Santiago Apóstol

Marcha en demanda da creación dun centro de día e unha residencia para adultos no Centro Santiago Apóstolo

begonha.carballo — Mon, 31 Jan 2011 11:05:59 +0100

Convocados/as pola CIG e UGT, traballadores e traballadoras do Santiago Apóstolo realizaron unha marcha dende os Cantóns até o edificio administrativo da Xunta en Monelos, portando unha faixa reivindicativa de máis de 20 metros. Alí, o médico Ramón Veras, en representación da Plataforma en defensa da sanidade pública, encargouse de ler un manifesto en defensa da xestión pública deste servizo asistencial e contra a amortización de 19 postos de traballo que pretende o goberno galego.

Pregunta á mesa do Parlamento

Alén das protestas convocadas pola CIG e UGT, a situación no Santiago Apóstolo vai chegar ao Parlamento Galego. O BNG ten formuladas varias preguntas para responder en Comisión e no Pleno, a respecto das intencións de privatización da xestión do centro e sobre os posíbeis despedimentos. Así mesmo, a Consellaría deberá contestar pola actitude mantida pola dirección do centro que, nun exercicio de represión sindica, impediu a celebración dunha asemblea de traballadores/as dentro do horario laboral.

Trinta e cinco anos de historia

A continuación reproducimos o comunicado que CIG e UGT repartiron entre os traballadores/as:

A “Fundación” e o “Santiago Apóstolo”: 1976/2011

O único que garante o futuro do CAEE “Santiago Apóstolo” é que a Xunta elimine o tope dos 24 anos, e cree un Centro de Día e unha Residencia para Adulto/as. E que manteña o Colexio e a Residencia para menores.

Todo o que fai a Xunta é quer enganar e gañar tempo. Foi o que fixeron nos primeiros meses do 2010 que non dicían nada ata que nospechamos.

Despois do peche, a nosa Consellería dixo que iríamos a Educación e que o persoal laboral fixo sobrante sería trasladado. Houbo protestas, os medios de comunicación destacáronas e empezamos o curso en setembro igual que o acabamos en xullo.

En outubro a Consellería di de novo que pasaremos a Educación; seguen as protestas e cando en decembro parecía que as dúas Consellerías tiñan todo atado -chegou a vir un Inspector de Educación a dicirlle ao equipo directivo do “María Mariño”que pasabamos en decembro- pero resultou que non o tiñan atado e de novo é a nosa Consellería a encargada de lidiar co tema.

Nesta nova fase, a Consellería mantén a destrución dos 19 postos públicos de traballo, e o Director non podía empezar peor porque empeza cunha gran mentira. Di que actualmente non pode haber proxectos millonarios.

Xusto di isto o Director dunha Consellería que, segundo datos oficiais dela mesma, deulle no ano 2010 a “Asociación Galega San Francisco” (AGASFRA) 4.189.248 euros; ás “Esclavas da Virxe” de Crecente 2.066.601 euros; para 109 prazas privadas en 8 concellos 5.200.000 euros; para Centros especializados en Discapacidade 3.300.000 euros...

E a propia Consellería anuncia o 16 de decembro que gastará 27 millóns de euros neste ano 2011 en atención á Dependencia. Tamén propón o Director unha reorganización desequilibrada nalgúns Colectivos; ilegal nalgún caso -divide e vencerás-, podéndose ver por onde quer desviar a atención.

O primeiro. Non garante o futuro. Pero di que con “este persoal” e “estabelecendo a turnicidade”, todo pode ser moi beneficioso.

Falta credibilidade. Que credibilidade pode ter un Director que vulnera o Convenio Colectivo nun dereito fundamental como é o de reunión, e polo cal acaba de ser denunciado en Inspección pola CIG e a UGT? Que credibilidade pode ter unha Consellería que cambia de opinión cada dúas por tres? Que credibilidade pode ter unha Consellería que, sen aviso previo, cárgase un Centro Público e privatiza o “Souto de Leixa” de Ferrol?

Este Director e esta Consellería xa non teñen ningunha credibilidade. O único que pretenden é evitar as protestas públicas que saen nos medios de comunicación, e que pasen as Eleccións Municipais de maio.

