SERGAS

A CIG-Saúde rexeita a pretensión do Sergas de incorporar cláusulas de mobilidade forzosa e xornada temporal

paula.castro — Wed, 08 May 2013 19:40:58 +0200

A CIG-Saúde lembra que no ano 2007 negociouse na Mesa Sectorial un Plan de Provisión e Medidas de Estabilidade coa fin de rematar coa precariedade laboral. Un Plan que contemplaba a erradicación do emprego precario con nomeamentos estábeis; a creación e dotación de prazas para ser convocadas nos procesos selectivos; impedir que se produzan situacións de encadeamento sucesivo de nomeamentos eventuais; oferta de interinidades e negociar unha nova Orde de vínculos que dera resposta e solucionase os problemas existentes, respectando o principio de causalidade.

Fronte a isto denuncia que no ano 2013, o Sergas presenta un borrador de Orde que en vez de solucionar os problemas dos nomeamentos temporais, afonda máis na precariedade laboral.

María Xosé Abuín, secretaria nacional, explica que no articulado da Orde “hai cando menos dous artigos que inciden perniciosamente na desregulación das condicións laborais do persoal eventual e interino”.

En concreto subliña o artigo 9, co que se intenta incorporar nos nomeamentos unha cláusula de mobilidade forzosa dentro ou fóra da súa área de xestión e o artigo 11, referido a nomeamentos a tempo parcial, no que se lexitima a creación de nomeamentos a tempo parcial para dar cobertura a prazas que na actualidade son a xornada completa. De feito “a xornada nestes nomeamentos será como máximo do 75% da xornada actual”.

Ante isto, Abuín afirma que “é lamentábel que unha vez máis esta administración identifique eficacia na xestión con precariedade laboral” e solicita a retirada deste artigos para poder negociar unha verdadeira Orde de Vínculos que “dea resposta ás necesidades dos servizos e respecte as condicións laborais existentes”, subliñando que a xornada a tempo parcial “xa está regulada para substituír reducións de xornada do titular da praza”.

A Xunta de Persoal da Coruña reclama a cobertura inmediata da praza de xinecoloxía do COF do Ventorrillo

begonha.carballo — Tue, 09 Apr 2013 11:36:06 +0200

A continuación reproducimos o comunicado remitido pola Xunta de Persoal da Xerencia de Atención Integrada da Coruña: Pasaron 3 meses e seguimos como estabamos a 1 de xaneiro. A falta de cobertura da praza de xinecoloxía do COF do Ventorrillo a partir do 1 de xaneiro, e os plans expresados polo Sergas de remitir ás mulleres ao COF de Orillamar e aos centros de saúde para a atención de prevención de cancro e de materias de sexualidade fixeron saltar todas as alarmas: semella que a Consellaría ou esta Xerencia de Atención Integrada de A Coruña aposta polo desmantelamento progresivo deste servizo público.

Tres meses despois estamos como ao principio. A xestión que está facendo o Sergas é a seguinte:

- As mulleres que estaban xa citadas para o xinecólogo do COF do Ventorrillo están sendo remitidas a outros xinecólogos de Carballo, Betanzos ou doutras consultas do Ventorrillo, metidas en axenda a calzador. Pero hai que recordar que nestas consultas no se poñen DIU nin outras técnicas de anticoncepción.

- Para o resto de profesionais do COF do Ventorrillo (psicóloga, traballadora social, enfermería) estanse abrindo as consultas mes a mes e a final de mes (finais de marzo para citas de abril).

- As revisións de abortos ou outras consultas que non poden esperar están sendo atendidas, a maiores, no COF de Orillamar.

Se isto continúa así está claro o futuro: as mulleres terán que solucionar os seus problemas de atención sanitaria neste tema nas consultas privadas.

Ante esta irresponsabilidade a Xunta de Persoal da Área Sanitaria tratou este asunto en reunión extraordinaria e acordou solicitar unha cita urxente ao novo Xerente de Atención Integrada da Coruña.

