A Coruña

O Comité de Teleperformance iniciará mobilizacións contra a eliminación da atención a clientes de Fenosa dende A Coruña

begonha.carballo — Mon, 06 May 2013 10:54:46 +0200

En Teleperformance A Coruña prestan servizos de Atención ao Cliente para Gas Natural Fenosa 311 persoas, dedicadas a varios departamentos. No caso concreto de Unión Fenosa Comercial, 105 traballadores/as están agora pendentes de saber que acontecerá cos seus postos de traballo a partires do 1 de xuño, máis tendo en conta a falta de información que están a sufrires por parte da empresa Teleperformance.

Algunhas das persoas afectadas levan a traballar para este cliente até 21 anos, “dando un servizo excelente para cos clientes de Gas Natural Fenosa”. Dende o Comité destacaron que a Atención ao Cliente de Unión Fenosa Comercial préstase dende Galiza a todo o territorio nacional, mentres que non é así no caso de Gas Natural Servicios.

A propia Teleperformance trasladou ao persoal afectado que o Grupo Gas Natural Fenosa está altamente satisfeito co servizo que se presta dende A Coruña, e que ambas as dúas empresas tentarán minimizar o impacto da decisión empresarial sobre do persoal. Porén, explican dende o Comité, a día de hoxe aínda non está concretada ningunha medida que poida garantir os postos de traballo ou minimizar o impacto sobre deles. E, aínda peor, “tampouco se descarta que medidas coma esta se tomen no futuro para o resto de servizos que se lle prestan ao cliente”.

“Dende este Comité de Empresa desexaríamos que a valoración tan positiva que se fai do noso traballo viñera traducida na conservación dos nosos postos de traballo, e non só en louvanzas sobre do noso desempeño”, matizan.

O 3 de maio o comité mantivo a última reunión coa empresa que no avanzou información nova substancial. “Teleperformance segue sen aclarar medidas concretas deixando patente a súa desconsideración de cara ao persoal que teme polo seu posto de traballo”.

Calendario de mobilizacións

Ante esta situación, o Comité convocou asembleas de traballadores/as para dar conta da situación e acordou tamén por unanimidade o seguinte calendario de mobilizacións no mes de maio na defensa dos máis de cen postos de traballo:

-Martes 7 de maio concentración de delegados de 12:00 a 13:00 diante da sede de GNF na Coruña, no Macuf, na rotonda da Grela.

-Martes 14 de 15:00 a 16:00 concentración de delegados diante do site de Teleperformance na calle Newton Nº 5.

-Xoves 16 manifestación dende o centro de traballo na calle Newton Nº 5 pasando pola avenida de Fisterra ata a oficina de atención presencial de GNF na rúa Fernando Macías, 4. Folga parcial de 12:00 a 14:00.

-Martes 21 concentración de delegados de 12:00 a 13:00 diante da sede de GNF na Coruña, no Macuf, na rotonda da Grela.

-Xoves 23 concentración de delegados diante do site de Teleperformance na calle Newton Nº 5.

Desaparición de empresas

“As empresas punteiras e máis representativas de Galiza van desaparecendo ou deslocalizándose. Coa venta de Unión Fenosa vemos como os nosos recursos naturais xeran beneficios e dividendos fóra de Galiza sen deixar beneficio aquí; e agora nos toca presenciar como se levan tamén os postos de traballo das empresas colaboradoras que foron creados en paralelo o crecemento da antiga Unión Fenosa”, denuncia o Comité.

A empresa Iberphone SAU, co nome comercial de Teleperformance, presta servizos de telemárqueting no seu centro da Coruña a diversas empresas de telecomunicacións, electricidade, banca e seguros e conta cun cadro de persoal de máis 700 traballadores/as na Coruña.

