteriores.

O xoves 11 de xuño comezaba a séptima xornada de folga pola negociación do convenio provincial do Metal de Pontevedra. O mércores 10 de xuño desde as doce da mañá comezaba unha xornada intensiva de negociación na Delegación da Xunta de Galiza en Vigo, coa presenza dos mediadores, dos representantes da patronal e da Comisión Negociadora das centrais sindicais. Non obstante, ás nove da noite suspendíanse as negociacións perante a postura intransixente da patronal que, a pesar da vontade negociadora da parte sindical, continuaba a presentar unha oferta salarial demasiado baixa. Nesta xornada de folga, de novo milleiros de traballadores e traballadoras sairon ás rúas, desta volta dun xeito máis masivo se cabe, visibilizando que o Metal non se rende, e que continúa a dar esta batalla pola dignidade e a xustiza.