Administración xeral estado

Nova xornada de paros e protestas de persoal dos portos polo convenio colectivo e a aplicación dos acordos asinados

begonha.carballo — Thu, 14 Mar 2013 13:01:56 +0100

A xornada de protestas comezaba ás 09:00 horas cunha concentración de delegados/as ás portas dos accesos do peirao de San Diego, onde tamén procederon á cortar o tráfico durante unha media hora. Posteriormente, trasladáronse até o edificio da Autoridade Portuaria, para que se sumaran á protesta os traballadores/as que secundaron o paro de dúas horas convocado para hoxe. Ademais, o persoal recibiu o apoio de delegados/as doutros portos de Galiza que se trasladaron até a Coruña.

A respecto das negociacións para a aplicación dos acordos xa asinados, o coordinador de portos da CIG, Manuel Mosquera, explicaba que non se produciu ningún avance dende a xuntanza que a representación do persoal mantivo en Madrid con organismo Estatal hai xa dúas semanas. “Non nos volveron convocar, está todo paralizado”, denunciou.

“A proposta que nos formularon cando estivemos en Madrid redúcese a prorrogar o convenio na parte normativa, pero sen incluír os aspectos referidos á produtividade e ao desenvolvemento por competencias, que é onde se recollen as subas salariais. É dicir ofrécennos un convenio sen eficacia”, critica Mosquera.

Neste senso, lembrou que o incremento do 0.6 para desenvolvemento da Xestión por Competencias e do 0.71 de produtividade adicional, recollido no acordo invalidado pola Comisión Interministerial de Retribucións (CECIR) , era algo que xa contiña o convenio.

Un convenio colectivo prorrogado dende 2009 e que, advertiu, de non desbloquearse a negociación para un novo marco regulador, perderá vixencia a partir do próximo mes de xullo, por mor da limitación da ultraactividade introducida coa reforma laboral, quedando os traballadores e traballadoras baixo o marcado no Estatuto dos Traballadores/as.

Os paros e protestas continuarán o vindeiro día 21 de marzo nos portos de Ferrol-San Cibrao e Vilagarcía e o día 4 de abril en Vigo. Ademais, para o próximo mes está convocado un peche de tres días (10, 11 e 12 de abril) e mobilizacións todos os xoves.

Delegados/as de persoal dos portos dependentes do estado inician peches conxuntos nas oficinas das Autoridades Portuarias

begonha.carballo — Mon, 14 Jan 2013 13:34:15 +0100

Os/as representantes dos traballadores/as iniciaron o peche nas distintas oficinas da Autoridade Portuaria pouco despois das 07:00 horas e teñen previsto prolongar a medida de presión até mañá, martes 15 de xaneiro. Así mesmo, para visibilizar esta protesta, os traballadores/as penduraron das fiestras dos edificios cartaces e faixas alusivos ás súas reivindicacións.

O coordinador de Autoridades Portuarias da CIG-Administración, Manuel Mosquera, explicou que con esta medida de presión búscase avanzar na sinatura do novo convenio colectivo (prorrogado dende 2010), xa que as negociacións están paralizadas dende o verán. A este respecto, sinalou que xa existen acordos entre a representación sindical e o organismo público Portos do Estado (dependente do MInisterio de Fomento) asinados a finais de xuño de 2012, mais falta a autorización da Comisión Interministerial de Retribucións (do Ministerio de Facenda) para que o documento teña validez.

“Se non se producen avances para a sinatura do novo convenio, puntualiza Mosquera, o próximo xullo, por mor da reforma laboral, o actual convenio deixará de estar vixente e poderíase dar o caso de que a entidade se descolgue do mesmo”, aproveitando a circunstancia para rebaixar aínda máis as condicións laborais e salariais e provocar unha caída dos niveis de emprego. Neste momento, aclara, nos cinco portos públicos galegos (Ferrol-San Cibrao, A Coruña, Vilagarcía, Marín e Vigo) traballan arredor dunhas cincocentas persoas.

