Dende o inicio do debate sobre o proceso de reestruturación das caixas de aforros, dende a Confederación Intersindical Galega denunciouse que estabamos ante un proceso de reconversión que tiña como obxectivo definitivo a privatización. A central advertía que tal e como fixo o PSOE hai 10 anos concentrando a banca pública no grupo Arxentaria para a súa posterior privatización, o proceso de concentración das Caixas por decreto tiña o mesmo obxectivo. As declaracións realizadas polo Presidente do Goberno sobre o decretazo que aprobará hoxe o Consello de Ministros, dando entrada ao capital privado nas caixas con dereitos políticos é unha privatización pura e dura. Así mesmo permitir que as caixas se convertan nunha fundación que poda transferir a xestión financeira a un banco é seguir o modelo italiano de privatización das entidades.

A Confederación Intersindical Galega manifesta o seu máis contundente rexeitamento ás regresivas medidas que vén de propor o goberno español e denuncia a pretensión do executivo de facer que sexa a clase traballadora quen pague a crise, mentres que quen nos levou a esta situación, o sistema capitalista neoliberal, que baseou o seu crecemento nun modelo de economía especulativa, mantén intactos os seus beneficios. Estas medidas denotan que quen dirixe a política económica dos estados é, precisamente, ese capital financeiro e poñen de manifesto a covardía e incapacidade do goberno para afrontar reformas estruturais imprescindíbeis non só para frear a crise, senón mesmo para evitar que se reproduza, se cadra con máis crueza.

A CIG de Ferrol animou a toda a cidadanía a participar na manifestación convocada pola Plataforma Rumbo21 o vindeiro sábado, 27 de marzo, para esixir o levantamento do veto político á construción naval civil na antiga Astano. Os voceiros da Unión Comarcal de Ferrol, Manuel Grandal e Xesús López Pintos, manifestaron que “agora é o momento” de mobilizarse e reclamaron ao presidente do goberno estatal que cumpra o seu compromiso de xestionar ante Bruxelas o final dunha prohibición que ten “estrangulado” o desenvolvemento económico da comarca.

A CIG-Administración amosou o seu absoluto rexeitamento a unha posíbel conxelación do salario dos empregados públicos, barallada nos últimos días polo Goberno estatal como medida de “aforro”. Dende a Federación lémbrase que os/as traballadores/as da administración veñen sufrindo unha continuada contención salarial, agravada coa sinatura do acordo entre o Goberno de Zapatero e as organizacións sindicais estatais que limita a suba das retribucións ao 0.3%, engrosando así a importante perda de poder adquisitivo acumulada nos últimos anos, que supera xa o 42%.

Á espera de realizar unha análise máis polo miúdo de cada partida orzamentaria, a CIG considera preocupantes as propostas presentadas nos Orzamentos Xerais do Estado para o ano 2010, especialmente aqueles capítulos nos que se recollen medidas relativas ás políticas fiscais, cun carácter claramente regresivo. Así mesmo, a central ve insuficientes os investimentos asignados o vindeiro ano para Galiza e reclama un maior esforzo en innovación e desenvolvemento.

O Consello de Ministros aprobaba, hai unha semana, unha batería de medidas dirixidas a paliar a aínda incipiente crise económica. A Executiva Confederal da CIG, tras analizar o alcance e as repercusións que terán estas medidas conclúe que na vez de atacar o neoliberalismo, como responsábel desta situación, e de corrixir os erros que por mor da aplicación dos seus dogmas se teñen cometido, afortalan aos seus responsábeis.