O pasado día 29 de novembro nacía a nova entidade froito da fusión de Caixa Galicia e Caixanova. Media hora antes pechábase o período de consultas do ERE de extinción para 900 postos de traballo en Galiza. A CIG optou por non asistir ao acto de sinatura co que se daba por constituída a nova entidade, porque entende que se abre o camiño cara a súa inminente privatización, previa reconversión vía ERE.

O vindeiro xoves 11 de novembro, Caixa Galicia e Caixanova citaron a todos os delegados e delegadas de ambas empresas para dar inicio ao proceso de tramitación do Expediente de Regulación de Emprego, que será de extinción para cando menos 1.235 persoas vía prexubilacións e, nun número non determinado, a través das baixas incentivadas. Ese mesmo día, a CIG-Banca ten convocada unha concentración de delegados e delegadas para protestar polos recortes no emprego e nas condicións laborais que suporá a aplicación do ERE.

Máis dun cento de delegados e delegadas da CIG permaneceron concentrados durante dúas horas diante da Oficina Principal de Caixa Galicia en A Coruña para rexeitar os despedimentos previstos nas contratas da limpeza e seguridade, por mor da fusión das dúas caixas galegas. A protesta realizada na mañá deste martes, subliñou o Secretario Nacional da CIG-Servizos, Paulo Rubido, terá continuidade nas vindeiras semanas, pois a pesar da xuntanza mantida coas direccións de recursos humanos de ambas entidades, estas non se comprometeron a abrir unha mesa de diálogo a respecto dos máis de 300 postos de traballo das empresas auxiliares que agora están en perigo.

Ducias de delegados e delegados da CIG concentráronse na tarde do luns 18 de outubro diante da sede da Fundación Caixa Galicia en A Coruña e do Centro Socio Cultural de Caixanova en Vigo para denunciar o desmantelamento, liquidación e privatización das caixas galegas. As protestas desenvolvéronse de xeito simultáneo en ambas cidades coincidindo coa celebración das asembleas xerais de Caixanova e Caixa Galicia, nas que a CIG reiterou o seu apoio á fusión das caixas, mais denunciou o proceso deseñado polas cúpulas das entidades para garantir a súa propia continuidade sen ter en conta os miles de empregos que se van destruír nin a precarización que supón para o conxunto dos traballadores e traballadoras o plan de integración e o acordo laboral.

A sección sindical da CIG no Banco Gallego vén de denunciar o despedimento dos traballadores e traballadoras da entidade adscritos ao Departamento de Estranxeiro, logo de que a empresa decidise externalizar este servizo. Dende a sección sindical sublíñase que nos dous últimos anos se está a producir un desmantelamento progresivo dos servizos centrais de A Coruña mediante o traslado a Madrid ou a exteriorización de departamentos. Diante destes reaxustes, os traballadores e traballadoras están convocados a unha asemblea xeral o vindeiro 7 de setembro, na que se abordarán posíbeis mobilizacións de cara a evitar máis despedimentos.

A CIG-Banca rexeitou a actitude que están a manter Caixa Galicia e Caixanova nas xuntanzas coa representación sindical, pois ambas entidades teiman en manter a súa actitude opaca, negándose a achegar documentación concreta sobre o impacto laboral que terá a fusión. A Federación, que sospeita que as caixas pretenden adiar a negociación laboral até ter pechada a venda das oficinas, ampliou a denuncia presentada o pasado 21 de xuño na Inspección de Traballo. Así mesmo, a CIG-Banca advertiu que todo o proceso de negociación estará marcado polos reaxustes decretados dende o goberno estatal, que afectarán especialmente ás xubilacións anticipadas e prexubilacións.

Arredor dun cento de delegados e delegadas da CIG-Banca realizaron dúas concentracións de protesta este martes 22 en Vigo para, por unha banda, reclamar un plan de futuro negociado nas caixas de aforro galegas en proceso de fusión e, pola outra, denunciar os despedimentos que está a realizar Banesto a pesar das axudas estatais recibidas nos últimos meses.