A CIG-Administración Local de A Coruña vén de presentar unha demanda no xulgado do Contencioso Administrativo contra o Concello de Oleiros por sancionar aos delegados desta central por faceren uso do crédito de horas sindicais. Dende CIG-Administración Local subliñaron que non se pode entender que un alcalde “que presume do seu apoio á revolución socialista cubana” poña en práctica medidas para impedir o exercicio libre dos dereitos dos/as empregados/as municipais.

A CIG converteuse na única forza sindical nas obras do porto exterior de A Coruña, logo de acadar os 8 delegados a elixir no Colexio de especialistas, nas últimas eleccións sindicais celebradas o pasado venres 9 de abril. Dende a CIG-Construción valoraron positivamente estes resultados que veñen respaldar a acción sindical realizada neste tempo, a pesar das suxas manobras practicadas por UGT no período electoral.

Logo da celebración das eleccións sindicais, a CIG volveu quedar como primeira forza sindical nos dous centros de traballo que a empresa Einsa ten no Polígono de Penapurreira, nas Pontes. No conxunto da representación, a central nacionalista obtivo 120 votos, acadando 8 delegados, mentres que CCOO conseguiu 5 delegados, ao igual que UGT.

A CIG-Metal vén de gañar as eleccións sindicais nos talleres que a empresa Montajes Cruz, S.L. ten no polígono da Gándara, en Ferrol, celebradas o pasado 19 de febreiro. Os representantes dos traballadores elixidos deberán agora abordar coa dirección da empresa unha proposta de modificación de horarios laborais.

A CIG de A Mariña realizou o 23 de abril en Ribadeo unha asemblea preparatoria do 1º de Maio, á que asistiron 50 delegados. A manifestación partirá ás 12:30 horas desde a Avenida Arcadio Pardiñas en Burela, fronte ao local da CIG.