SOS-Sanidade Pública denuncia o incremento significativo da lista de espera cirúrxica na Coruña

begonha.carballo — Fri, 03 May 2013 11:24:31 +0200

A Conselleira de Sanidade, Rocío Mosquera, fixo unhas declaracións públicas botándolle a culpa da lista de espera ás necesarias obras de urxencias, unha escusa que dende a Plataforma consideran unha burla. “Atreveuse a dicir que en Galiza non se recorta e que entre as obras que impediron o funcionamento de varios quirófanos varios meses e as vacacións de semana santa foi imposíbel mellorar estas listas de espera na Coruña”, censuran.

Pola contra, a Plataforma SOS Sanidade Pública da Coruña denuncia que o incremento das listas de espera se producen, precisamente, a causa dos recortes:

1. Pola falta de programación de cirurxía polas tardes. Salvo cirurxía torácica e cardíaca non houbo programación de cirurxía en horario de tarde e tampouco se incrementou a actividade cirúrxica polas mañás. A cirurxía de tarde empezou en algunhas especialidades en abril.

2. Houbo que arranxar o teito de 2 quirófanos e non estiveron operativos entre 15 días e 1 mes, pero iso non explica en absoluto o incremento da lista de espera.

3. Todos os anos hai vacacións de semana santa, que poden ser un pouco antes ou un pouco despois, “pero precisamente este ano os profesionais practicamente non solicitaron días libres xa que entre Feijoo e Rajoy encargáronse de eliminalos. Malamente pode a Conselleira escusarse coas vacacións de semana santa cando practicamente eliminou a posibilidade de gozar das mesmas”.

4. As listas de espera de cirurxía aumentan de modo continuo desde decembro de 2011, coa excepción dunha redución en xuño de 2012, así que “é falso e resulta provocador explicar as penosas listas de espera con supostas obras que, por outra parte, están totalmente xustificadas e que xa terían que estar rematadas”. En decembro de 2011 había 7.058 persoas en lista de espera para operar, 7.336 en marzo de 2012, baixou a 7.068 en xuño 2012 para seguir subindo en setembro 2012 a 7.535; 7.698 en decembro e máis aínda agora en marzo 2013 con 8.143 doentes.

5. O mesmo sucede cos tempos medios de espera que pasan de 77,4 días en marzo de 2012 a 88,6 en marzo de 2013.

6. Todo isto sen contar a lista de espera non estrutural, da que a Consellaría négase a dar cifras e que é seguro incrementaría estas cifras dun modo substancial.

“Os recortes, a incompetencia na xestión e a provocación política desta Consellaría non pode agochar o drama persoal de cada unha das persoas que agarda para resolver os problemas de saúde. Cando menos debería ter máis pudor e sentido común”, aseveran dende Sos Sanidade Pública.

O persoal de Atento continúa as mobilizacións contra os despedimentos e secunda paros de unha hora por quenda de traballo

begonha.carballo — Mon, 15 Apr 2013 14:15:03 +0200

A manifestación sairá de diante das oficinas de Atento na rúa Juan Flórez, baixará até Linares Rivas, continuando pola Praza de Ourense até a Praza de Pontevedra e dende alí de regreso ás instalacións da empresa.

Dende o Comité volveuse denunciar a fraude dos despedimentos, que a empresa de telemárketing comezará a facer efectivos dende mañá mesmo. Neste senso, explicaron que na reunión mantida o pasado venres coa Inspección de Traballo demandouse desta unha pronta actuación que permita frear os 142 despedimentos (no servizo de Atención ao cliente de empresas de Movistar e de CAT-ADSL) da plataforma da Coruña. Así mesmo, demandaron das administracións unha implicación neste conflito para evitar que se continúe avanzando na destrución de emprego na comarca, sinalando que Atento despide "pero Telefónica é quen decide".

A representación dos traballadores/as desmentiu unha vez máis a suposta diminución do volume de chamadas dos servizos alegada pola empresa para xustificar esta medida. Así, apuntaron ao cambio de estratexia aplicado pola empresa, xa que anteriormente despedía para deslocalizar o traballo a países con condicións laborais máis precarias e así incrementar o beneficio. Porén, matizan, ante as protestas de traballadores/as e clientes, as empresas de telecomunicacións, neste caso Telefónica, terían mudado a política de atención, “co único fin de lavar a súa mala imaxe e captar” novos clientes.