Para a UGT e a CIG a única posibilidade de que todo o persoal siga no Centro é que a Consellería faga o Centro de Día e a Residencia para Adulto/as. Todo o demais son marcha de rapazas e rapaces; amortizacións e traslados de persoal despois das Municipais, e como iso non queremos que ocorra seguemos a facer actos públicos que deixan claro ante moita xente cal é a solución ao CAEE “Santiago Apóstol”.

A “comitiva fúnebre” pola morte do Santiago Apóstolo leva a defensa deste servizo público polas rúas de A Coruña

begonha.carballo — Tue, 28 Dec 2010 11:47:10 +0100

A caravana, que partiu sobre ás 11 horas das instalacións do centro educativo, estivo encabezada por un vehículo que portaba un ataúde, símbolo, explica o colectivo de traballadores/as, do que pretende a Consellaría de Traballo e Benestar: desmantelar o Santiago Apóstolo “até que morra”.

Ademais, o futuro do centro continúa nunha situación de total incerteza logo de que a Consellaría de Educación dese marcha atrás no acordo acadado con Traballo e Benestar para que o centro pasase á depender desta primeira.

Os traballadores e as traballadoras xa advertiron que continuarán adiante coas protestas “porque é a única maneira de que o Santiago Apóstolo siga vivo” e que a Consellaría de Traballo e Benestar asuma a atención dos usuarios e usuarias máis alá dos 24 anos e abra o centro de día e a residencia para adultos baixo xestión pública.

O Centro de Asistencia e Educación Especial Santiago Apóstolo, dependente da Consellaría de Traballo e Benestar, atende dende hai 34 anos a persoas con discapacidade intelectual, dende os 3 aos 24 anos. Este centro proporciona a atención educativa e asistencial que precisas aquelas persoas con discapacidade que non poden ser integrado nos centros de educación ordinarios.

Non obstante, todos os avances acadados polos usuarios e usuarias durante o tempo no que reciben atención no Santiago Apóstolo, quedan truncados unha vez cumpre os 24 anos, xa que o centro non admite a persoas maiores desa idade. Para as familias isto significa que o fillo ou filla teña que volver ao fogar e non poida dispor de servizos alternativos e a atención especializada axeitada ás súas necesidades.

Por iso, traballadores e centrais sindicais apostan porque o futuro deste centro pase por incrementar oferta de servizos (centro residencial, centro de día, centro ocupacional, etc.) para os usuarios e usuarias maiores de 21 anos, mantendo a xestión pública do mesmo, o persoal especializado existente e adecuando as instalacións ás novas necesidades.

Persoal do Santiago Apóstolo representa o “velorio” pola morte do centro como servizo público

begonha.carballo — Thu, 16 Dec 2010 15:27:19 +0100

Non faltaron nin o cadaleito, nin as carpideiras nin sequera o cura e as súas pregarias para representar con todo luxo de detalles o “Velorio do Centro de Atención e Educación Especial Santiago Apóstolo”. A protesta, cun carácter lúdico-reivindicativo, contou coa participación de traballadores e traballadoras deste centro, representantes sindicais, políticos e da cultura, como Xurxo Souto, así como o apoio e solidariedade dunha representación do persoal do centro Souto de Leixa, en Ferrol, que tamén está padecendo unha situación similar.

O “velorio” daba comezo cos choros das carpideiras e os rezos dunha suposta clériga, que mesmo rezou un particular “credo” sobre a necesidade de manter a xestión pública do centro e a obriga da administración de achegar servizos públicos de calidade aos cidadáns/ás. A continuación, un dos traballadores do centro denunciou a campaña publicitaria que a Xunta está a levar a cabo para anunciar a mellora dos servizos sociais públicos, cando na realidade as decisións que adopta van encamiñadas a deixar nas mans de empresas privadas con ánimo de lucro a xestión da atención social, co consecuente recorte na calidade dos servizos e a amortización de empregos.

De seguido, Xurxo Souto procedeu a dar lectura a un manifesto, animouse o acto cunhas pezas de música de gaita, para finalmente rematar cunha procesión da comitiva do enterro arredor do edificio da Xunta.

As organizacións sindicais CIG e UGT continuarán co calendario de mobilizacións este venres, co reparto de folletos informativos entre os veciños e veciñas de A Coruña, e o vindeiro luns está prevista unha caravana de vehículos que partirá dende as instalacións do centro en As Xubias.

