O secretario xeral da CIG, Suso Seixo, denunciou, na súa intervención no acto de clausura do V Congreso da federación de Químicas e Enerxía, a gravidade dos ataques do neoliberalismo, que se están plasmando nun deterioro das condicións de vida da clase traballadora e alertou de que, neste intre, mesmo está en xogo “o noso modelo de sociedade”. Por iso, fixo un chamamento aos delegados e delegadas asistentes a traballar para que a folga xeral convocada para o 29 de setembro sexa un éxito pero, sobre todo, para gañar a batalla ideolóxica.

O V Congreso da federación de Químicas da CIG, que se celebrou baixo o lema “Organizar e fortalecer para o cambio social, elixiu a Alberto Gonçalves como novo secretario nacional. A súa candidatura, que foi o única presentada, recibiu 90 votos a favor, 4 brancos e 1 nulo. No decurso da mañá deste sábado, os 126 delegados e delegadas convocadas debateron sobre as repercusións que a crise está a ter no sector e acordaron iniciar o proceso para a súa unificación coa federación do Metal.

Xoán Xosé Bouzas, foi elixido novo secretario nacional da federación do Metal da CIG con 150 votos, fronte aos 66 obtidos por Miguel Malvido. Para a nova executiva, concorreron tres candidaturas, a encabezada por Bouzas recibiu 147 votos  e 6 representantes, a encabezada por Malvido 62 votos e 2 representantes e a encabezada por Francisco Rodríguez, 20 votos e 1 representante. Para o Consello Confederal concorreron outras tres candidaturas, encabezadas por Bouzas, que obtivo 149 votos e 7 representantes; Malvido, con 63 votos e 3 representantes e  Pedro Gómez, 19 votos e 1 representante.

Paulo Rubido foi reelixido secretario nacional da Federación de Servizos da CIG con 147 votos a favor, 11 abstencións e 1 voto nulo. Na súa intervención alertou de que “estes son tempos difíciles a nivel laboral, nacional e lingüístico” e fixo un chamamento para que desde a Executiva e do conxunto da federación de Servizos, non se admita “nin un paso atrás no noso proxecto nacional, nos nosos dereitos como clase, nin nos nosos dereitos lingüísticos”.

O V Congreso da Federación de Servizos da CIG daba comezo esta mañá en Compostela coa intervención do Secretario Xeral, Suso Seixo, quen alén de dar a benvida ás delegadas e delegados asistentes fixo un chamamento a participar activamente nas mobilizacións convocadas para o vindeiro 25 de abril en Compostela, En "Defensa dos Servizos Públicos", e o Primeiro de Maio, "Día do Internacionalismo Proletario”. No decurso da mañá os delegados e delegadas debateron e aprobaron os relatorios de Estatutos, con 142 votos a favor, ningún en contra e 7 abstencións, e de Organización, por 151 votos a favor e ningún en contra.

A Federación de Saúde da CIG celebrará o seu V Congreso durante os días 13 e 14 de marzo, no Hotel Auriense, en Ourense. As/os 143 congresistas que están convocadas/os, debaterán, a partir das 11:15 horas do sábado, as ponencias de Acción Social e Política Sanitaria e de Organización e Estatutos e elixirán á/ao nova/o secretaria/o nacional e á Executiva. CIG-Saúde aposta por construír unha organización sindical forte, para enfrontar as agresións que o conxunto da sanidade está a sufrir “pola implantación das políticas neoliberais e a receptividade e o fomento dos gobernos a dar entrada ao capital privado no sistema sanitario, convertendo este nun negocio que de futuro só dará beneficios ao mundo empresarial en detrimento da calidade asistencias, da carteleira de servizos que se ofertan á poboación e dos dereitos dos/as traballadores/as”.

A Federación da Administración Pública da CIG celebra o sábado 21 de novembro o seu V Congreso. Co lema “Por unha administración mellor, mellor en galego”, terá lugar este V Congreso, no que participarán 194 delegadas/os, e que será na Faculdade de Económicas da Universidade de Vigo, desde as 9 da mañá e até as 20 da tarde.