Representantes de CIG, CCOO, UGT e CSI-F nas diferentes administracións públicas galegas compareceron este martes en rolda de prensa conxunta para anunciar a convocatoria de mobilizacións en contra do Anteproxecto de Lei de Medidas no Emprego Público que prepara a Xunta. As organizacións sindicais realizarán concentracións todos os xoves de febreiro para amosar o seu rexeitamento a estes novos recortes nas condicións laborais e salariais e non descartan convocar folga en todas as administracións se o Goberno galego non retira este decreto.

O auditorio da Casa da Cultura de Bertamiráns quedou pequeno para acoller a todas as persoas que participaron no festival de apoio aos servizos públicos de Ames. Segundo a organización repartíronse uns 500 adhesivos co lema “Eu apoio os servizos públicos de Ames. Non ao peche de servizos e ao despedimento de 9 traballadores e traballadoras”.

O mércores 25 de xaneiro, publicáronse no DOG as novas taxas que a Xunta de Galiza vén de aprobar para as escolas infantís, que suporán un incremento moi por riba do 19% anunciado polo presidente Feijoo. De feito, nalgúns servizos, como o de comedor, a taxa actual chega a duplicarse.

O Comité de Empresa da consellaría de Traballo e Benestar vén de manifestar o seu rexeitamento ao peche definitivo do Centro de Menores de Montealegre, en Ourense, de titularidade e xestión pública. Denuncian que con esta decisión terá como consecuencia a amortización de 12 postos de traballo. Por iso anuncian a convocatoria dunha concentración o día 27 de xaneiro, ás 9:30 horas, no edificio administrativo de San Caetano.

Música, poesía, contacontos, monólogos e comunicados. O Comité de Empresa do Concello de Ames e os nove afectados pola proposta de despedimentos presentada polo goberno municipal organizan para o venres, 27 de xaneiro, ás 20:15 na Casa da Cultura de Bertamiráns un festival de apoio aos servizos públicos de Ames. Con este acto a organización pretende facer unha chamada de atención ao goberno de Ames para que desista da súa proposta de peche dos servizos municipais de Normalización Lingüística, Animación á lectura, parte do Servizo de Bibliotecas, Brigada de Medio Ambiente e Radio Municipal e para que reconsidere a proposta de despedimentos que presentou o pasado 15 de novembro.

No consello da Xunta celebrado onte, xoves 19 de xaneiro, anunciouse unha suba das taxas das escolas infantís do 19% que se fará efectiva a partir do vindeiro curso. Porén, a suba real é moi superior dado que aínda que o prezo por asistencia pasa do tope máximo de 110 euros mensuais a incrementarse até os 160 euros, o servizo por utilizar o comedor pasa de 33 euros até os 70 euros.

As federacións da Área Pública da CIG (Administración, Ensino e Saúde) denuncian a campaña sistemática de desprestixio dos/as empregados/as públicos/as e, por extensión, dos servizos públicos. Manifestan a súa oposición a calquera medida que supoña recortar aínda máis as condicións laborais dos empregados e empregadas públicas e denuncian a publicación de informacións baseadas na mentira e na demagoxia en medios afíns ao PP que teñen como único obxectivo manipular á opinión pública.