A FGAMT-CIG de Ferrol vén de reclamar ás empresas de transporte de viaxeiros que eliminen as xornadas abusivas e sen ningún tipo de control que teñen que facer os condutores/as de autobús, tanto nos servizos discrecionais como de escolares.

O sector de Transportes da CIG e delegados da central no Grupo Vázquez compareceron este martes en rolda de prensa para avaliar as informacións que apuntan á venda fragmentada da compañía Metropolitana de Transportes (encargada do servizo de autobuses na zona A Coruña-Bergantiños-Costa da Morte) a un grupo de empresarios. Para a CIG esta operación forma parte dunha estratexia do Grupo Vázquez para desfacerse de liñas que non lle interesan e reducir o cadro de persoal.

A CIG vén de presentar denuncia na Fiscalía da Audiencia Provincial da Coruña contra os propietarios da empresa de transportes Romar-Bus por un posíbel delito de alzamento de bens. A empresa, que se atopa nunha situación incerta, deixou de realizar o pasado 1 de marzo todos os contratos de transporte escolar que tiña coa Consellaría de Educación e con entidades privadas para o servizo dos colexios de Santa Comba e A Coruña.

A CIG de Porriño vén de denunciar diante da consellaría de Educación e da Dirección Xeral de Mobilidade graves irregularidades no transporte escolar de escolares e traballadores por parte dun vehículo particular ao servizo das empresas do grupo Monbús. A CIG denuncia que nese vehículo particular, unha persoa que cobra unha pensión de xubilación ordinaria  está a realizar servizos de transporte de persoas para as empresas deste grupo.

A sección de Transportes da CIG volveu denunciar a precaria situación laboral que padecen as/os acompañantes do transporte escolar no noso País, ás que non se lles está aplicando o convenio de transporte de viaxeiros. Dende a central tamén se denuncia a “usura” das empresas que cobren estes servizos sociais, pois mentres reciben unha subvención de arredor de 900 euros/mes por acompañante, o salario medio das/os traballadoras/es non supera os 250 euros. A CIG-Transportes exixiu á administración que tome cartas no asunto, advertindo que se a primeiros do vindeiro curso non se ten solucionado esta situación non descartan iniciar accións sindicais e presentar conflito colectivo.

A CIG-Ensino vén de denunciar que os/as acompañantes do transporte escolar perciben un 81 % menos do que lles correspondería, segundo o que a Consellaría lles transfire ás empresas de transporte para cubrir os gastos deste servizo. Detectáronse casos de compañías que en lugar de contratar directamente a estes/as traballadores/as e aplicarlles o Convenio de transporte de viaxeiros fano mediante empresas de servizos e retribúenos, soamente, coa parte proporcional que lles corresponde do salario mínimo interprofesional.

Redución sistemática de servizos nas liñas regulares, nenos que viaxan nos buses escolares sen acompañante ou que chegan antes de tempo aos colexios sen que se faga cargo deles un adulto son exemplos das irregularidades que comenten as compañías Monbús e Grupo Vázquez na Costa da Morte.