As reivindicacións que se presentan son as seguintes:

1. De inicio: Cobertura estábel da praza de xinecoloxía vacante xa.

2. Formación do persoal en atención primaria.

3. Asignación de responsábeis en cada centro de saúde que aseguren que a poboación vai ter cobertura desta prestación sanitaria.

4. Coordinación entre atención primaria e o COF de modo que se asegure a mesma atención sanitaria se viva en Cee ou na Coruña e se poida realizar de modo satisfactorio e con calidade toda a actividade asistencial, preventiva e de educación sanitaria.

5. Cronograma da súa aplicación.

6. Concreción do orzamento preciso para realizar esta actividade sanitaria en coordinación entre os COF e os Centros de Saúde.

O SERGAS non substitúe aos facultativos de baixa incrementando o volume de doentes nun 200% en casos como psiquiatria

paula.castro — Tue, 02 Apr 2013 14:04:52 +0200

Segundo a xerencia, estes facultativos non son substituídos/as porque nesta área hai suficientes psiquiatras como para non ter que substituír as ausencias por enfermidade. Ante isto, a CIG-Saúde pregúntase se isto significa que cando o cadro de persoal está ao completo sobran psiquiatras na área.

Denuncia que esta situación non se dá únicamente en saúde mental, senón tamén noutras especialidades como UCI onde, a día de hoxe, están dous médicos de baixa por enfermidade e os seus postos sen cubrir. Unha situación que se repite, afirman, en Ciruxía Xeral, Oftalmoloxía e outras especialidades.

Xunto a isto subliman que o problema non afecta só aos hospitais, senón tamén a Atención Primaria onde alén de non substituír as baixas por enfermidade, tampouco repoñen as xubilacións, e mesmo cando os titulares collen unha IT as/os compañeiras/os teñen que asumir o cupo coa conseguinte sobrecarga de traballo e deterioro da asistencia con consultas “exprés”.

Cig-Saúde, considera que “esta situación só se podería dar no caso de non haber médicos para contratar, pero non é o que acontece neste momento, que hai persoal facultativo no paro agardando a seren contratado”.

Afirman que isto “é un claro reflexo do deterioro da sanidade pública” e que escudándose na crise “están aplicando constantes recortes avanzando cara o desmantelamento deste Servizo público”.

A Cig-Saúde reclama á Xerencia “unha xestión máis responsábel que garanta a excelencia profesional e unha óptima asistencia sanitaria aos cidadáns”.

CIG-Saúde denuncia a “caótica” situación de colapso que rexistran as urxencias do CHUF dende hai meses

begonha.carballo — Fri, 08 Mar 2013 17:55:32 +0100

Dende a Federación comarcal explican que a capacidade do servizo de urxencias está sobrepasadísima, describindo a existencia de “diminutas salas de espera sen ventilación” abarrotadas de doentes amoreados/as que se atopan en condicións indignas”, xunto con profesionais que teñen que desenvolver a súa labor en condicións, “como pouco, infrahumanas para eles/as e os seus/súas pacientes.

As salas asistidas, apuntan, están infradotadas a nivel de recursos humanos e os/as doentes que requiren de especial atención e vixilancia atópanse moitos días en situación de amoreamento, en salas nas que se supera a capacidade física “e o que resulta aínda máis grave, se sobrepasa a capacidade de traballo dos/as profesionais, pondo en risco a seguridade de pacientes e traballadoras/es”.

O amoreamento no servizo de urxencias de pacientes que deberan estar en servizos de hospitalización trae consigo situacións de colapso que se teñen convertido nunha situación do máis habitual, nunha norma, no canto de ser excepcionais ou mal chamadas situación puntuais. Así, a CIG-Saúde pon como exemplo a situación do pasado luns día 4 de marzo, cando máis de 40 pacientes permanecían no servizo de urxencias á espera de ser trasladados a unha planta.

