O Comité de Elaborados Metálicos Emesa mantivo na mañá deste xoves un encontro co Director Xeral de Relacións Laborais e a Subdirectora Xeral de Traballo para avaliar a situación da factoría perante a presentación do cuarto ERE de suspensión. Porén, dende o Comité agárdase agora que a propia Conselleira de Traballo e o Conselleiro de Industria cumpran o compromiso adquirido e concreten unha data para recibir á representación do persoal.

Traballadores de Elaborados Metálicos SA (EMESA) iniciaron na mañá deste venres mobilizacións contra do segundo ERE temporal consecutivo imposto pola empresa e a falta de cumprimento dos acordos de rotación dos tempos de traballo. O persoal desenvolveu unha concentración diante do edificio administrativo da Xunta en A Coruña. Previamente, unha representación do Comité mantivo unha xuntanza coa Subdirectora Xeral de Traballo para expor a situación na empresa e informarse do estado de tramitación do recurso de alzada presentado contra esta segunda regulación.

O Comité de Sykes e representantes sindicais mantiveron esta mañá unha xuntanza coa Dirección Xeral de Relacións Laborais en Compostela para urxir a resolución dos recursos presentados contra a aprobación do expediente de regulación e instar a administración galega a implicarse neste conflito, que semella rematará co peche da plataforma de Sykes en A Coruña.

Unha representación do Comité de Empresa de Tréves e da FGAMT-CIG, nomeadamente do seu secretario nacional, Xosé Fernández Piñeiro e a secretaria nacional do Téxtil, Dores Martínez, reuníronse este luns 19 de abril co Director Xeral de Relacións Laborais, Odilo Martiñá, no marco da Comisión de Control e Seguimento da aplicación de ERE. Unha xuntanza na que se constatou a ausencia de avances na aplicación dos acordos asinados cando se efectivizou o peche da empresa entre a parte social e a administración.

Os representantes dos traballadores/as e das organizacións sindicais presentes nos centros de traballo do grupo Alfageme (Vigo, O Grove, Vilaxoán e Ribadumia) reuníronse na mañá do martes 6 de outubro co Director Xeral de Relacións Laborais, Odilo Martiñá, para explicar o posicionamento dos cadros de persoal fronte ao plano de viabilidade presentado pola empresa e tentar atopar unha saída á crítica situación que atravesa o grupo. Así mesmo, os/as traballadores/as da planta de Vigo están chamados a participar este mércores nunha asemblea para ratificar a convocatoria de folga neste centro para o mércores da semana próxima.