A Confederación Intersindical Galega considera que todas as medidas recollidas na reforma laboral van dirixidas a flexibilizar e abaratar o despedimento e as condicións laborais e proporcionar man de obra barata á patronal. A reforma pretende ademais debilitar a negociación colectiva, dividir aos traballadores e individualizar as relacións laborais. O secretario xeral, Suso Seixo, afirma que “vai provocar unha caída xeneralizada dos salarios, o empobrecemento da clase traballadora, máis desigualdades sociais e a exclusión social dos máis desfavorecidos”. Ante isto, a CIG considera que con todas as medidas que se veñen aplicando e agora con esta reforma laboral, a única resposta posíbel é a folga xeral.

O paro segue medrando en Galiza por riba da media estatal. Mentres que no conxunto do Estado o número de desempregados/as se incrementou en 1.897 persoas en decembro, en Galiza inscribíronse 4.818 novos/as parados/as, só por detrás de Castela-León, sumando un total de 258.234. A contratación experimentou unha espectacular caída e dos novos contratos asinados só un 6% foron indefinidos. A CIG denuncia que esta situación constata a paralización do mercado de traballo e “a incapacidade do goberno do PP, á fronte da xunta de Galiza, para pór en marcha políticas de apoio aos sectores produtivos para favorecer a creación de emprego”, afirma o secretario confederal de Emprego, Antonio López Rivera.

A Secretaría da Mocidade da CIG pon en marcha unha campaña dirixida a mozos e mozas identificando as últimas medidas laborais postas en marcha polo goberno do Estado. Organizaranse repartos específicos da campaña en puntos concretos: oficinas do INEM, centros de ensino superior, formación profesional, Universidades, alén de centros de traballo, co obxectivo de achegar información ao respecto das distintas modalidades de contratación existentes na actualidade, bolsas e prácticas dirixidas á mocidade.

O pasado día 29 de setembro de 2011, a Patronal do Sector Químico e o sindicato CCOO chegaron a un acordo que a Federación de Químicas e Enerxía da CIG cualifica como “gravemente prexudicial” para os intereses dos traballadores e traballadoras do sector. Denuncian que favorece unha maior flexibilidade na xornada laboral a favor da patronal, non garante o poder adquisitivo dos salarios, pretende a adaptación do convenio ao disposto na nova reforma laboral e que, no seu conxunto,, favorece un maior recorte de dereitos.

Os datos do paro rexistrado feitos públicos este martes polo Ministerio de Traballo revelan que a situación de crise económica na Galiza aínda non pasou o seu peor momento. Setembro de 2011 acadou as cifras de desemprego máis altas rexistrada neste mes dende que se iniciou a situación de crise, chegando xa ás 232.918 persoas paradas, e incrementándose en 8.336 o número de traballadores/as sen emprego con respecto ao mes de agosto.

As traballadoras da Lavandería INDUSAL Rías Altas, empresa ubicada no polígono de Sergude, en Boqueixón, irán á folga os días 13, 14, 16 e 17 deste mes para exixir o cumprimento do convenio e denunciar, alén de diferentes incumprimentos en materia de prevención de riscos laborais, as presións ás que están a ser sometidas por parte da empresa, que xa despediu a tres compañeiras e ameazou con outro 19 despedimentos.

A Confederación Intersindical Galega centra a conmemoración deste Primeiro de Maio na defensa do emprego, no rexeitamento ás reformas laborais e na defensa dos dereitos laborais e sociais, con manifestacións en todo o país baixo o lema “Polo emprego, non ás reformas do capital. Defendamos os nosos dereitos”. A CIG fai especial fincapé na defensa do emprego porque, segundo os datos da EPA feitos públicos este venres, o paro en Galiza xa chega ao 17,3%, cun total de 226.500 persoas desempregadas, das que o 51% (115.000), son menores de 35 anos. Unha situación que o secretario xeral da CIG, Suso Seixo, cualificou de “alarmante”.