De feito, denuncian que mesmo se chega a carecer dunha simple padiola ou de cadeiras para deitar ou sentar a un paciente; de profesionais suficientes que teñan unha mínima posibilidade de proporcionar unha atención digna e cun mínimo de calidade; de espazo físico para o volume de pacientes que se atopan no servizo e, en resumo, “carecemos dos medios físicos, materiais e humanos para unha prestación de atención urxente adecuada ás necesidades e dereitos de pacientes e profesionais”.

“Por moito que a Xerencia a través do seu gabinete de prensa informe que o que está a ocorrer no servizo de urxencias é algo puntual propio da estación….queremos e debemos desmentir esta afirmación, polo ben de usuarios e das/os traballadoras/es”, aseguran.

Así, as situacións nas que numerosos pacientes permanecen horas no servizo de urxencias son habitual, o amoreamento é habitual, a falla de profesionais nestas situacións é habitual, a falla de medios físicos e materiais é habitual. “Negar esta situación é negar a realidade porque cando se fala de colapso no servizo de urxencias as variábeis para que esta situación se produza son múltiples, e non imputábeis tan só ao número de urxencias que acoden ao servizo, senón a cualidade das urxencias, medios físicos e humanos para atendelas, tempos de espera e permanencia no servizo...”, puntualizan dende a CIG-Saúde.

Por esta razón, instan á Xerencia a habilitar as camas necesarias de hospitalización e dotar a todos os servizos dos suficientes recursos humanos para evitar que os/as doentes se amoreen en urxencias. Do mesmo xeito, invitan aos responsábeis do hospital a mudar a política de “altas precoces” para que os/as pacientes non se vexan obrigados a retornar ao centro a través do servizo de urxencias.

A CIG-Saúde alerta tamén que as/os profesionais se atopan realizando a súa labor en condicións miserábeis e baixo un enorme estrés laboral físico e emocional, polo que as posibilidades de erros nesta situación se multiplican “e tanto a Xerencia como o SERGAS lávanse as mans depositando toda a responsabilidade nuns profesionais que se atopan sufrindo e asumindo as consecuencias das políticas de recortes, cargando con toda a responsabilidade ao seu lombo”.

A este respecto, lembran que “nin a Xerencia nin o SERGAS sentan no banco dos acusados, cando ocorre algo que nunca debera ter ocorrido. Todo o contrario, os seus ingresos/retribucións aumentan de maneira proporcional ao aforro que realizan a conta de traballadoras/es e usuarias/os, retribucións que permanecen ocultas aos ollos do público”.

Fronte a este deterioro dos servizos sanitarios públicos, dende a Federación de Saúde aseveran que “non debemos permitir nin aturar por máis tempo o que está acontecendo, mermando a calidade asistencial de forma intencionada e maltratando a persoal e usuarias/os”.

A Comisión de Centro do CHUAC apunta ás políticas de recortes e á nefasta xestión como causa do colapso crónico de Urxencias

begonha.carballo — Thu, 14 Feb 2013 14:41:28 +0100

A Presidenta da Comisión, e Secretaria Comarcal da CIG-Saúde, María Seijo, criticou que dende a administración só se reaccionase unha vez que a situación de colapso das urxencias do Hospital comezou a encher un día tras outro as páxinas da prensa, mais sen que nin a Xerencia nin a Consellaría asumisen as súas responsabilidades, así como que este estado “é consecuencia dos recortes aplicados na sanidade pública.

“O que pasa nas urxencias é a expresión do fracaso das políticas sanitaria do PP”, aseverou Seijo, ao tempo que lanzou un “berro de auxilio” a toda a sociedade para que se mobilice e “forzar” ao goberno galego a dar un xiro nas políticas de recorte e privatización da sanidade pública aplicadas nos últimos anos.

Neste senso, Seijo subliñou que os recortes en sanidade, fundamentalmente os que afectan á Atención Primaria, dependencia, programas de patoloxías crónicas etc, xunto cunhas listas de espera “inadmisíbeis”, derivan nunha maior afluencia de doentes ao Servizo de Urxencias e nun meirande número de ingresos hospitalarios.

