A CIG denuncia que a decisión da Consellaría de Traballo de anular a acta de infracción emitida pola Inspección contra a Radio Galega (RG), pola cesión ilegal do traballador da Universidade de Santiago de Compostela (USC) José Miguel Túñez López responde a intereses políticos. Por iso, alén de considera que se trata dunha resolución “escandalosa”, anuncia que recorrerá ás vías legais ao alcance para que o asunto se aclare nos xulgados.

A Coordinadora da sección sindical da CIG denuncia as ameazas da subdirectora de Contido da Radio Galega, Rosa Sierra, ás/aos locutoras/es e redactoras/es de informativos, a manipulación informativa decretada desde a dirección para a información en xeral, e no que respecta ás mobilizacións que se convocaron contra o Decreto de Plurilingüismo en particular, e demanda a posta en marcha dos Consellos de Redacción para tratar de frear esta situación.

A Inspección de Traballo declarou en fraude de lei a contratación, na modalidade de interinidade en vacante, da xefa de Programas da Radio Galega, Gloria Ferreiro. Segundo a autoridade laboral, Ferreiro foi contratada para coordinar os programas e os locutores que presentan os mesmos e estas funcións non coinciden coas de locutora de radio sinaladas no contrato.

A CIG vén de denunciar ante a Inspección Provincial de Traballo e Seguridade Social a suposta cesión ilegal do traballador da Universidade de Santiago de Compostela (USC) José Miguel Túñez López á Radio Galega (RG). Dende o 7 de setembro, Túñez López presenta e dirixe o magazine A Tarde, que a emisora pública emite de luns a venres entre as 16 e as 19 horas. A CIG tamén denuncia o incumprimento por parte da dirección da canle autonómica da obriga legal de información á representación sindical en relación cun suposto convenio bilateral entre a USC e a RG que presuntamente daría cobertura legal á cesión do devandito traballador.