Centos de sindicalistas e delegados/as da CIG concentráronse esta mañá nos xulgados da Coruña e Pontevedra, coincidindo coa celebración dos xuízos contra dous compañeiros da Federación de Servizos: Adolfo Naya e Marcos Cadórniga. Baixo a consigna “Defendérmonos como clase é un dereito, non un delito”, a central nacionalista pretende denunciar a represión policial e xudicial que sofren moitos e moitas militantes pola súa actividade sindical. A pesar desta situación, a CIG continuará á fronte da contestación social e da mobilización na defensa da clase obreira.

Esta martes celebrábase, na sala nº 1 do Xulgado do Social de Compostela, o xuízo por vulneración de dereitos fundamentais e acoso moral contra unha traballadora da Fundación para a Calidade Industrial e o Desenvolvemento Tecnolóxico de Galiza. No xuízo comparecía Covadonga Toca, até hai apenas un mes xerente da Fundación e actual xerente do IGAPE, e a Coordinadora da Fundación, Dolores López, á que a CIG-Administración responsabiliza da situación.

Este martes, 17 de xaneiro, ás 9:20 horas comezará, no Xulgado do Social de Compostela, en Fontiñas, o xuízo por vulneración de dereitos fundamentais e acoso moral contra unha traballadora da Fundación para o Fomento da Calidade Industrial e o Desenvolvemento Tecnolóxico de Galiza. No xuízo terá que comparecer, a ex xerente da Fundación e actual secretaria xeral do IGAPE, Covadonga Toca e a Coordinadora da Fundación, Dolores López.

O Xulgado do Social número 3 da Coruña vén de ditar sentenza pola que condena a Mercadona a abonar a prima por obxectivos de 3.175 euros que a empresa denegou a unha traballadora como represalia por integrar a candidatura da CIG para o Comité provincial. Así mesmo, o xulgado declara a “nulidade radical” da conduta vulneradora da liberdade sindical da empregada e ordena o “cese inmediato” do comportamento antisindical da empresa.

Logo de consultar a  documentación facilitada polos servizos económicos municipais, o Comité de empresa do Concello de Ames conclúe que detrás dos despedimentos propostos non hai unha motivación económica obxectiva, feito que reafirma que os despedimentos se propoñen por cuestións sindicais e políticas.

A secretaria comarcal da CIG-Servizos de Pontevedra compareceu hoxe en rolda de prensa para reclamar o cumprimento da sentenza que obriga á empresa que xestiona a cafetería da base militar da Brilat a readmitir a dúas traballadoras afiliadas á central nacionalista. Diana Rodríguez denuncia que o xulgado declarou nulo un dos despedimentos e o outro improcedente, “pero Unión Vending Cádiz segue sen abonar a correspondente indemnización no caso do despido improcedente xa que optou por non readmitila”.

A FGAMT-CIG de Pontevedra denunciou o despedimento de seis traballadoras da compañía Elaborados Santamar que ían formar parte da candidatura da central nacionalista ás eleccións sindicais que se celebran este venres. O responsábel nacional do sector de Mar, Xavier Aboi, anunciou que reclamarán a nulidade da decisión ao entender que se trata dun claro caso de represión sindical.