A modo de exemplo, sinalaron que tan só no ano 2009, logo da chegada do PP ao goberno galego, perdéronse na Área Sanitaria da Coruña de 19 médicas/os de familia, 58 enfermeiras/os, 7 PSX, 5 fisioterapeutas e 5 traballadoras/es sociais. Nos anos 2010 e 2011, só de médicas/os de familia se perderon 108 prazas en toda Galiza.

Amoreamento permanente

Dende a Comisión de Centro explicouse que o Servizo de Urxencias do CHUAC padece todos os días do ano un estado de saturación, de colapso crónico, “que de xeito sistemático é negado tanto pola Xerencia e Dirección Médica do Hospital, como polos responsábeis políticos (Consellería e Presidente da Xunta)”, que xustifican este estado afirmando que trata de “situacións puntuais” e negándose a ter en conta ningunha das posíbeis solucións achegadas polos/as profesionais.

A saturación e amoreamento permanente que sofren os/as doentes provocan un deterioro importantísimo da calidade asistencial, da intimidade e confidencialidade “e de cuestións tan básicas como a hixiene; deterioro impropio dun hospital de terceiro nivel como é o noso”. “As/os profesionais, denunciaron, asisten impotentes a tal deterioro que menoscaba a súa capacidade de traballo, paliando no posíbel, coa súa entrega e profesionalidade a falta de escrúpulos dunha administración incompetente”.

As e os representantes do persoal desmentiron as afirmacións da administración a respecto de que no propio Servizo de Urxencias non hai recortes de persoal, pois dotación de persoal para o servizo de Observación é tan só de 4 enfermeiras e 4 auxiliares de enfermaría, para atender unha media de 60-70 doentes. Doentes que, matizaron, maioritariamente “son persoas maiores, con patoloxías graves, dependentes e con importantes necesidades de coidados; e cando os doentes que son trasladados ao servizo de radioloxía quedan nos corredores por falta de celadoras/es que os leven de regreso a urxencias”.

Na rolda de prensa acusouse ao Presidente Feijoo de mentir cando, no ano 2011, anunciaba o remate das obras das novas Urxencias para primeiros do ano 2012, cando a realidade é que no ano 2013, un ano máis tarde da data comprometida, nin as obras están rematadas, nin polo feito até agora será posíbel que rematen o longo deste ano.

“Pero ademais, é unha frivolidade que o presidente Feijoo afirme “que o colapso é tan só un problema de espazo, que se resolverá cando estean rematadas as obras”, e pospoñer até ese momento a resolución dos graves problemas de Urxencias é unha estratexia ante a incapacidade para solucionalos, e un engano manifesto á sociedade”, aseveran.

Nefasta xestión

No tocante á guerra de cifras que sistematicamente sae nos medios de comunicación, cualificárona de “cortiña de fume”, xustificando sempre o colapso polo aumento de doentes que acoden ao Servizo de Urxencias, “cando é outra mentira”. Neste punto aclararon que o aumento na afluencia de doentes a Urxencias, podería ser soportado polo Servizo, incluso en epidemias de gripe, sempre que as/os doentes unha vez diagnosticados e tratados de urxencia puideran ser ingresados nas Unidades correspondentes.

“Isto non sucede así, pola falta de camas hospitalarias e pola mala xestión dunha Dirección que amorea as/os doentes á espera de cama na área de Observación, incluso noutras dependencias (clínicas de atención urxente), ocupando espazos valiosísimos para a atención urxente”. “A verdadeira ineficacia e ineficiencia, termos cos que tanto lles gusta ás Xerencias e Consellería relacionar á Sanidade Pública, radica nas súas nefastas políticas sanitarias e, na mala xestión que das camas hospitalarias e dos espazos dispoñíbeis se ven facendo. A culpa é do Goberno do PP, dos seus xestores, non das/os doentes nin dos profesionais”, aseveraron.