A continuación reproducimos parte do contido do manifesto:

MANIFESTO

O Centro de Asistencia e Educación Especial Santiago Apóstolo é un centro público dependente da Consellaría de Traballo e Benestar, Xunta de Galiza. Conta cunha traxectoria de 34 anos na atención ás persoas con discapacidade intelectual, entre os tres e os vintecatro anos, e atende a usuarios/as procedentes da cidade de A Coruña, da comarca e do resto de Galiza. Inaugurado no ano 1976, grazas aos terreos cedidos por Carmela Arias y Díaz de Rábago, condesa de Fenosa.

O obxectivo do centro é proporcionar a aquelas persoas que, polas súas especiais características non poidan ser integrados en Centros de Educación ordinarios, a atención educativa e asistencial que precisen en función das súas necesidades físicas, intelectuais, e afectivas, seguindo os principios de normalización, individualización e integración social.

É deber da Xunta, proporcionar os medios precisos e crear as prazas públicas suficientes, para atender ás necesidades daqueles sectores da poboación máis indefensos e en maior risco de exclusión social; garantindo a calidade da súa atención e iso conséguese con prazas públicas de xestión pública.

A Consellería de Traballo e Benestar, eludindo a súa responsabilidade, pretende desfacerse do centro e, en ningún momento propón reconverter o Santiago Apóstolo, a pesar de que a Secretaria Xeral Cristina Ortiz, ao longa das distintas mobilizacións pola defensa do centro, aseguraba unha e outra vez que se ía mellorar e se estaba a buscar a mellor solución posíbel para o Santiago Apóstolo.

Este plan de mellora tradúcese, de forma inmediata, na amortización de 19 postas de traballo por parte da Consellaría de Traballo e Benestar e, a posterior, a Consellaría de Educación e Ordenación Universitaria vai seguir coa política de destrución de emprego público e de prazas públicas. Como consecuencia, a necesidade social vai quedar desasistida.

Facemos un chamamento á cidadanía galega e, en especial, ás mulleres, homes e institucións da comarca de A Coruña para que unan a súa voz á nosa, e esixan á Xunta de Galiza que aumente a oferta de servizos para os usuarios maiores de 21 anos (centro residencial, centro de día, centro ocupacional.. .. ) do Santiago Apóstolo a través dunha xestión pública do mesmo, mantendo o persoal especializado existente e adecuando as instalación ás novas necesidades e retos que a sociedade demanda.

Así, as traballadoras e traballadores do centro, cuxa maior aspiración é o progreso dos usuarios/as ao seu cargo, sen ter en conta ningún beneficio económico, elevamos a nosa voz en defensa, non só dos nosos postos de traballo, senón que defendemos, como sempre fixemos, aos/ás nosos/as usuarios/as, homes e mulleres, aos que atendemos, educamos, coidamos e sobre todo respectamos.

Gracias a todos vós, os/as que cremos nos servizos sociais públicos de calidade, temos a forza necesaria para seguir defendendo os dereitos dos máis febles e reivindicando a consolidación e ampliación dos servizos sociais públicos.

Por todo o exposto, seguimos a defender o Centro Santiago Apóstolo como un recurso público, con xestión pública, con empregados públicos e de calidade.

A Coruña 16 de decembro de 2010

A Xunta avanza no proceso de privatización dos servizos sociais públicos

begonha.carballo — Wed, 15 Dec 2010 10:04:29 +0100

O luns 13 de decembro, estaba prevista a realización da “Comisión Superior de Persoal da Xunta de Galiza”, máximo órgano consultivo en materia de persoal, e no que, entre outros, ía a amortización de 19 postos de traballo no centro de educación especial Santiago Apóstolo de A Coruña, como parte da privatización deste centro asistencial que pretende o Partido Popular, postos de traballo básicos para dar unha prestación de servizos de calidade a nenos e nenas que requiren unha especial atención.

Delegados/as da CIG, CCOO, UGT e CSIF na Xunta, como continuación do minuto de silencio polos servizos públicos que se gardou na xuntanza previa á Comisión de Persoal (Mesa Xeral de Empregados Públicos), acordaron concentrarse diante da porta, motivo polo que os representantes da Administración cambiaron o lugar da convocatoria a outra sala blindada polas forzas e corpos de seguridade.

