O V Congreso da Federación da Administración Pública elixiu a María Carme López Santamariña nova Secretaria Nacional, converténdose así na primeira muller que vai ocupar este cargo na Federación. A candidatura de López Santamariña acadou 77 votos, fronte aos 56 conseguidos por María Consuelo Rodríguez, os 30 de Rafael Aguirrebengoa, e os 16 logrados por Manuel Facorro. A nova Secretaria da CIG-Administración Pública fixo un chamamento á unidade de acción na súa intervención de clausura, na que tamén participou o Secretario Xeral da Confederación, Xesús Seixo.

Desde pouco antes das dez da mañá comezaba no Salón de Actos da Faculdade de Económicas o V Congreso da Federación da Administración Pública da CIG, baixo o lema "Por unha administración mellor, mellor en galego". O secretario comarcal da CIG de Vigo, Xerardo Abraldes, deu o saúdo inicial a este encontro, que veu precedida da intervención da secretaria de Organización da CIG-Administración, Rosa Chantada. Asi comezaba o debate do Informe de Xestión e de Finanzas, que foi defendido polo secretario nacional saínte da CIG-Administración, Xosé Carlos Crespo, que foron aprobados, asi como o relatorio de Acción Sindical e o de Estautos.

A Federación da Administración Pública da CIG celebra o sábado 21 de novembro o seu V Congreso. Co lema “Por unha administración mellor, mellor en galego”, terá lugar este V Congreso, no que participarán 194 delegadas/os, e que será na Faculdade de Económicas da Universidade de Vigo, desde as 9 da mañá e até as 20 da tarde.