A Axencia para a Modernización Tecnolóxica de Galiza (AMTEGA) concedeu, o pasado 11 de decembro, un premio dotado con 1.000 euros a un proxecto de fin de carreira no que se utilizaba o software libre. Para o sector da Autonómica da CIG-Administración trátase dun “lavado de imaxe” por mor das críticas recibidas por non fomentar, nin utilizar este software mentres gasta inxentes cantidades en software propietario na administración galega.

A CIG-Administración, sector da autonómica, vén de denunciar a adxudicación dun contrato, negociado sen publicidade, por valor de 151.038 euros á corporación norteamericana Microsoft. Unha adxudicación que consideran que supón “seguir esgotando os cartos públicos”, en lugar de “apostar por unha austeridade que non dane os servizos públicos nin agrida ao persoal que os desenvolve” e que supón o incumprimento do compromiso do goberno galego de implantar o software libre.

A CIG-Autonómica denunciou publicamente o desmantelamento que a Xunta de Galiza está a levar a cabo das fundacións creadas polo bipartito destinadas á investigación e o desenvolvemento tecnolóxico. O goberno galego vai despedir a máis de 100 traballadores/as destes centros, recoñecendo explicitamente a improcedencia dos mesmos, sen garantir a continuidade da actividade. As notificacións comezaron a chegar logo de que a CIG preavisara da celebración de eleccións sindicais o pasado mes de setembro.