Unha sentenza do Xulgado do Social número 1 de Pontevedra, contra a que non cabe recurso, vén de confirmar a persecución sindical exercida pola empresa que xestiona o parque comarcal de bombeiros do Morrazo contra o delegado de persoal da CIG. A decisión xudicial considera nula a sanción imposta por Celta Prix a Rubén Fraga ao entender que “se debeu ao intento por parte da empresa de represaliar a activa labor sindical do demandante” e obriga a compañía a abonarlle o salario que deixou de percibir no tempo que durou a suspensión de emprego e soldo.

O día 27 de xaneiro, o Xulgado nº 3 de Pontevedra, ditaba sentenza sobre o despedimento do Bombeiro Pablo Álvarez. A sentenza declara o despido deste traballador como improcedente. O auto ben a confirmar, de xeito claro e contundente, a opinión da CIG sobre este atropelo laboral; un mais aos que, lamentabelmente, xa nos empeza a ter acostumados CELTAPRIX e que semella contar coa pasividade da Administración responsábel deste servizo. Pasividade que se transforma en complicidade pola vía dos feitos.

Bombeiros do Parque Comarcal do Morrazo continúan coas protestas para rexeitar a actitude despótica da concesionaria, Celta Prix, que despediu un traballador e sancionou dous máis. Os profesionais de Emerxencias permaneceron durante seis horas pechados na Deputación de Pontevedra o 9 de novembro como medida de presión para que a institución provincial medie no conflito.

O conflito aberto entre os bombeiros do Morrazo e CeltaPrix vén agravarse logo de que a empresa decidise expedientar ao delegado de persoal  “por falta moi grave e perda de confianza” e sanicionar ao irmán dun traballador despedido. Os bombeiros, que se mobilizaron a pasada semana diante da Deputación de Pontevedra para exixir  a readmisión dun compañeiro despedido, manteñen unha pelexa activa contra as intencións da administración galega de privatizar a xestión dos futuros Consorcios Provinciais, e así este venres 30 de outubro levarán a cabo unha manifestación en Compostela para exixir un servizo público de emerxencias.

Bombeiros do Parque Comarcal do Morrazo protagonizaron o 22 de outubro unha concentración na Deputación de Pontevedra coa intención de que o organismo provincial medie no conflito desatado tralo despedimento dun compañeiro pola concesionaria, Celta Prix. O vicepresidente da Deputación, José Enrique Sotelo, que ao mesmo tempo preside o Consorcio Comarcal do Morrazo, comprometeuse a manter unha xuntanza o vindeiro 28 de outubro coa empresa e a CIG-Servizos para atopar unha solución.