O secretario nacional de CIG-Ensino, Anxo Louzao, comparecía hoxe en rolda de prensa acompañado dos pais dun alumno do IES Concepción Arenal, de Ferrol, que non obtivo matrícula de honra ao computarse a nota da materia de relixión para calcular a media. Un feito que consideran “discriminatorio” e que ademais ten consecuencias económicas, tanto á hora de formalizar a matrícula, como ao solicitar praza nunha residencia universitaria.

A CIG-Ensino ten constancia de que o IES Concepción Arenal de Ferrol está considerando a cualificación da materia de relixión para calcular a media co fin de elaborar a proposta de alumnos/as que optan á matrícula de honra. Concretamente, alumnos que, polas súas notas nas demais materias, non optarían a esta matrícula de honra, logo de reclamar ao departamento de Relixión foilles incrementada a nota e, agora, atópanse en disposición de que se lles conceda, en detrimento dos alumnos/as que non cursan esta materia.

O Pleno do Consello Escolar do Estado, celebrado o pasado 26 de xuño, aprobou o Informe sobre o estado e situación do sistema educativo do curso 2006-2007, no que se tivo en conta, entre as emendas presentadas pola CIG-Ensino, a que insta “ao goberno a que revise o Concordato co Estado Vaticano co obxectivo de que o ensino da Relixión non forme parte do currículo escolar.” Unha emenda que foi aprobada con 30 votos a favor, 18 en contra e 15 abstencións.

O Consello da Xunta aprobou o Decreto de Bacharelato no Consello da Xunta sen proceder a rectificar as graves carencias que posúe e mesmo os seus erros manifestos, que obrigarán en breve a ter que modificar o seu contido, que foi froito de atender as presións de intereses alleos ao ensino, como é o caso da xerarquía da igrexa, no canto de escoitar as demandas da comunidade educativa.

A Consellaría de Educación vai clausurar o curso o día 20 e vén de abrir a matrícula para o Bacharelato. Porén, aínda non ten aprobado o novo Decreto do currículo polo que se vai ordenar o Bacharelato para o curso vindeiro. Esta situación agrávase, aínda máis, porque o propio proxecto de Decreto derroga a Orde que regula as optativas e a Consellaría non presenta, nin sequera, o borrador dunha nova.

A CIG-Ensino e os alumnos de Filosofía concentráronse o mércores día 4 de maio diante da consellaría de Educación "Por un novo Decreto de Bacharelato". A CIG-Ensino tiña preparado un gasallo para a súa titular, Laura Sánchez Piñón: un lote de libros de Historia e Filosofía para que, durante o verán, recupere as asignaturas suspensas ao longo deste curso escolar, practicamente todas agás relixión. CIG-Ensino entende que o seu titor, Emilio Pérez Touriño, debería deixala fóra do sistema educativo.

Continuando coas mobilizacións en demanda doutro decreto de bacharelato, na mañá deste mércores 21 de maio, representantes da CIG-Ensino entregaron no rexistro da consellaría de Educación, preto de 2.700 sinaturas -que veñen sumarse ás xa entregadas e que se incrementarán coas que se recollan nos vindeiros días- en apoio a esta solicitude. Previo o acto de entrega celebrouse unha concentración en San Caetano á que se sumaron alumnos de Filosofía denunciando entre outras cousas que “a consellaría mata a Filosofía”.