Proseguen as mobilizacións en Atento contra o despedimento de 142 traballadores e traballadoras

begonha.carballo — Thu, 11 Apr 2013 13:40:36 +0200

Ao berro de “Atento despide, Telefónica culpábel” ou “Despedidos, readmisión” o persoal de Atento rexeitaba novamente na rúa a decisión da compañía de desfacerse de 142 traballadores/as, alegando unha baixada do volume de chamadas. Porén, dende o Comité denuncian que esta redución se produce porque é a propia empresa á que está a desviar chamadas a outras plataformas, para así poder aplicar o artigo 17 do convenio e proceder a unha importante redución do número de traballadores e traballadoras.

Fronte a esta decisión, o persoal continuará coas mobilizacións na rúa mañá venres, xornada na que están convocadas concentracións ás 12:00 e ás 20:00 horas. Ademais, a semana próxima realizaranse paros de unha hora por quenda de traballo e novas concentracións e o martes 16 de abril (coincidindo coa efectivización dos primeiros despedimentos) está convocada unha manifestación que partirá ás 20:00 horas das oficinas de Atento.

Os traballadores/as de Santa Bárbara maniféstanse novamente contra o peche da Fábrica de Armas

begonha.carballo — Wed, 10 Apr 2013 17:09:30 +0200

A Sección Sindical da CIG volveu reiterar a viabilidade da fábrica da Coruña, e demandou o mesmo trato que recibiron ás factorías de Murcia ou Palencia, xa que as dúas plantas non tiveron presións de tempo nin se lles propuxo regulación algunha á hora de negociar saídas alternativas ao peche e a súa venda a outras compañías.

Xabier Rioboo, responsábel da Sección Sindical, puntualiza que dende o colectivo de traballadores/as estarían dispostos a asumir un expediente de regulación de emprego temporal até finais de ano, co obxectivo de acadar durante este tempo unha saída alternativa ao peche e que permita manter a actividade e os empregos.

Neste senso incidiu na necesidade de que a Xunta e o propio Ministerio de Defensa se impliquen na problemática da fábrica, pois o departamento español “é o noso principal cliente –máis do 90% da produción vai para Defensa-, é o propietario dos terreos, e porque durante anos General Dynamics se estivo beneficiando dos Programas de Defensa e dun tratamento especial co sistema de financiamento dos mesmos, a través do Ministerio de Industria”.

Ademais, apelou novamente á necesidade de que a Xunta se poña á cabeza na defensa dos máis de 170 empregos de Santa Bárbara e o futuro industrial da comarca, urxindo do Goberno galego para que dea cumprimento á proposición non de lei aprobada no Parlamento de Galiza no ano 2005 a instancias do BNG, e inste ao Goberno español a que esixa de General Dynamics o cumprimento das obrigas adquiridas coa privatización da factoría

Así as cousas, dende a Sección Sindical lembrouse que o período de negociacións coa multinacional rematou canda o período de consultas e que a empresa xa comunicou á Dirección Xeral de Traballo as condicións do ERE. De feito, o período para acollerse ás baixas incentivadas remata este mesmo venres.

A Xunta de Persoal da Coruña reclama a cobertura inmediata da praza de xinecoloxía do COF do Ventorrillo

begonha.carballo — Tue, 09 Apr 2013 11:36:06 +0200

A continuación reproducimos o comunicado remitido pola Xunta de Persoal da Xerencia de Atención Integrada da Coruña: Pasaron 3 meses e seguimos como estabamos a 1 de xaneiro. A falta de cobertura da praza de xinecoloxía do COF do Ventorrillo a partir do 1 de xaneiro, e os plans expresados polo Sergas de remitir ás mulleres ao COF de Orillamar e aos centros de saúde para a atención de prevención de cancro e de materias de sexualidade fixeron saltar todas as alarmas: semella que a Consellaría ou esta Xerencia de Atención Integrada de A Coruña aposta polo desmantelamento progresivo deste servizo público.