Este é o primeiro paso, denuncia a CIG-Administración Autonómica, que dá o Partido Popular para levar adiante a privatización dos Servizos Sociais Públicos. Como xa teñen declarado as Consellarías de Educación e de Traballo o seguinte paso será adecuar “a oferta á demanda” como si dun ben económico se tratase, reducindo posteriormente o cadro de persoal deste centro para o próximo ano.

Todas estas medidas se adoptan despois de que a Xunta de Galiza decidira derivar nenos/as deste centro a centros privados, pagando á empresas e asociacións privadas, reducindo así a “demanda” e xustificando a redución de persoal. Esta é a política do PP para os Servizos Sociais: desmantelamento progresivo, redución de persoal e perda de calidade dos servizos prestados para logo xustificar a súa privatización.

O Santiago Apóstolo xunto co centro Terra de Ferrol-Souto de Leixa, son as primeiras vítimas desta política consciente de abandono do Público. Esta política de inhibición na que se deixa esmorecer estes centros e se aposta por derivar aos usuarios a centros privados constituíndo un malgasto de recursos públicos.

As organizacións sindicais CCOO, CIG, CSI-F e UGT, esixen á Administración da Xunta que non amortice estes postos de traballo e que potencie os Servizos Sociais Públicos.

Nova protesta contra a amortización de postos e a privatización da xestión do centro Santiago Apóstolo

begonha.carballo — Fri, 10 Dec 2010 14:01:25 +0100

A concentración, convocada polo Comité de empresa e apoiada pola CIG, desenvolveuse diante do Edificio Administrativo da Xunta en Monelos, en contra das intencións da Consellaría de Traballo e Benestar, de quen depende o servizo de atención aos usuarios/as maiores de 21 anos, que ten previsto amortizar 19 postos e deixar en mans dunha empresa privada a xestión deste centro.

A protesta coincidiu coa reunión que mantiveron en Compostela representantes do Centro de educación especial Terra de Ferrol coa administración para informarse do futuro deste centro, xa que se atopa en situación similar ao Santiago Apóstolo. En dita reunión, a Xunta transmitiu a súa intención de despedir a todo o persoal interino e pasar á xestión privada a parte asistencial para maiores de 21 anos.

Ao igual que no caso do Santiago Apóstolo, o persoal do CEE Terra de Ferrol vén mobilizándose dende que a Xunta anunciara a súa decisión de avanzar no proceso de privatización de servizos sociais, tamén no eido da atención a persoas con discapacidade psíquica.

Novas mobilizacións a vindeira semana

Así mesmo, a CIG de A Coruña e UGT teñen convocada unha campaña de mobilizacións que terá continuidade o vindeiro 16 de decembro, día no que está previsto desenvolver diante do edificio administración da Xunta en Monelos, o “velorio polo CAEE Santiago Apóstol”; unha acción pola defensa e polo futuro desta instalación como centro público, con xestión pública e con empregados/as públicos.

Novas relacionadas

A asemblea de traballadores/as do Santiago Apóstol acorda realizar un novo calendario de mobilizacións contra a privatización

begonha.carballo — Wed, 01 Dec 2010 10:59:49 +0100

A CIG-Administración explica que a Consellaría ten intención de despedir, de forma inmediata, a 19 traballadores/as e privatizar a xestión da parte asistencial do centro destinada aos usuarios e usuarias maiores de 21 anos. Ademais, a Consellaría de Educación, que xestiona outra parte do centro, semella que tamén vai seguir coa política de destrución de emprego, eivando a asistencia social e a calidade deste servizo público.

Fronte a esta situación, UGT e CIG convocaron a asemblea de traballadores e traballadoras do Santiago Apóstol, na que se acordou un calendario de mobilizacións a desenvolver nas vindeiras semanas, que inclúen un reparto masivo de follas informativas pola comarca de A Coruña, petición de xuntanzas cos diferentes grupos políticos para trasladar esta problemática, unha caravana de vehículos e un peche simbólico (con data aínda por determinar). Ademais, o xoves 16 de decembro, entregarase un escrito á Consellaría de Educación e farase unha concentración, de 11:00 a 12:00 horas, diante do edificio administrativo da Xunta en A Coruña, na que se escenificará un "velorio" polo centro de atención e educación especial.

