A CIG-Administración amosou o seu absoluto rexeitamento a unha posíbel conxelación do salario dos empregados públicos, barallada nos últimos días polo Goberno estatal como medida de “aforro”. Dende a Federación lémbrase que os/as traballadores/as da administración veñen sufrindo unha continuada contención salarial, agravada coa sinatura do acordo entre o Goberno de Zapatero e as organizacións sindicais estatais que limita a suba das retribucións ao 0.3%, engrosando así a importante perda de poder adquisitivo acumulada nos últimos anos, que supera xa o 42%.

Os traballadores/as e traballadoras das Administración Públicas ficaron sorprendidos ao recibir a nómina do mes de xaneiro, xa que todo o persoal cobrou entre 10 e 30 euros menos que nunha mensualidade habitual. A escasa suba salarial pactada e decretada polo Goberno do Estado, coa conivencia dos sindicatos estatais, e a eliminación da rebaixa dos 400 euros na retención do IRPF, teñen provocado unha importante perda do poder adquisitivo dos traballadores e traballadoras das administracións públicas.

Os delegados e as delegadas da CIG están convocados a unha asemblea o 4 de febreiro para aclarar a postura da central de cara a negociación colectiva no 2009. Ao remate da mesma, os delegados e as delegadas da central protagonizarán unha manifestación polas rúas de Compostela até o edificio da Xunta de Galiza na defensa dos postos de traballo, o poder adquisitivo dos salarios e para demandar medidas efectivas contra a crise económica.

A cidade de Pontevedra acolle ao longo desta semana tres concentracións diante da Subdelegación do Goberno en Pontevedra dos funcionarios e funcionarias da Administración xeral do Estado porque durante a actual lexislatura os salarios dos traballadores/as públicos continúan a perder poder adquisitivo.