Austeridade, control do déficit público e, en consecuencia recorte do gasto público, nova reforma laboral, máis bonificacións empresariais como única fórmula para crear emprego, nova restruturación do sistema financeiro e concentración bancaria, adelgazamento das administracións públicas, recentralización administrativa... Estas son algunhas das medidas que adoptará o PP no decurso destes catro anos. Medidas que van na liña das xa adoptadas polo PSOE e que o único que conseguiron, até o de agora, foi afondar a situación de crise económica na que estamos inmersos.

Preto de 3.000 persoas sumáronse á convocatoria da CIG, na primeira mañá de chuvia e frío deste outono, para exixir un cambio radical nas políticas que os gobernos da Xunta e do Estado veñen aplicando. Así o demandou o secretario xeral, Suso Seixo, quen denunciou que hoxe, as traballadoras e traballadores galegos “estamos claramente ameazados por políticas económicas de recorte do gasto social” que levan, dixo, a un “incremento do desemprego, á destrución do tecido produtivo” e que poñen en perigo servizos sociais básicos como a sanidade e o ensino públicos.

Galiza pechou agosto cun total de 224.582 persoas desempregadas, o que supón un incremento do 0,71% (1.582) con respecto ao mes anterior. Aínda que se trata dunha subida menor que a rexistrada no conxunto do Estado español, a taxa interanual no noso país situouse no 6,17%, o que se traduce en 13.050 novos demandantes de emprego con respecto a agosto do ano 2010. Tamén destaca a elevada temporalidade dos contratos, xa que o 93,5% dos 59.850 contratos rexistrados o mes pasado foron deste tipo.

A CIG manifesta o seu total rexeitamento á proposta presentada polos secretarios de CCOO e UGT, en carta dirixida ao Presidente do Goberno español, referida a aceptar un novo acordo de moderación salarial para vindeiros anos, ampliando o período de tres anos que xa contemplaba o Acordo Interconfederal de Negociación Colectiva aínda vixente. Suso Seixo, secretario xeral da CIG, considera que con este tipo de propostas “dá a impresión que quen lles está pagando é a CEOE, en vez dos seus afiliados e afiliadas”.

A Confederación Intersindical Galega considera altamente negativos e preocupantes os datos de paro rexistrado no mes de xullo, con 223.000 desempregados/as, o que sitúa a taxa de paro en Galiza nun 17,01%, fronte o 16,19% que se rexistraba en xullo de 2010. Uns datos que veñen confirmar as predicións da central sindical, que desde que comezou a crise vén denunciando as políticas que se estaban a aplicar e advertindo que con elas contribuiríase a deteriorar aínda máis a economía e, polo tanto, a incrementar o desemprego. A CIG considera que os/as 10.557 desempregados/as menos rexistrados no mes de xullo, con respecto do mes anterior, obedecen exclusivamente a razóns de estacionalidade.

O secretario xeral da CIG, Suso Seixo, valorou moi negativamente o borrador da reforma da negociación colectiva que se deu a coñecer e que previsibelmente será aprobado mañá polo Consello de Ministros. No marco da rolda de prensa de presentación da Marcha Galega polo Emprego, declarou que o modelo que se pretende impor, dando prevalencia aos convenios de empresa fronte os provinciais afectará especialmente aos traballadores/as galegos/as. “O 90% das empresas galegas teñen menos de 6 traballadores que non terán capacidade para presionar á empresa, que imporá unha maior precarización, con incrementos de xornada e reducións salariais”.

A CIG presentou esta mañá, en rolda de prensa, a “Marcha Galega polo Emprego”. Unha gran mobilización na que se agarda que participen desempregados/as de toda Galiza, que percorrerán a pé o país, partindo inicialmente das cidades, o día 29 de xuño, para rematar o 3 de xullo en Compostela, cunha manifestación nacional. Con esta marcha preténdese sensibilizar á poboación ante o grande problema que supón o paro e exixir a posta en marcha de toda unha serie de medidas que permitan o crecemento económico e a creación de emprego, fronte as políticas neoliberais aplicadas até o de agora, que provocaron unicamente a precarización das condicións laborais.