A Confederación Intersindical Galega desenvolveu unha concentración esta mañá ás portas da Delegación do Goberno na Galiza para rexeitar a reforma do artigo 135 da Constitución, artellada polo PSOE e o PP sen debate social e pola vía de urxencia, que vén introducir o dogma neoliberal do “déficit cero” no texto da mesma. A protesta, que se desenvolveu coincidindo coa votación da reforma no Congreso dos Deputados, terá continuidade o vindeiro martes 6 de setembro con asembleas de delegados/as e concentracións en todas as cidades do País.

A Executiva Confederal da CIG vén de acordar convocar mobilizacións contra a reforma do artigo 135 da CE. Unha reforma neoliberal pactada polo PSOE e o PP que limita a capacidade do Estado na súa intervención nas políticas económicas e sociais e que atenta contra a autonomía financeira de Galiza. A CIG considera ademais que o procedemento seguido para tramitar esta reforma constitucional é absolutamente antidemocrático e reclama a convocatoria dun referendo.

A Confederación Intersindical Galega manifesta a súa rotunda oposición á pretensión do goberno de introducir, por vía constitucional, un tope ao gasto público. O secretario xeral da CIG, Suso Seixo, denuncia que se trata dunha “improvisación máis do Executivo de Zapatero que, en tres anos de crise, non foi quen de pór en marcha políticas propias e que se limitou a satisfacer as exixencias do capital financiero, das potencias europeas, Alemaña e Francia e do BCE, afondando no modelo económico neoliberal, responsábel da actual situación económica”.

O Consello de Ministros vén de aprobar un Decreto Lei sobre a reforma da negociación colectiva modificando varios artigos do Estatuto dos Traballadores co obxectivo de facilitar a flexibilización do salario e das condicións de traballo, fortalecer o poder empresarial e favorecer a aplicación da reforma laboral en detrimento da clase traballadora. Unha primeira análise de urxencia require partir do que nós propomos, considerar o que agora mesmo existe e avaliar os cambios normativos que se propoñen.

A CIG-Saúde de Lugo vén de solicitar á administración sanitaria que acometa unha reforma urxente do centro de saúde da Milagrosa, xa que as deficientes condicións nas que se atopa o edificio dificultan o traballo dos profesionais e diminúen a calidade asistencial. A reclamación chega logo da última incidencia no centro, ao avariarse o ascensor durante días impedindo aos usuarios/as con dificultades de mobilidade achegarse até a consulta dos/as facultativos.