O reparto de folletos comezará este xoves, 2 de decembro, no Cantón Grande na quenda de mañá e pola tarde o persoal trasladarase ao centro comercial Catro Camiños.

Un centro con 34 anos de historia

O Centro de Asistencia e Educación Especial Santiago Apóstol, dependente da Consellaría de Traballo e Benestar, atende dende hai 34 anos a persoas con discapacidade intelectual, dende os 3 aos 24 anos. Este centro proporciona a atención educativa e asistencial que precisas aquelas persoas con discapacidade que non poden ser integrado nos centros de educación ordinarios.

Non obstante, todos os avances acadados polos usuarios e usuarias durante o tempo no que reciben atención no Santiago Apóstol, quedan truncados unha vez cumpre os 24 anos, xa que o centro non admite a persoas maiores desa idade. Para as familias, explican as centrais sindicais, isto significa que o fillo ou filla teña que volver ao fogar e non poida dispor de servizos alternativos e a atención especializada axeitada ás súas necesidades.

Por iso, dende as organizacións sindicais, apostan porque o futuro deste centro pase por incrementar oferta de servizos (centro residencial, centro de día, centro ocupacional, etc.) para os usuarios e usuarias maiores de 21 anos, mantendo a xestión pública do mesmo, o persoal especializado existente e adecuando as instalacións ás novas necesidades.

Novas relacionadas

A Executiva de CIG-Administración oponse á privatización dos centros Santiago Apóstol da Coruña e Terra de Ferrol

paula.castro — Wed, 17 Nov 2010 16:25:16 +0100

A Executiva da CIG-Administración traslada a todos/as os/as traballadores/as deses centros o apoio pola situación que están a sufrir, tanto pola súa estabilidade laboral como polos aconteceres no seu futuro laboral ante esta política desmanteladora dos Servizos Públicos que se está a xestionar por parte da Xunta de Galiza.

Estas privatizacións implican confirmar unha política de apertura da xestión dos servizos sociais á empresa privada, poñendo a satisfacción de necesidades básicas da cidadanía ao servizo do beneficio das empresas privadas.

Estas privatizacións obedecen, en primeiro lugar, a unha posición clara do Partido Popular no goberno galego, inimigo do sector público e da xestión pública dos servizos sociais.

O anuncio destas privatizacións finalmente, implica botar a un elevado número de traballadores e traballadoras con experiencia adquirida ao longo de moitos anos desenvolvendo as súas funcións e substituílos por outros en situación de maior precariedade laboral.

O respecto pola xestión pública dos servizos sociais é un elemento clave á hora de asegurar a súa calidade. Non son posíbeis uns servizos públicos de calidade sen unha forte presenza do sector público nesa área de actividade.

CIG-Administración exixe, xa que logo, que se manteña o carácter público da xestión que se realiza neses centros de referencia nas súas comarca se denuncia que “estamos diante dunha actitude de eliminación permanente de servizos públicos por parte do Partido Popular no goberno galego e de converter a actividade que se estaba a desenvolver desde a Administración Pública Galega nun negocio. Así se fixo co servizo de comedores escolares, despedindo a traballadoras/es eventuais, ofrecendo o negocio a 'catterings' privados e abandonando a poboación escolar de moitos concellos do noso Pais, nomeadamente nos núcleos rurais; negándose a cubrir as demandas dos pais e nais de moitos Colexios, nunha clara manifestación de malgasto de fondos públicos”.

Para a CIG-Administración é necesaria, pois, a unidade dentro dos colectivos laborais e a ampla difusión entre a cidadanía, como usuaria directa, que ten que ser a primeira en coñecer de que maneira se está a xogar cos Servizos Públicos en Galiza e que só se poden garantir os servizos básicos a población facendo unha defensa e aposta polos Servizos Públicos de calidade.

Novas relacionadas:

A CIG traslada o seu apoio aos traballadores e traballadoras do Centro Santiago Apóstol de A Coruña

A CIG-Administración traslada o seu apoio á loita do persoal de Centro de Educación Especial Terra de Ferrol