Fronte a esta situación, a Comisión de Centro defendeu o dereito da poboación a ser informada “con claridade e transparencia” da realidade que se vive a diario no Servizo de Urxencias. “Nesta ocasión, dada a importante cobertura informativa nos medios de comunicación (incluíndo a difusión de imaxes clandestinas), víronse obrigados a admitir a situación de caos, pero continúan negándose a asumir responsabilidade, e a recoñecer que o que está a pasar é consecuencia da súa política de recortes sanitarios e da súa incapacidade para a xestión”.

Novo acto de protesta para esixir a continuidade do Centro de Orientación Familiar do Ventorillo

begonha.carballo — Thu, 14 Feb 2013 14:36:14 +0100

Desta volta a protesta trasladouse até as portas do COF da rúa Orillamar, nun acto que foi conducido polo artista Xurxo Souto e no que Mariam Ferreiro, traballadora do centro, foi a encarga de ler o manifesto co que concluíu a concentración.

A continuación reproducimos o texto do manifesto:

Hoxe, Día Europeo da Saúde Sexual e Reprodutiva, queremos salientar un dos dereitos sexuais e reprodutivos básicos, recoñecidos internacionalmente: isto é, o dereito que temos as persoas á atención e á protección da nosa saúde sexual e reprodutiva

Este tipo de atención préstase, case que de xeito exclusivo, nos Centros de Planeamento Familiar, xa que hoxe por hoxe, son os servizos recoñecidos internacionalmente, coma os centros especializados para dar unha atención integral e de calidade, en materia de Saúde sexual e Reprodutiva.

Estes dereitos sexuais e reprodutivos, están recollidos, como dereitos humanos fundamentais, nos Tratados Internacionais, como son a Conferencia de Poboación e Desenvolvemento de 1994 e a Conferencia Mundial das Mulleres de 1995, acordos subscritos polo goberno español, e polo tanto, tamén de obrigado cumprimento para o goberno galego.

Concrétase este dereito “Á Atención e Protección da Saúde Sexual e Reprodutiva”, mediante a existencia de servizos de Planeamento Familiar, públicos e de calidade, que garantan:

• A promoción da saúde afectivo-sexual, mediante labores educativas, que salienten a visión multifocal da diversidade e complexidade do comportamento humano, en relación a sexualidade e a afectividade, lexitimando os diferentes tipos de relacións sexuais e non só as coitais, as diferentes orientacións sexuais, e tamén as distintas identidades sexuais.

• Servizos que garantan tamén, a adopción dun enfoque de xénero en tódalas actuacións, para garantir os dereitos afectivo- sexuais das mulleres.

• A promoción da corresponsabilidade dos homes nas prácticas sexuais, e na prevención dos seus riscos.

• A prevención dos embarazos non desexados, mediante o acceso aos métodos anticonceptivos.

• A prevención das Infeccións de Transmisión Sexual e do cancro xenital, a través das revisións xinecolóxicas periódicas de saúde.

• A atención á Interrupción Legal do embarazo.

• A atención á problemática sexual e de parella.

Ademais estes servizos teñen que:

- Estar adecuados ás características e necesidades da poboación a que van dirixidos.

- Respectar o principio de equidade e polo tanto, non limitar nin obstaculizar o acceso a estas prestacións establecidas na carteira de servizos do SERGAS.

- Desenvolver, non so, unha vertente asistencial, senón tamén de promoción da saúde afectivo-sexual e de prevención das diferentes problemáticas sexuais.

- Ser servizos de calidade, con profesionais coa suficiente formación e experiencia neste ámbito.

Compete, por tanto, ás autoridades sanitarias, garantir, que tanto a estrutura, coma o funcionamento destes centros, se organice de acordo a estas características.

