CIG-Correos vén de remitir unha solicitude á Xefatura Provincial da entidade para que á maior brevidade proceda a cubrir a ausencia dun carteiro que está de vacacións na oficina de Ribeira. A central nacionalista denuncia que esta situación está a provocar deficiencias no reparto diario de correspondencia.

Desde a sinatura do Convenio por parte de CCOO e UGT, coa patronal, teñense dado novos pasos para tentar desregularizar máis o sector naval. A CIG-Metal denuncia que na Mesa do Naval, que debería servir para regularizar o modelo de contratación neste sector, a patronal, coa axuda dos sindicatos CCOO e UGT, queren botar abaixo o modelo da Bolsa de Emprego e aumentar a flexibilidade coa imposición dunha bolsa de horas. Diante desta situación, a central sindical nacionalista editou unha folla informativa para dar conta da súa oposición e dos últimos acontecementos neste conflito.

Delegados e delegadas da CIG-Ensino concentráronse na mañá do 16 de xullo diante da Consellaría de Educación, para denunciar a redución de postos docentes nos centros escolares que ten como consecuencia a non contratación duns 458 profesores e profesoras interinos/as que traballaron o ano pasado (especialmente das materias de Lingua Castelá Xeografía e Historia, Matemáticas, Debuxo, Francés, Música e Lingua Galega), ademais de varios funcionarios de carreira de lingua castelá, lingua galega e música que a día de hoxe aínda non contan cun posto asignado.