A CIG-Saúde rexeita a decisión da Consellaría de Sanidade de renovar a privatización de parte dos servizos de fisioterapia, logopedia e fisioterapia respiratoria da provincia de Lugo, por importe de 1,5 millóns de euros. A renovación deste concerto coa clínica Fisioterapia Lugo SL supón detraer cartos públicos para mellor a prestación deste servizo dende o novo hospital de Lugo.

Miles de persoas participaron este xoves nas mobilizacións convocadas pola Plataforma SOS Sanidade Pública nas distintas áreas sanitarias para amosar o seu rexeitamento á política de recortes aplicada pola Xunta de Galiza nos servizos sanitarios públicos. Coas concentracións, manifestacións e actos realizados esta tarde quérense denunciar os recortes nos orzamentos destinados á sanidade pública, “cun financiamento cada vez máis miserento e que vai camiño da indixencia, como paso previo á súa privatización”.

O próximo día 27 de outubro a Plataforma SOS Sanidade Pública, que agrupa a todas as Plataformas en Defensa da Sanidade Pública, ten convocadas mobilizacións simultáneas ás 20:00 horas en todas as Áreas Sanitarias do País, en defensa dos servizos sanitarios públicos e contra dos recortes aplicados pola Consellaría e a Xunta de Galiza. Ademais, a Plataforma acaba de anunciar a posta en marcha dunha Iniciativa Lexislativa Popular para pór freo aos ataques do goberno galego contra o sistema sanitario público.

O novo hospital de Lugo, presentado polo Goberno galego como o estandarte da modernidade, está plenamente sumido na política de recortes aplicada pola Consellaría de Sanidade, segundo denuncia a CIG-Saúde Lugo. Así, os novos servizos prometidos para a área sanitaria, como Hemodinámica ou Radioterapia, continúan sen funcionamento, péchanse servizos e camas, prodúcese un recorte do persoal e as vellas instalacións do complexo hospitalario avanzan no seu deterioro sen que se destinen aos usos comprometidos.

CIG-Saúde de Ferrol vén de denunciar os recortes orzamentarios da Consellaría para esta área sanitaria, que suporán unha importante redución da calidade asistencial prestada as usuarias e usuarios e unha perda considerábel de postos de traballo. Dende a Federación da CIG critican a rebaixa no número de camas por habitante, os axustes nos servizos de transporte sanitario ou os recortes nas prestacións socio-sanitarias.

Este xoves 8 de setembro está convocada folga no sector de ambulancias en contra dos recortes decretados pola Xunta no transporte sanitario urxente e para rexeitar a actitude da patronal, que se nega a asinar a revisión salarial comprometida no anterior convenio colectivo autonómico para o sector. A folga convócase dende as 0 ás 24 horas e abrangue a todas as empresas afectadas polo convenio galego para as empresas e traballadores/as de transporte de enfermos/as e accidentados/as en ambulancia.

CIG-Saúde vén de denunciar que a consellaría de Sanidade acaba de publicar no DOG deste venres os decretos de xestión integrada de Pontevedra-Salnés e Ourense-Verín-O Barco, aproveitando que estamos en período estival e sen informar previamente nin á poboación, nin aos traballadores/as, nin aos seus lexítimos representantes. Para a CIG-Saúde o único obxectivo que se pretende con esta decisión, é afastar as tomas de decisión dos centros sanitarios sen ter en conta as repercusión que isto terá para a poboación e sen atender ningunha das reclamacións feitas polas distintas plataformas en defensa da sanidade pública.