O Secretario Xeral da CIG, Xesús Seixo, acompañado polo Secretario Comarcal da CIG de A Coruña, Paulo Carril, manifestou ao Delegado do Goberno o total rexeitamento da central sindical á proposta de reforma laboral e da Seguridade Social anunciada polo presidente Zapatero. No breve encontro que os representantes da CIG mantiveron con Antón Louro, tamén amosaron o malestar polo feito de que as propostas do Goberno, en materia laboral e social, se fagan chegar só as organizacións sindicais estatais, excluíndo ás outras dúas centrais que teñen a consideración de máis representativas no Estado español: CIG e ELA. Paralelamente á entrevista, delegados e delegadas da central mantiñan unha concentración diante da sede do organismo estatal.