As organizacións sindicais denuncian os recortes salariais e laborais aplicados ao persoal dos portos públicos, subliñando que, aínda que a xestión é pública, as taxas portuarias son privadas, polo que as retribucións dos traballadores/as non supoñen custe algún para a administración pública, xa que o propio sistema portuario se autofinancia.

As mobilizacións, convocadas por UGT, CCOO e CIG e desenvolvidas en todo os portos dependentes do estado, prolongaranse até o vindeiro mes de abril, e incluirán, alén destas dúas xornadas de paros, concentracións todos os xoves a partir do día 17 de xaneiro.

Funcionarios/as diante da Subdelegación do Goberno en Pontevedra contra a perda de poder adquisitivo

pilar.rodriguez — Fri, 21 Dec 2007 00:00:00 +0100

Mércores 19 de decembro, xoves 20 e venres 21 son as datas de tres concentracións dos funcionarios e funcionarias da Administración xeral do Estado contra a perda de poder adquisitivo, nunha convocatoria realizada pola Federación da Administración Pública da CIG.

Os orzamentos do Estado recollen un incremento retributivo para os anos 2007 e 2008 dun 3% que, con carácter xeral, aplicarase a todo o persoal das distintas administracións públicas (estatal, autonómicas e locais). Así mesmo, permítese ás distintas administracións complementar estes incrementos cos acordos que en cada ámbito se pacten.

No caso da Administración xeral do Estado, durante o mes de novembro de 2007 acadáronse acordos de incrementos retributivos complementarios, consistentes en:

1. Establecemento dun sistema de Carreira Profesional para o persoal da Axencia Estatal Tributaria.

2. Reparto dun 0,3% adicional, destinado a incrementar as retribucións complementarias de determinados colectivos.

Segundo o rexistro de persoal, dependen da Administración xeral do Estado un total de 230.000 empregados/as, e o número de postos de traballo afectados polos incrementos retributivos selectivos alcanza un total de 40.000, polo que os salarios dos restantes 190.000 funcionarios/as (máis do 75% do persoal) quedan afectados unicamente polo incremento xeral (3%).

Afectados por acordos de incrementos selectivos			Total empregados AGE	Persoal que perde poder adquisitivo
Axencia Tributaria	Fondos 0,3	Total	Total empregados AGE	Persoal que perde poder adquisitivo
27.000	13.000	40.000	230.000	190.000

Isto sucede nun momento no que, segundo declaracións do ministro de Economía “os orzamentos para 2008 culminan a lexislatura cos mellores resultados económicos da democracia; o Estado rexistrou até outubro un superávit de 28.218 millóns de euros, o 2,68% do PIB”.

A pesares das promesas feitas por Zapatero durante a campaña electoral ao respecto de recuperar o poder adquisitivo na función pública, os traballadores da Administración denuncian “como na actual lexislatura os incrementos retributivos incluídos nos orzamentos sitúanse un punto porcentual por baixo do alza do IPC”.

Ano	% de incremento retributivo				IPC	Diferenza
	Xeral	Pagas extra	Fondos AGE	Total
2004	2	0,7	0,3	3	3,5	-0,5
2005	2	0,7	0,3	3	3,4	-0,4
2006	2	1	0,3	3,3	2,6	+0,7
2007	2	1	0,3	3,3	4,1	-0,8
Totais	8	3,4	1,2	12,6	13,6	-1,0

Neste contexto, os funcionarios/as da Administración xeral do Estado iniciaron un proceso de mobilizacións, que comezaron con concentracións diante da Delegación e Subdelegacións do Goberno na terceira semana de decembro. O lema destas mobilizacións foi “Acordos pata todos/as”, co que “pretendemos demandar o establecemento dun sistema de carreira administrativa para todo o persoal da Administración xeral do Estado, a extensión dos acordos de reparto de fondos adicionais a todo este persoal e o establecemento de medidas que compensen a perda de poder adquisitivo”.