Non obstante na nosa área sanitaria, estas características non se cumpren:

En primeiro lugar, porque os dous Centros de Planeamento Familiar, sempre foron insuficientes para una poboación de máis de 152.000 mulleres en idade fértil, segundo os ratios recomendados pola OMS e pola Federación Internacional de Planificación Familiar.

Este exceso de poboación asinada, determina que a maior parte do tempo, sexa empregado en labores asistenciais, quedando relegadas a un segundo plano, as labores educativas e de promoción da saúde.

En segundo lugar, porque nunca foron accesíbeis, xa que en moitos casos, están situados a mais de 100 km. de distancia, e moitas veces, a poboación non é coñecedora destes servizos.

E todo isto, vese agravado dende xaneiro deste ano, porque o COF do Ventorrillo, non ten a dotación mínima de profesionais para desenvolver unha atención de calidade, xa que non está cuberta a praza de Xinecoloxía, nin se están a citar as mulleres para ningunha consulta, están cerradas as axendas.

Por conseguinte, nestes momentos estase a vulnerar este dereito, de Atención e Promoción da Saúde Sexual e Reprodutiva, e as mulleres e os homes da nosa área sanitaria están sendo privados dunha atención integral e de calidade, coa conseguinte vulneración deste dereito básico.

E por todo isto, que as traballadoras e traballadores dos dous Centros de Planeamento Familiar, así coma os colectivos aquí representados, isto é : Plataforma pola Defensa e Mellora da Sanidade Pública-SOS Sanidade Pública A Coruña. Plataforma polo dereito a decidir en Galicia. Federación de AAVV de A Coruña e área metropolitana. Nomepisesofreghao. Observatorio feminista de saúde. Observatorio Mariña pola igualdade. Comisión da muller da agrupación Alexandre Bóveda. Colectivo Meigas radioactivas. AGASEX. PSOE. BNG. Esquerda Unida. ANOVA. Corrente Vermella. CCOO. CIG. CUT. Xuventudes Socialistas. IESGA. Galiza Nova.

Reclamamos, que con carácter urxente, sexa cuberta a praza vacante de xinecoloxía do Centro de Planeamento Familiar do Ventorrillo, e se atenda á poboación de esta área sanitaria dun xeito normalizado.

Concentración ás portas do Ventorrillo para reclamar o mantemento do Centro de Orientación Familiar

begonha.carballo — Fri, 08 Feb 2013 17:21:26 +0100

A decisión do Sergas supón repartir as/os pacientes entre o COF de Orillamar e atención primaria. Unha medida que cualificaron de “irresponsábel”, xa que significa que moita poboación vai quedar sen atención pública sanitaria en materia de saúde sexual e reprodutiva e a restante “vai ver como se agravan as listas de espera e a calidade da atención que recibía até agora”.

A actriz Isabel Martínez Risco foi encargada de dar lectura ao comunicado asinado polas numerosas organizacións que conforman o grupo de apoio ao COF, entre as que se atopa a CIG.

Con esta protesta reclámase:

1. Cobertura da praza de xinecoloxía vacante de xeito inmediata.

2. Formación do persoal en atención primaria.

3. Asignación de responsábeis en cada centro de saúde que aseguren que a poboación vai ter cobertura desta prestación sanitaria.

5. Cronograma da súa aplicación.

6. Concreción do orzamento preciso para realizar esta actividade sanitaria en coordinación entre os COF e os Centros de Saúde.

Despois da lectura do comunicado os/as asistentes presentaron reclamacións no rexistro do Centro de Especialidades do Ventorrillo. Os escritos foron tantos que se colapsou o rexistro e moitas das persoas asistentes decidiron levar a folla de reclamación aos seus centros de saúde.

Desde pola mañá cedo colectivos feministas estiveron repartindo información aos usuarios e usuarias do Centro animando a que se presentasen reclamacións e se participase nas mobilizacións que se van ir organizando.

Se o Sergas non muda a súa decisión, as mobilizacións continuarán o xoves 14 de febreiro cunha concentración diante do COF de Orillamar, ás 11,30 horas.