Miles de persoas percorreron as rúas de Monforte na tarde do xoves en defensa da sanidade pública e a prol do mantemento da autonomía desta área sanitaria. Coa marcha, que saíu pouco despois das 20:00 horas da explanada da Estación, tamén se quería denunciar o sistema de gardas unificadas nos servizos de radioloxía que a Consellaría vén de decretar para os hospitais de Monforte, Verín e O Barco, e que se poderían facer extensíbeis a outras áreas sanitarias. A manifestación, a maior que se viviu na comarca até o momento, superou as previsións da Plataforma en defensa da saúde, que advertiu que as mobilizacións continuarán se a Xunta prosegue no seu ataque ao sistema sanitario público.

A pasada fin de semana quedaba constituída formalmente a Plataforma en Defensa da Sanidade Pública de Monforte de Lemos, conformada por veciños/as e organizacións de distintos ámbitos, entre as que se atopa a CIG-Saúde. Dende a Plataforma, que vén sumar as súas reivindicacións ás plataformas de O Barco e Burela, reclámase o mantemento da Área de Saúde de Monforte como único medio para asegurar “unha calidade digna da asistencia sanitaria” da poboación de referencia.

A CIG fixo público o seu desacordo "polas formas e métodos de traballo" que veñen apuntando os novos responsábeis do hospital comarcal de Monforte. A central sindical nacionalista informou de que non mantivo con estes novos xerentes nin unha só reunión e denuncia que o xerente e a dirección de enfermeria marcharan de vacación nada máis tomar posesión dos seus cargos.