Delegados e delegadas da CIG no Banco Pastor realizaron esta mércores unha concentración na oficina principal da Coruña para denunciar os custes laborais que está tendo o proceso de absorción do Banco Pastor polo Banco Popular. Dende a Sección Sindical criticouse a “liquidación a prezos de saldo” que o Banco Pastor está a facer do seu cadro de persoal e demandáronse solucións que garantan o mantemento dos empregos en Galiza tanto no banco como nas empresas do seu Grupo.

Na mañá deste mércores comezaron en Madrid as reunións entre as organizacións sindicais e os representantes do Banco Pastor e o Banco Popular de cara a abordar as consecuencias laborais do proceso de absorción. Dende a CIG reivindicouse a necesidade de negociar un protocolo que garanta o emprego, así como un plan de prexubilacións para afrontar do xeito menos traumático os posíbeis axustes de persoal.

A CIG reclámalle á dirección do Banco Popular que convoque aos sindicatos a unha xuntanza para abordar as consecuencias laborais do proceso de absorción do Banco Pastor. A central nacionalista critica que a reunión celebrada hoxe en Madrid cos responsábeis de recursos humanos das dúas entidades só servise para intercambiar información xa que foi concibida como un “foro de comunicación” e carecía da potestade de tomar decisións. Diante disto, solicitan a convocatoria dunha nova cita onde se comece a negociar o protocolo de absorción.

A pesares de que a CIG solicitou aos presidentes dos bancos Pastor e Popular a apertura de negociacións do proceso de absorción, parece que os responsábeis de recursos humanos do Banco Popular (co consentimento do Banco Pastor) decidiron saltarse o proceso negociador e iniciar unilateralmente un período de entrevistas individualizadas a todo o persoal do Pastor, co fin de coñecer as súas perspectivas de futuro na nova entidade.

A CIG, dentro do calendario de mobilizacións organizadas para preparar a folga xeral do 29 de setembro, realizou esta mañá asembleas de delegados/as e concentracións nas sete cidades galegas en contra da ratificación definitiva da reforma laboral, que terá lugar o xoves día 9 no Congreso dos Deputados. Desta volta, os delegados e delegadas da central sindical desenvolveron peches simbólicos en diferentes entidades bancarias do País co obxecto de denunciar aos verdadeiros culpábeis desta crise e visibilizar a necesidade de saír desta conxuntura encamiñados cara a un novo modelo económico, social e político.

A sección sindical da CIG no Banco Gallego vén de denunciar o despedimento dos traballadores e traballadoras da entidade adscritos ao Departamento de Estranxeiro, logo de que a empresa decidise externalizar este servizo. Dende a sección sindical sublíñase que nos dous últimos anos se está a producir un desmantelamento progresivo dos servizos centrais de A Coruña mediante o traslado a Madrid ou a exteriorización de departamentos. Diante destes reaxustes, os traballadores e traballadoras están convocados a unha asemblea xeral o vindeiro 7 de setembro, na que se abordarán posíbeis mobilizacións de cara a evitar máis despedimentos.

Delegados e delegadas sindicais no Banco Pastor concentráronse esta mañá diante da Fundación Pedro Barrié de la Maza, onde tiña lugar a Xunta de Accionistas da entidade, para denunciar os despedimentos que a dirección está a executar nas oficinas de todo o Estado, con especial incidencia na Dirección Rexional Galiza-Sur. A mobilización é a segunda protesta que o persoal do banco desenvolve nas dúas últimas semanas, aínda que non se descartan novas accións logo da semana santa.