Tres meses despois estamos como ao principio. A xestión que está facendo o Sergas é a seguinte:

- As mulleres que estaban xa citadas para o xinecólogo do COF do Ventorrillo están sendo remitidas a outros xinecólogos de Carballo, Betanzos ou doutras consultas do Ventorrillo, metidas en axenda a calzador. Pero hai que recordar que nestas consultas no se poñen DIU nin outras técnicas de anticoncepción.

- Para o resto de profesionais do COF do Ventorrillo (psicóloga, traballadora social, enfermería) estanse abrindo as consultas mes a mes e a final de mes (finais de marzo para citas de abril).

- As revisións de abortos ou outras consultas que non poden esperar están sendo atendidas, a maiores, no COF de Orillamar.

Se isto continúa así está claro o futuro: as mulleres terán que solucionar os seus problemas de atención sanitaria neste tema nas consultas privadas.

Ante esta irresponsabilidade a Xunta de Persoal da Área Sanitaria tratou este asunto en reunión extraordinaria e acordou solicitar unha cita urxente ao novo Xerente de Atención Integrada da Coruña.

As reivindicacións que se presentan son as seguintes:

1. De inicio: Cobertura estábel da praza de xinecoloxía vacante xa.

2. Formación do persoal en atención primaria.

3. Asignación de responsábeis en cada centro de saúde que aseguren que a poboación vai ter cobertura desta prestación sanitaria.

4. Coordinación entre atención primaria e o COF de modo que se asegure a mesma atención sanitaria se viva en Cee ou na Coruña e se poida realizar de modo satisfactorio e con calidade toda a actividade asistencial, preventiva e de educación sanitaria.

5. Cronograma da súa aplicación.

6. Concreción do orzamento preciso para realizar esta actividade sanitaria en coordinación entre os COF e os Centros de Saúde.

Manifestación este domingo 7 de abril en defensa da continuidade da Fábrica de Armas e os postos de traballo

begonha.carballo — Fri, 05 Apr 2013 11:41:41 +0200

Para animar a cidadanía a participar da marcha, os traballadores/as da Fábrica de Armas –que manteñen un peche indefinido rotatorio nas instalacións- levan toda a semana facendo repartos nas rúas, buscando apoio da área metropolitana a través dos Concellos, pasando megafonía ou anunciando a manifestación en cuñas radiofónicas. Así mesmo, o sábado, sobre ás 18:00 horas, achegaranse até Riazor para facer un reparto de folletos informativos entre os/as asistentes ao partido do Deportivo e o Zaragoza.

Dende a Sección Sindical da CIG en Santa Bárbara volveuse criticar o desinterese amosado até agora polo Ministerio de Defensa, reclamando a súa implicación directa para garantir a continuidade da fábrica, de todos os empregos e polo futuro industrial da comarca. “O Ministerio non se pode desentender da Fábrica de Armas porque é o noso principal cliente –máis do 90% da produción vai para Defensa-, é o propietario dos terreos, e porque durante anos General Dynamics se estivo beneficiando dos Programas de Defensa e dun tratamento especial co sistema de financiamento dos mesmos, a través do Ministerio de Industria”, sinalou.

Neste senso, o responsábel da Sección Sindical, Xabier Rioboo, insistiu en que as instalacións teñen futuro se se aposta pola diversificación da produción no ámbito civil, para complementar deste xeito a baixada de pedidos de Defensa. Porén, denunciou que esta vía nin sequera foi avaliada pola multinacional norteamericana durante o período de negociacións do ERE.

De igual maneira, a CIG na Fábrica de Armas reclama a implicación real da Xunta e que dea cumprimento á proposición non de lei aprobada no Parlamento de Galiza no ano 2005 a instancias do BNG, instando ao Goberno español a que esixa de General Dynamics o cumprimento das obrigas adquiridas coa privatización da factoría; cuestión que tamén está recollida na moción aprobada polo Concello da Coruña.