A Confederación Intersindical Galega estrea nova páxina web, cun redeseño visual e contidos ampliados, para achegar polo miúdo o traballo da central sindical á afiliación e ao conxunto da clase obreira. Con tal motivo, comezamos esta nova andaina presentando unha análise pormenorizada das consecuencias que a reforma laboral terá para os nosos dereitos como clase e para as nosas condicións de vida. O traballo foi realizado por Luís Burgos, membro do Gabinete Técnico Confederal da CIG. Unha reforma á que as galegas e galegos temos que dar unha contundente resposta na xornada do vindeiro mércores 29 de setembro, sumándonos masivamente á folga xeral.

As centrais sindicais CIG e ELA veñen de presentar unha emenda á totalidade á proposta de Ditame sobre o Anteproxecto de Lei da Economía Sostíbel a través dos seus conselleiros Luís Burgos (CIG) e Iñaki Zabaleta (ELA). Na presentación da emenda salientan que antes de adoptar un plan de intervención legal como este, exíxese “tanto un debate social e político profundo, como a participación e o compromiso das adminstracións públicas implicadas” e afirman que ´”é máis relevante polas súas carencias que polo seu contido”.